Bantfu labanyenti bakulelive sebaya ngekukwetayela kutsenga online kulandzela kuvalwa kwekuyhaluka kwebantfu(lockdown) ngenca yemkhuhlane iCovid-19. Sikhungo iSABRIC secwayisa kutsi ngaletikhatsi temaholide ekuphela kwemnyaka netigebengu tigadla kakhulu ngaloko bantfu kufanele bacaphelisise nabatsenga online. Sikhulu sakaSABRIC Ronnie Zonke utsi emakhasimende kufanele anakisise , angamani akhiphe imininingwane yawo leyimfihlo.

Sifundza seMpumalanga kulindzeleke sibambe lukhetfo lwekuvala tikhala kubomasipala waseBushbuckridge kanye newaseNkomazi mhla tiyimfica kulenyanga lesetulu. Simeme lokhulumela likhomishana lelitimele lelukhetfo (IEC) kulesifundza, Sibusiso Nkosi kutosichazela ngalolukhetfo lwekuvala tikhala.

Bafundzi bakamatikuletjeni labaningi bayakhala ngesincumo selitiko lemfundvo lesiseko kanye nesikhungo seMelusi sekubaphindzisa liphepha le-maths ne-physics kulandzela kuputjuka kwalamaphepha lamabili nakubhalwa luhlolo lwekugcina. Sikhulumisene nesati setemfundvo sase-North West University, Prof. Mncedisi Maphalala kutewuva kutsi sibaluleke kangakanani lesincumo.

I Swaziland Solidarity Network (SNN) seyibite hulumende waseNingizimu Africa kutsi angavumi kwamukela Ndvunankhulu weleSwatini kutsi atowelashwa umkhuhlane weCovid-19 etibhedlela takuleli. Lokhulumela iSNN Lucky Lukhele utsi Ndvunankhulu wase-Swatini, Ambrose Mandvulo Dlamini ngekwesikhundla sakhe kuhulumende, kumenta abe yincenye yahulumende lobulele luhlelo lwetemphilo kulelalive. Utsi akelashwe khona eSwatini atobavisa bumatima lobubonwa ngeMaSwati nakaya etibhedlela tembuso.

Umphakatsi waseMjindini umashele esiteshini semaphoyisa kuyowetfula incwadzi-tikhalo lemayelana nebugebengu lobubhoke kuleyandzawo. Lemashi ilandzela kubulawa kwetitsandzani, letingenelwe endlini tadutjulwa ngulabasolwa ngekuba tigebengu. Sikhulumisene nalomunye webahleli balemashi Khansela Lifa Sithole.

Silulu SeSiswati Dictionary/Lexicography Unit sikhungo lesibukene nekubhala sichazamagama seSiswati kanye nekukhichita emabhuku ngenhloso yekulondvolota lulwimi lwesi-Swati. Sihlalo lomusha webhodi yeSilulu seSiswati Dr Sesana Mdluli ucela sive kutsi sibalekelele ekumelaneni netinsayeya lebabukene nato njengekuswelakala kwetimali tekuchuba lomsebenti busheleleti.

Inhlangano yebaholi bendzabuko itfukutsele igane lunwabu ngesimemetelo lesentiwe lisekela lendvuna yetekubusa ngekubambisana netindzaba tebaholi bendzabuko Obed Bapela lesitsintsa kumiswa kwelisiko lekusoka. Mengameli weContralesa Kgosi Lameck Mokoena ukhulume ehlelweni Letiphuma Embiteni emsakatweni Ligwalagwala FM kutsi batawuhlangana nemengameli kutewukhuluma ngaloludzaba.

Kudzilitwa emsebentini kanye nekungasebenti kuvamise kushiya tibati letinkhulu engcondvweni ikakhulukati nakute tinhlaka tekukwesekela.Lawa ngemavi alomunye wabodokotela bengcondvo Buyisile Mncina, longumetfuli tifundvo eWits University. Sikhulumisene naye eluhlelweni kubuka kutsi ngutiphi tindlela umuntfu langanciphisa ngato umonakalo longadaleka engcondvweni ngenca yalesimo sekudendwa emsebentini kumbe kungasebenti.

Inkantolo yemtsetfo-sisekelo incume kutsi tincenye letitsite temtsetfo lobukele kukhalisa labalimalele kanye nalabagulele emsebentini (Coida) tiphambene nemtsetfo-sisekelo. Lenkantolo itsi loku kungobe lomtsetfo utishiyela ngaphandle tisebenti tasetindlini leticashwe emakhaya angasese, kulabo lebachazwa "njengetisebenti". Kulesincumo lesikhishwe mhla ka-19 November 2020, lenkantolo itsite loku kusho kutsi tisebenti tasetindlini angeke tincesitelwe/tikhaliswe nangabe tibanjwa tifo kumbe tilimala nobe tifela emsebentini. Sikhulumisene nemhlatiyi wetetisebenti Bukani Mngoma kutosichazela kutsi sisho kutsini lesincumo.

Lamuhla njengoba tinsuku tingu 14 ku-Lweti 2020, umhlaba wonkhe uchwashiswa ngesifo sashukela. Ehlelweni Telive Atipheli simeme Dr Fhulufhelo Madzhiga kutewucatsatela umlaleli ngetindlela tekulwa kanye nekuvikela kungenwa sifo sashukela.