I-Democratic Alliance (DA) seyivakalise kukhatsateka ngekwandza kwetehlakalo tekugagadlelwa kwebantfwana letibikwe kumasipala wase-Gert Sibande kulesifundza seMpumalanga. Kukhuluma ngalendzaba sichumana nalokhulumela i-DA ehlangotsini labomake, bantfwana nebantfu labakhubatekile, Angel Khanyile

Esigabeni setfu semabhuku, namuhla sibuka libhuku lelinesihloko lesitsi  UTHONGATHI : IZWE LIKASHUKELA lelibhalwe ngu Lungi Mtetwa .

Tinhlangano temphakatsi letibeka imali yato eposini titsi nyalo tindvonsa matima nakumele tikhiphe letimali tato letilondvolotwa eposini. Kuva kabanti ngalendzaba sikhulumisana naMaureen Mokone lovela kulenye yaletihlangano temphakatsi e-Mahushu kulesifundza seMpumalanga kanye neMnumzane Thami Cele lophuma kuPost Bank.

Umtimba lobuke kusebenta kwetinkapani i-Companies Tribunal itsi kusukela kwetfulwa luhlelo lolusha lekusebenta le-Case Management Sytem, sekulula kakhulu kutsi labo labafaka tikhalo bakhone kulandzelela umsebenti wabo. Lomtimba utsi kubalulekile kutsi tinkapani tisebentise tinhlelo tabo ngobe atikhokhelwa kunekugijimela etinkantolo uma banetinkinga etinkapanini tabo. Simeme Dr Simukele Khoza, lophetse tekuchumana ku-Companies Tribunal kutewucocisana naye ngemsebenti wabo.

Siciwi setinyamatane i-Kruger National Park ihlanganisa iminyaka lelikhulu kulemphelasontfo. Simeme  lokhulumela lesiciwi Umnumzane Ray Thakuli..

Inhlangano yemakomanisi i SACP ihlele kuhola inkomfa yetinhlangano letihambisana nenchubo yebukomanisi. Lenkomfa kulindzeleke ibhunge kabanti ngetingcinamba letibukene nebantfu labadla imbuya ngelutsi kanye netisebenti. Kodvwa kutfola kabanti ngalenkomfa sichumana nalokhulumela i SACP  Mbulelo Mandlana..

Indvuna lebukele tindzaba tabomake, lusha kanye nalabakhubatekile ehhovisi lemengameli, Sindisiwe Chikunga wetfule ngalokusemtsetfweni umgubho weminyaka lengema-70 yekukhumbusa imashi yabomake yanga-1956. Simcelile Ndvuna Chikunga kutsi atosichazela ngalokwetfulwa ngalokusemtsetfweni kwalomgubho wekukhumbula lemashi..

Bahleli besifundza benhlangano i-March and March batsi lenhlangano itawube ibambe umbhikisho edolobheni iMbombela wekucosha bantfu lebasola ngekutsi bete emaphepha labagunyata kuba kulelive. ikhulumisana nemhlelembisi wayo kulesifundza Umnumzane Beacon Maluka.

Inhlangano letimele legcugcutela bantfu kutsi bagembule ngekucikelela i South African Responsible Gambling Foundation (SARGF) beyibambe umhlangano neMethodist Church of South Africa kutewukhulumisana ngetintfo letifaka ekhatsi, umtselela lobangwa kugembula kuloyo logembulako, emndenini wakhe kanye nasemphakatsini, nekutsi nguyiphi indzima lengadlalwa ngumkhakha wetenkolo ekulweni nalenkinga. Sikhulumisana na-Bongiwe Ngobese loyi Counseling Service Specialist ka SARGF.

Umkhandlu wetifundza ephalamende iNational Council of Provincec (NCOP) wetfule luphakelo timali lwawo lwemnyaka-timali wa 2026/27. Kuva kutsi leliphalamende lihlele kuyisebentisa njani lemali lelabelwe yona, sicele sihlalo weNCOP, Refilwe Mtshweni-Tsipane..