A cornecha e o Xibardo. Unha tradución que é recreación, unha verdadeira versión
propia que toma as referencias do país.
O seu título A Cornecha e a Xibardo, non vos deixedes engañar, o xibardo é un tipo de balea. Un álbum ilustrado de Julia Donaldson e Axel Scheffler. A tradución é de Sandra Sánchez Ogando e Laura Sáez. As tradutoras son tan importantes que tamén dedican o libro e, sabedes a quen? Pois a Xohana Torres. Aparecen tamén as persoas que fan a revisión e corrección ligüística así como quen asesora sobre a terminoloxía de bechos mariños. Moita xente detrás, como vedes. Moito traballo para acadar unha obra de tanto interese publicada pola editorial patasdepeixe.

Poesía xuvenil, nin máis nin menos! Non hai demasiada pero algo imos atopando Neste caso ímonos referir a un autor: Fran Alonso e os libros que leva publicado para estas idades. O primeiro foi Cidades (un poemario infantil pero que se aproximaba á adolescencia, porque para a nostalxia das cidades e a súa lembranza hai que ter unha idade), despois conseguiu marabillarnos cunha antoloxía poética para mocidade que pensa que non lle vai gustar a poesía e que atopa versos desenfadados, rebeldes, íntimos ou impactantes que mesmo poden ser a letra dunha canción, apintada nun muro, o berro dun concertó ou unha mensaxe; desde Rosalía ás poetas máis novas. Si, non esquezo o nome «Poetízate». Logo viría Street poems centrado no mundo dos graffiti, mesturando as fotos de arte urbana dialogando con poemas como disparos que poden ser cuspidos nos muros e rapeados con pintura nas paredes. Pero hoxe tamén queremos falar de Véndoche un poema relacionando poesía e publicidade.

Soño dunha sombra é a última proposta de Xosé Cobas. Está publicado por Kalandraka en forma de álbum ilustrado e preséntase estes días en Compostela. Trátase dun libro silencioso, un libro sen palabras, deses que pode ler calquera, sexa cal sexa o idioma que fale, calquera sexa a idade que teña... Porque o que lemos son as imaxes que van construíndo o relato que cada unha de nós pasamos a palabras na nosa mente ou ao contalo en vos alta.
Diso saben moito nos campos de refuxiados, especialmente en Lampedusa. O IBBY creou unha biblioteca de libros silentes para que a rapazada que chegaba puidese ler cada un no seu idioma, tamén poderían escoitar ás persoas mediadoras léndolle noutro, pero sempre terían acceso a través do propio.
O primeiro libro mudo que coñecín foi Zoom de Istvan Banyai publicado por Fondo de Cultura Económica. Tratábase dunha viaxe visual que seguía o zoom dunha cámara dende o punto máis próximo: a cresta dun galo ata un punto no universo. A cámara vaise afastando, mostrando planos que se amplían dende o de detalle ata o panorámico. As imaxes fannos pensar no necesaria que é a observación e a mirada dende diferentes puntos de vista para non perder a realidade.

O libros das Letras do 2026. Próximo o 17 de maio, toca falar deses libros que se
elaboran presentando a escritora á que se dedican as Letras deste ano. Como sempre,
aparecen estas obras ao lado das asinadas pola autora. Son os materiais cos que se vai
traballar nos centros de ensino, os libros que se agasallan ás criaturas e mocidade para
que se aproximen a Begoña Caamaño, especialmente nesta ocasión na que os seu libros
(Circe ou o pracer do azul e Morgana en Esmelle) son novelas escritas para público
adulto. Con ela chegan os ventos do feminismo que serviron a esa literatura que
actualiza e reconstrúe os personaxes femininos da Odisea e a materia de Bretaña
dándolles un papel protagonista e activo, pero tamén o xornalismo veraz afastado das
fake news e a loita polos dereitos sociais e de identidade, a lealdade coas causas xustas.
Benvida a mirada cara a un mundo mellor!

https://delibroseoutros.blogspot.com/2026/05/un-novo-libro-sobre-begona-caamano.html https://delibroseoutros.blogspot.com/2026/05/letras-galegas-2026-un-novo-libro.html

O Peculiar de Érica Esmorís está ilustrado por Dani Padrón e publicado por Cuarto de
inverno. De onde lle vén o título? Pois do nome dun bar que rexenta a familia de
Comba, unha nena que observa todo o que a rodea cunha mirada moi especial e nolo vai
contando. Sigamos preguntándonos: por que lle puxeron ese nome ao bar? Para sabelo
terás que ler esta noveliña destinada a rapazada a partir de dez anos que non che vai
defraudar.

Unha historia de amor como outra calquera. A súa autora: Rosa Aneiros. Unha novela que conseguiu o premio Premio Raíña Lupa da Deputación da Coruña na modalidade xuvenil no ano 2024, e aparece publicada na colección Costa Oeste de Galaxia. Rosa Aneiros é xornalista, traballa no Consello da Cultura Galega e conta cunha obra que percorre a literatura para adultos, infantil e xuvenil. Sempre coa marca de calidade e respecto polo lectorado sexa cal sexa a súa idade.

Un par de álbums de animais para crianzas: O primeiro deles é Ganapán e Garabato de Chus Álvarez, ilustrado por El primo Ramón. Que é El primo Ramón? Din que é unha criatura bicéfala formada por Borja López Cotelo e María Olmo Béjar, dous arquitectos da Coruña. Ganapán e Garabato está publicado por Pepa a Loba editora, na colección Calidoscopio, destinada a criaturas dende 0 a 3...6 ou a idade que se queira, porque os acompañarémolos na lectura. Unha editora que está a nacer e faino con bo pé.

O Premio Barriga Verde de textos de teatro para monicreques 2024, na modalidade infantil, leva o título de Manchea. Está escrito por Andrea Freire e ilustrado por Lola Villar Pérez.
Manchea é un conto tradicional de princesas, cabaleiros e dragóns... ou quizais non. Da man dos nosos personaxes percorreremos o Titiriverso, un espazo onde monicreques de luva, de fíos e sombras chinesas conflúen nunha emocionante e sorprendente aventura. Esta é unha historia en verso, pero tamén en prosa, de ruptura de estereotipos e autoafirmación e inclusión. As protagonistas, a través da amizade e a confianza en si mesmas, comezarán a cuestionarse os condicionamentos familiares e sociais para descubrir que nin sequera é necesario falar para atoparen a súa propia voz.

Fina Casalderrey é a autora galega, candidata española Premio Memorial Astrid Lindgren 2026. Que todas as seccións da Oepli concorden en presentar a Fina a este premio internacional quere dicir moito. Ela foi a primeira autora galega en recibir o Premio Nacional de Literatura Infantil y Juvenil. Cando entrou na RAG, dende as bibliotecas escolares de Galicia distribuiuse un texto no que se dicía que con ela entraba a literatura infantil e a escola na institución. Creo que non hai máis que dicir…

Brunilda e Brunildo é un álbum ilustrado de Ánxela Gracián e Jessica Mera publicado
polo editorial Fervenza. Na presentación editorial fálase dunha historia que axudará a
que a cativada comprenda a importancia da adaptación, o respecto e a tolerancia. Porque
trata dunha ra que ha de cambiar de lugar (tal vez polo cambio climático) e bota de
menos todo o que perde co cambio, ata que atopa un novo amigo co que comparte
moitas cousas, pero non todas… porque cando conseguen verse cara a cara levan unha
sorpresa.