Ngekusho kwelucwaningo lolwentiwe sikhungo lesicwaninga ngebantfwana eNyunivesi yase-Cape Town, kuncane lokwentiwa ngulelive kuvikela bantfwana futsi ludlame lolubhekiswe ebantfwaneni lutipha emandla ngetulu kwekuba khona kwemitsetfo lelwa nalomkhuba. Kukhuluma ngalendzaba yekuvikelwa kwebantfwana, simeme Dumisile Nala lochamuka ka-Child Line,

Bantfu besilisa bakulelive bakhutsatwa kutsi bayosoka bangaze bamele kutsi kube sebusika. Ngekusho kwenhlangano lengekho ngaphasi kwahulumende i Right to Care, seyisoke bantfu besilisa labangetulu kwa 1.6 million. Lokhulumela iRight to Care Zodwa Mamba utsi kusoka kunciphisha ematfuba ekusuleleka ngeligciwane le-HIV kanye naletinye tifo.

 Labanye bosomabhizinisi labancane lebafaka ekhatsi banikati betiphaza bacela hulumende kutsi abelulele sikhatsi sekubhalisa ngalokusemtsetfweni emabhizinisi abo.  Lokhulumela inhlangano i-Food 4 Nation Development Association, Umnumzane Sakhile Madonsela utsi bacelwa kululelwa sikhatsi lokungenani ngetinyanga letili-12 futsi angabahlanganisa nalaba lebachamuka kulamanye emave.

Inhlangano yalabangaboni emehlweni iBlind SA ilwela emalungelo etabantfu labangaboni emehlweni kutsi bakhone kufundza emabhuku.  Inhlangano yemango lebamele, iSection 27 itsi sewendlulile umncamlajucu wekusayinwa kweCopyright Amendment Bill.  Labantfu basenkantolo yemtsetfo-siksekelo kutocindzetela mengameli Cyril Ramaphosa kutsi asayine lomtsetfo-sivivinywa. Kusayinwa kwawo kutawuniketa timphumphutse lilungelo lekuhumushela ku-braille emabhuku lanebabhali ngephandle kwekutibeka engotini yekwephula lomtsetfo i-Copyright Act. Intsatseli yetfu Simphiwe Mabhena usihlanganisele lombiko.

Bahlatiyi betepolitiki labakanekise eMelika batsi emave ase Africa afenele kukhatsateka njengoba kulungiselelwa kubeka mengameli lomusha Donald Trump. Sikhulumisana nemhlatiyi wetindzaba taseAfrica, Advocate Sipho Mantula.

Bafundzi bakumatikuletjeni bacedze itolo kubhala luhlolo lwalomnyaka wa 2024, kantsi ke imiphumela kulindzeleke imenyetelwe mhla-15 January kulomnyaka lotako. Litiko lemfundvo lesisekelo litsi lemiphumela  itawushicilelwa emaphephandzabeni. Siviwe Gwarube utsi kushicilela lemiphumela emaphephandzabeni akusiko kukhiphela imininingwane yebantfu ngaphandle kepha yindlela yekwenta kubemalula kutsi bafundzi batfole lemininingwane yemiphumela. Sicocisene nasihlalo wenhlangano yemitimba lowengamele tikolo i-National Association of School Governing Bodies, Elphus Maseko.

Batsengi bacebiswa kutsi nabayotsenga njengoba kunemititilizo ye-Black Friday bavule emehlo, ngoba leminye imikhicito kukhandzakala kutsi isendalini ngeligama. Kuhlomisa umlaleli ngaletindali sikhulumisana nemeluleki ngetetimali Umnumzane Mandla Malope.

Umsakato wesive Ligwalagwala FM ligocote lenyanga yekunakekelwa kwengcondvo yabobabe ngekunikela ngemaphasela ekudla kulamadvodza lavuka ekuseni atophandza ematoho ngekulindza emigwacweni lekhona lapha edolobheni leMbombela. Kukhuluma ngalomkhankaso simeme umhleli weluhlelo i-Mzansi Breakfast Show kuLigwalagwala FM lophindze abe ngulomunye webahleli balomkhankaso ngephansi kwelihledlwana iMasakhane, Bheki Sehlabela.

Ngekusho kwelikhomishana lelengamele lukhetfo eNamibia, bangetulu kwa 1.4 million bantfu labebabhalisele kuvota  kulolukhetfo lwavelonkhe, futsi linyenti labo bantfu labasha. Lolukhetfo luchazwe njengalelitawudvonsisa matima inhlanganweni lebusako i SWAPO leseyibuse kulelalive iminyaka lengemashumi lamatsatfu nakune. Sicocisene nemhlatiyi wetepolitiki Sandile Swana...

Njengobe sewuvele usukunyiswe ngalokusemtsetfweni lomkhankaso wemalanga lalishumi nesitfupha wekulwa neludlame lolubhekiswe kubomake nebantfwana kulelive,  sifuna kukhuluma kabanti ngendzima lengadlalwa ngemadvodza kulokhankaso. Sicocisene nemsunguli wenhlangano yemadvodza leyatiwa ngekutsi Lisango Lemadvodza, uMfundisi Sipho Langa.