《鏈上元宇宙》最後一集喇！

一連兩星期我哋集中講元宇宙，上一集講咗元宇宙嘅由來，今集講吓元宇宙嘅應用、經濟價值以及未來發展。

對數碼科技感興趣嘅你，錯過咗之前嘅節目唔緊要，除咗可以喺港台網站重溫，仲可以喺podcast 回味架！

人人都講元宇宙Metaverse，唔通人人都知元宇宙係乜？

《鏈上元宇宙》呢個介紹不同數碼科技嘅電台節目，由區塊鏈，再講到不同技術，最後將會以元宇宙劃上句號。到底元宇宙嘅始祖係邊個？乜嘢為之元宇宙？ 一連兩集節目揭開元宇宙嘅面紗。

全球第一部「一般用途電腦」喺1946年面世，體積相等於今日1000部手提電腦！到底係乜嘢使電腦以至好多電子產品可以越出越細呢？ 關鍵就係晶片喇！

今集《鏈上元宇宙》由晶片嘅原理、製作，再講到未來發展嘅趨勢！記住留意喇！

當最強嘅矛，遇上最強嘅盾，結局會變成點呢？

密碼學家阮子瀚博士將會為大家介紹地上最強嘅電腦─量子電腦！現時嘅電腦要用上數百年或千年先至破解得到，甚至無辦法拆解嘅密碼，量子電腦都能夠破解得到？

到底乜嘢係量子電腦？同現時嘅電腦有乜嘢唔同？量子學就聽得多，量子又係乜嘢呢？

今集《鏈上元宇宙》會帶大家深入了解量子、量子電腦以及量子糾纏。聽完你就會知矛盾對決嘅「結果」。

你以為淨係人需要上網？其實唔止呀，我哋身邊好多裝置、機械、或者數碼機器等等都會相互連結，組成一個網絡，即係物聯網（Internet of Things，簡稱IoT）。除此之外仲有車聯網，係成就車輛自動駕駛嘅關鍵添！呢啲都係發展「智慧城巿」嘅重要元素。

今集《鏈上元宇宙》會探討物聯網、車聯網，更加會講到支持呢啲網絡背後嘅Wi-Fi 及藍芽技術！

好多通訊科技我哋成日都用，但未必知道背後嘅原理，如果要去解釋都唔係咁易架！

5G流動通訊技術同之前嘅4G有咩分別？背後嘅運作同原理又係點？

我哋今時今日可以輕易上網秒速搵到答案，又要拜邊種技術所賜呢？

今集《鏈上元宇宙》會探討流動與光纖通訊技術，一次過解答你嘅疑難。唔想再知啲唔知啲？記得準時收聽《鏈上元宇宙》喇！

當電腦或者手機儲存空間爆滿，好多人都選擇將資料儲存喺雲端(Cloud)。

用就用得多喇，但雲端背後嘅技術，你又知幾多？

大家最鍾意用嚟睇片同聽音樂嘅串流平台，背後其實都同雲端運算有關。

今集《鏈上元宇宙》會探討雲端技術以及雲端運算嘅不同服務形式，亦會講講雲端背後嘅私隱以及環境污染問題。

有人話得大數據盡得天下。佢唔單止可以影響選民嘅投票結果，亦可以不期然影響你睇片、聽音樂或者購物等等嘅選擇。

但你知唔知道大數據係乜嘢？分析大數據有乜嘢步驟？邊啲行業使用大數據之後有重大改變？

今集《鏈上元宇宙》會探討人工智能AI 嘅資料來源— 大數據嘅秘密！

人工智能 (AI)不單止懂得創作藝術作品、答題及寫作能力超卓，它甚至在金融方面的表現也為人類帶來翻天覆地的轉變。到底AI怎樣推測股巿的走勢，甚或是協助偵測洗黑錢的案件呢？

今集《鏈上元宇宙》繼續探索AI 的驚人能力同時亦會為大家分析它的缺點。

人工智能（AI）嘅答題和寫作能力引起了高度關注，而其創作力也不斷帶來「驚喜」— 由AI生成嘅畫作 Théâtre D'opéra Spatial（太空歌劇院），喺2022科羅拉多州博覽會美術競賽贏得數字藝術類獎項第一名！

今集《鏈上元宇宙》，繼續探究AI喺藝術及語言方面嘅驚世「天份」～