Litiko letemfundvo lesisekelo litawubambha umhlangano wesifundza wetemfundvo we-G20 kulesifundza seMpumalanga. Lomhlangano lotawubanjelwa edolobheni eWhite River kusasa, ngaLesine utawuba wekucala kulemihlangano leminyenti letawubanjwa ngembi kwalona lomkhulu wenyanga yaNovembha. Sicele lisekela lendvuna yetemfundvo Likhona lisekela lendvuna yelitiko letemfundvo lesisekelo Dr Reginah Mhaule kutosichazela ngalomhlangano.

I Ningizimu Africa kanye ne Nigeria, basayinde sivumelwane sekusebentisana kutetimayini. Loku kulandzela umhlanganbo bewusemkhatsini weNdvuna yemcebo lombiwa phansi kuleli Gwede Mantashe kanye nemlingani wakhe wase Nigeria, Dele Alake, e- Abuja.  Sicocisene nemhlatiyi wetepolitiki Khanya Vilakazi.

Inkantolo yamantji eMalahleni kulesifundza seMpumalanga iwakhululwe ngebheyli yetinkulungwane letili-10 tema-Randi lamakhansela lamabili e ANC  ngelicala lenkhohlakalo. Lamakhansela lamabili lekungu Martha Busi Hlumbani kanye na Patrcik Jerry Dijane, batfweswe licala lenkohlakalo kulandzela tinsolo tekufunjatsiswa ngemali lengu 20 thousand wemarandi leyincenye yalebebayifuna kusonkontileka lengu- 500-thousand. Simeme lokhulumrla iANC kulesifundza Sasekani Manzin kutewubuka  loludzaba.

Inyonyana yabothishela iSADTU iyobe ingenele umshuco wavelonkhe kusasa. Lenyonyana itsi ikhala ngetintfo letinyentana kulelitiko letemfundvo kuvelonkhe letifaka ekhatsi indzaba yekwehlisa luphakelo timali lelitiko letemfundvo kanye nenkhohlakalo. Simeme mabhalane walenyonyane kulesifundza seMpumalanga, Umnumzane Walter Hlayise kutawucoca kabanti ngalendzaba.

Ndvunankhuou wesifundza seMpumalanga, Mandla Ndlovu sewusukumise luphenyo loluhlose kutfola kutsi lwahanjiswa njani loluhlelo lwekutsengwa kwema-laptops elitiko letemfundvo lakulesifundza ngemali letigidzi letimbili temaRandi. Simeme lokhulumela hulumende waseMpumalanga, George Mthethwa.

Nkomishana wemtimba lowengamele imincele kuleli i-Border Management Authority (BMA), Dkt Michael Masiapato uvakashele umncele wase-Beitbridge ngenhloso yekuyocinisekisa kutsi umtsetfo uyalandzelwa kulesikhatsi sekubuya kwebantfu kumaholide eliphasika. Njengendlela yekulwa nebugebengu eminceleni yakuleli i-BMA isebentise tinsita tebuchwepheshe letifana nema-drones kanye nemakhamera lagcokwa emtimbeni. Kuva kutsi kusebenteke njani kulemincele yakuleli, simeme Sakhile Lekhuleni loyi Deputy Assistant Commissioner kuyo i-BMA

 Umhlaba wonkhe usachubeka nekwendlulisa emavi ekudzabuka ngekwendlula emhlabeni kwa-Pope Francis itolo ekuseni. Lomholi wemalibandla lema-Roma abewekucala kudzabuka e Latin America, eveni laseArgentine kantsi undlule emhlabeni sekaneminyaka lenge- 88 budzala. Kukhumbula nekubuka inzima ledlalwe ngu-Pope Francis, sicocisene namengameli wemkhandlu webamandla kuleli iSACC, Bishop Sithembele Sipuka.

Emaphoyisa esifundza seMpumalanga abophe bashayeli betimoti labangetulu kwelikhulu ngekuphula imitsetfo yemgwaco ikakhulukati kushayela banatse tjwala. Simeme lokhulumela litiko letekuphepha, kuvikeleka nekuchumana Moeti Mmusi kutosichazela.

Licembu le-MK Party litichweshisile kulokuvakasha kwamabhalane walo Floyd Shivambu esontfweni lempholofithi lowabalekela umtsetfo kuleli Shepherd Bushiri eMalawi. Kuvakasha kwa Shivambu esontfweni i-Enlightened Christian Gathering Church kususe lomkhulu umsindvo kulelive lapho linyenti litibuta kutsi kuyengani avakashela umuntfu lofunwa betemtsetfo. Kuyibuka lendzaba yekuvakasha kwaShivambu esontfweni laBushuri, sicocisene nemhlatiyi wetembangave Sandile Swana.

I World Netball ikucinisekisile kumiswa kwamengameli we Netball South Africa, Cecilia Molokwane. Kepha i Netball South Africa itsi ayati lutfo ngalesincumo lesitsetfwe ngalomengameli wayo. Kusolakala kutsi Molokwane, loneminyaka lenge-50 budzala, ucosha bantfu labona kwangatsi angeke bamesekele kutsi abuyele kulesikhundla lekutawuba lihlandla lesitsatfu kulolukhetfo lolutawubanjwa kulomnyaka. Sicocisene nentsatseli yetemidlalo kaSABC, Mduduzi Ndlovu.