Likhomishana lelengamele lukhetfo e-Namibia, i-Electoral Comission of Namibia (ECN)  litsi likulungele kuchuba lolukhetfo lwavelonke lekulindzeleke kukhetfwe umengameli lomusha kanye nemalunga ephalemende kusasa . Lolukhetfo luta ngemuva kwekushona kwaMengameli Hage Geingob ngenyanga yeNdlovana, esikhundleni sakhe kwangena liphini lakhe Nangolo Mbumba, lobambe kwesikhashana. Sicocisene nemhlatikyi wertindzaba temave emhlaba Umnumzane Thulisa Ndlela.

Inyonyana yemaphoyisa i-SAPU itsi emalunga ayo asishaye ngenhlanekela lesiphakamiso sahulumende sekufuna kubakhuphulela liholo nga 4.7 percent. Lenyonyana icedza kuphotfula tinhlelo tekuyawutsatsisa kumalunga ayo. Tinyonyana tetisebenti tembuso tifuna kukhushulelwa liholo nga 7.5 percent.  Sicocisene nalokhulumela iSAPU Lesiba Thobakgale.

Inhlangano letimele i-Women on Farms Projects,  itsi kunemitsi yekubulala tinambutane leseyavalwa yi European Union kepha iyachubeka nekusetjentiswa kulelive, futsi hulumende uyakuvumela loko. Nyalo lenhlangano ibita kutsi ivalwe lemitsi kuphindze kwentiwe netaba tekucinisekisa kuphepha kwetisebenti tasemapulazini. Kukhuluma ngaloludzaba simeme lokhulumela inhlangano yebalimi i-African Farmers Association of South Africa ( AFASA) David Mthombeni.

Ligumbi letemphilo kuMhlabuhlangene libika kutsi siyandza sibalo sebantfu lababukana nenkinga yekungasebenta kwemakhambi emitsi lalwa nemagciwane emtimbeni yabo (Antimicrobial Resistance (AMR). Kuyiva kahle lendzaba sikhulumisana naDr Velile Ngidi.

Uyacala namuhla umkhankhaso lolwa nebudlova lobubhekiswe kubomake nabantfwana iI-16 Days of Activism For No Violence Against Women and Children. Lokucala kwalomkhankaso kufikisana nembiko we-HSRC lovete kutsi tiyandza tigameko tekuhlukunyetwa kwalabasikati. Sicocisene naZana Khumalo welitiko letekutfutfukisa tenhlalo eMpumalanga. 

Inhlangano yetemphilo emhlabeni iWHO ivete kutsi iAfrica leseNingizimu ihamba embili ngesibalo sebantfu labakhuluphele ngalokwecile. Lenhlangano itsi lucwnaingo lwayo lukhombisa kutsi bangemaphesenti langemashumi lasikhombisa bafati kantsi emadvodza angemaphesenti langemna-40, bonkhe labangetulu kweminyaka lengema-35 lebachazwe njengalabakhuluphele ngalokwecile. Sikhulumisana nasolwati ngetekudla, Sylvia Maseko.

Inkantolo lenkhulu kulesifundza seMpumalanga inike masipala wase Nkomazi imvumo yekunciphisa tinyamatane e-Marloth Park. Loku kulandzela kutsi lomasipala akhale ngkutsi setigcwele kakhulu tinyamatane, futsi tiyafa ngobe atikutfoli kudla ngendlela lefanele. Kepha lamanye emalunga emphakatsi atsetse lendzaba ayimikisa enkantolo ngoba angahambisani nalesinyatselo.  Simeme lokhulumela masipala wase Nkomazi, Cyril Ripinga

Ngekusho kwelucwaningo lolwentiwe yiHuman Science Resource Council (HSRC) balinganiselwa ku 33 percent bantfu labasikati lebavakalise kutsi baphila ngephansi kwesimo sekuhlukumeteka kulelive. Lesikhungo sitsi nanobe ikhona imitamo leyentiwa nguhulumende kodvwa kusasekuyenti lekufanele kwentiwe njengoba basakhona bantfu labasikati labesabako kubhokoka nangabe bahlukunyetwa. Kukhuluma ngalolucwaningo simeme Njingalwati Khangelani Zuma lovela kuso lesikhungo iHuman Science Resource Council.

Inyonyana iAMCU itsi kufanele kube ngulenkapani beyisebenta kulemayini yaseStilfontein lekhipha labavukuzi labangekho emtsetfweni lebavaleleke ematfunjini emhlaba kuyo lemayini. Mengameli weAMCU, Umnumzane Joseph Mathunjwa utsi ngabe hulumende uyativula letimayini lekungena kuto ema zama-zama, bese kucashwa bona labantfu labemba ngalokungekho emtsetfweni kuze bakhone nabo kondla imindeni yabo.

Esigabeni setfu  semabhuku, namuhla sicubungula libhuku lelibhalwe ngu-Sbusiso Mashabane lelinesihloko lesitsi "Invent Your Own Weapons". Kutfola kabanti ngalelelibhuku, sinaye umbhali walo Sbusiso Mashabane...