Kushone bantfu labasitfupha eLimpopo ngemuva kwetinsolo letitsi badle kudla lokonakele emngcwabeni. Kuyibuka lendzaba sikhulumisana na-Nonhle Shabangu kanguthishela wetekudla. 

Kubikwa kutsi mitsatfu imikhumbi lehambisa umitfwalo lehlaselwe emhubheni we Strait of Hormuz njengobe live lase Iran lichubeka nekuvimbela kuhamba kwemikhumbi kulamanti. Loku kwenteka nje mengameli wele Melika Donald Trump uncume kuselula lesivumelwano sekubeka tikhali phansi kulemphi yase Iran. Kutfola kabanti kutsi ingabe tishoni letingucuko takamuva ecingweni sikhulumisana nasolwati wetindzaba tangaphandle umnumzane Thulisa Ndlela......

Umndeni waka-Gardee, uvulele licala lenkhohlakalo nekutsikameta kusebenta kwemtsetfo emaphoyisa lambalwa, kulandzela tinsolo letentiwe nguNkomishana wemaphoyisa eMpumalanga lomisiwe emsebentini Lt. Gen Semakaleng Manamela. Manamela ugagule emaphoyisa latsite latsi atsikameta kusebenta kwemtsetfo esehlakalweni sekubulawa kwaHillary Gardee, indvodzakati yelisekela lemengameli weEFF, Godrich Gardee. Simeme lomunye walamaphoyisa labalulwe nguManamela, Major General Botsotso Moukangwe kutokhuluma ngaletinsolo

Inkantolo yamantji yase Pretoria North imencabele ibheyili Sayitjeni Fannie Nkosi. Kubuka kutsi kungani inkantolo imcishe ibheyili, sikhulumisana nesatimtsetfo Abigail Ngobeni.

I- ANC itsi nanobe umtsetfosisekelo walenhlangano ukuvumela bulungambili (dual membership), kepha angeke livunyelwe lilunga kutsi likhankasele omabili lamacembu, i-ANC neSACP.  Mabhalane jikelele we-ANC Fikile Mbalula utsi onkhe amalunga e SACP neANC atawubhalelwa tincwadzi lekumele atiphendvule kungakapheli tinsuku letili-10 kutsi achaze kwekutsi atawukhankasela i-ANC noma i-SACP kulolukhetfo lolutako lwabohulumende basekhaya.  Simeme lokhulumela i-SACP  Mbulelo Mandlana

Litiko letemaphoyisa kulelive litsi Nkomishana wemaphoyisa esifundza seMpumalanga lomisiwe emsebentini, Daphney Manamela bekufanele aye kukhomishana laMadlanga nobe ekomitini yemaphoyisa ephalamende kuyowetfula letinsolo latinekele sive. Kuyibuka kabanti lendzaba simeme sati ngetebugebengu, Dr Mxolisi Mathebula.

Sikhulu setimali kumkhandludolobha waseTshwane lesimisiwe emsebentini, Gareth Mnisi, nalamuhla uchubekile nekubukana nemibuto lematima phambi kwelikhomishana laMadlanga. Kuhlatiya lokwenteke kulelikhomishana namuhla simeme iForensic and Criminal Psychologist, Dr Alex Maseko.

Nkomishana wemaphoyisa kulelive Gen. Fanie Masemola bekavele enkantolo ngetinsolo ngekuphula umtsetfo lolawula kuphatfwa kwetimali i-PFMA. Sati ngetebugebengu Andy Mashayile utsi Gen Masemola akasakulungeli kuchubeka nekuba kulesikhundla.

Ukhonjwe indlela sihlalo we-National Freedom Party (NFP) KwaZulu Natal Mbali Shinga ngemuva kwekulahlwa ngelicala lekungatiphatsi kahle kanye nekungalandzeli imiyalo yalelicembu.  Kuva kutsi kutawuba namuphi umtselela lokucoshwa kwaShinga kupolitiki yesifundza saKwaZulu Natal, sicele umhlatiyi wetepolitiki Thami Malinga. 

Inyonyana yemaphoyisa iSouth African Policing Union (SAPU)  itsi beyingatsandza kutsi letinsolo letivetwe nguNkomishana wemaphoyisa eMpumalanga lomisiwe emsebentini Lt-Gen Daphney Manamela, tiphenywe likhomishana laMadlanga. Sicocisana nalokhulumela iSAPU Lesiba Thobakgale.