Likomishana letekuncintisana kuleli lifuna inkapani i- Google ibhadale tinkapani tetindzaba imali lesemkhatsini kwa 300 na-500 million wemarandi iminyaka lemitsatfu kuya ku lesihlanu. Loku kuvele embikweni wesikhashana weluphenyo lolwasukunyiswa ngulelikhomishana lolubitwa nge Media and Digital Platforms Market Inquiry (MDPMI). Lombiko wesikhashana utfole kutsi i-Google igovuka nemali letfolakala ngekusebentisa tebuchwepheshe (digitalisation). Kuva kabanti ngalendzaba sikhulumisana nalomelele lelikhomishana letekuncintisana, Kuhle Majola.

Ibhodi yebacondzisi labaphetse sigungu sasemanyuvesi i-Universities South Africa (USAf) seyivakalise kukhatsateka ngalemibhikisho lebhoke emanyuvesi lamanyenti akulelive. Lemibhikisho kusolwa kutsi ubangwa kwekutsi i-NSFAS iyaphuta kubhadalela bafundzi timali tekubhalisa emanyunivesi kanye netetindzawo lebahlala kuto. Kantsi bafundzi lababuyako emanyunivesi akafuni kubatsatsa ngenca yetikweleti letindzala.  Kukhuluma kabanti ngalendzaba sikhulumisana nasihlalo lobuke tetimali kuUSAf, Njingalwati Bismark Tyobeka.

Ngemuva kwekuphumelela lukhetfo lwavelonkhe eJalimane, umholi we Christian Democratic Union, Friedrich Merz , lekubhekeke kutsi angene njengaNdvunankhulu (CHANCELLOR), uvakalise kutsi utawenta konkhe lokusemandleni kutsi lela live lingasanciki kakhulu eveni leMelika njengaloku kunekungabata ngekutibophelela kwamengameli Donald Trump ekucinisekiseni kuphepha kwemave ase Europe. Merz ukhulumisene netinhlangano letincane kute akhe nato hulumende ngoba angafuni kubambisana nenhlanhlangano lephume sibili I Alternative for Germany ( AFD). Sicocisene nemhlatiyi wetindzaba tepolitiki, Sandile Swan

Kunebantfu labasha balapha eMbombela kulesifundza se Mpumalanga lebavakalise kutsi bahlele kumashela eNyunivesii yase Mpumalanga (UMP) namuhla. Umhleli walemashi Thapelo Magagula utsi leNyunivesi iyehluleka klucasha bantfu bendzawo kuleminye yemisebenti leyentiwa kulesikhungo.

 Likomishana lelibukele kuhlelwa kabusha kwemtsetfo kuleli, i-South African Law Reform Commission liphakamisa kutsi kuchitjiyelwe umtsetfo iCriminal Procedure Act, ikakhulukati sigatjana lesimayelana nekufakwa kwesicelo sebheyili. Simeme sati ngetemtsetfo Yolanda Zulu.

Tinkinga tekucimacima kwagezi kanye nekusebentisa emandla langangcolisi umoya nguletinye tetizatfu letenta kutsi bantfu batjintjele ekuphehleni gezi ngekusebentisa ema Solar Panels, lekulohlobo lekuphehla gezi ngekusebentisa imisebe yelilanga. Kepha i-Eskom icwayise bantfu nemabhizinisi lasebentisa ema Solar Panels kutsi kufanele babhalise uma bangenti njalo batawuhlawuliswa imali lefika- R6.052. Sicele lokhulumela iEskom Daphne Mokoena kutewuchaza ngaloku kanye nangekuncinywa kwagezi lesekufika kusigaba sesitfupha (level 6 loadshedding). 

I-DA isola litiko letemphilo ngekusebentisa imali lengu 28 million wemarandi Randi kukhangisa umshwalensi wetemphilo i-National Health Insurance (NHI). Kantsi nenhlangano yabodokotela I South African Medical Association (SAMA) itsi ayisiboni sidzingo sekutsi kukhgangiswe i-NHI njengoba hulumende aphuma wayowuva luvo lwebantfu ngaloludzaba, lesekusele kwetfula loluhlelo lube semtsetfweni. Sihlalo weSAMA, Dr Mvuyisi Mzukwa utsi lemali ngabe isetjentiselwa kucasha bodokotela njengoba baswelakala kakhulu etibhedlela tembuso.

Esigabeni setfu  semabhuku, namuhla sicubungula libhuku lelibhalwe nguLunga Ntuli lelinesihloko lesitsi "The 45 laws of love". Libhuku leli lekukholwakala kutsi litawusita titsandzani nalabo lebashadile kute lutsandvo lwabo licine. Sikhulumisana naye umbhali Lunga Ntuli.

Indvuna yelitiko letemaphoyisa Senzo Mchunu, utsi lendlela yekusebentisa titfwebuli (body camera)itawetfulwa ngalokusemtsetfweni ngenyanga ya Mabasa kulomnyaka.  Kepha kuvisisa kutsi loluhlelo lutawusebenta njani  asamukele sati setindzaba tebugebengu, Dr Mxolisi Mathebula...

Live leNingizimu Africa libungata lilanga lembutfo wetekuvikela namuhla lapho kukhunjulwa umsebenti lowentiwa masotja akulelive. Kutosichazela kabanti ngalelilanga  sicocisana nemcondzisi wetekuchumana wmbutfweni wetekuvikela (SANDF), Rear Admiral Prince Shabalala