Inhlangano letibita ngeMpumalanga Queens in Construction ihlele kuhlanganisa ndzawonye labasikati ngenhloso yekubatfutfukisa emkhakheni wetekwakha. Lomhlangano wekubonisana uhlelwe kutsi ubanjwe ngeMgcibelo. Kepha kuyiva kancono lendzaba simeme lomunye webasunguli beMpumalanga Queens in Construction, Happy Meyane.

Bosolwati emkhakheni wetekuchumana bagcugcutela hulumende kutsi asebentise tinkundla tekuchumana kanye nekuchumana ngetebuchwepheshe, i-Digital Communication, kuze akhulumisane futsi aphendvulane masinyane netakhamuti. Loku kuvele engcungcutseleni iSocial Media Summit lebeyibanjelwe eUniversity of Johannesburg eAuckland Park. Kutfola kabanti ngalengcungcutsela nalokunye lokuvelile, sicocisene nemetfuli tifundvo eUJ, Professor Mandla Radebe

Indvuna yelitiko letekuhweba, timboni netekuncintisana Parks Tau wetfule ngalokusemtsetfweni tinkundla letimbili tekuhweba ngebuchwepheshe letiholwa embili yi Proudly South African eJozi. Kutfola ngaletinkundla letimbili tekuhwebelana sikhulumisana neChief Officer: Membership, Legal and Compliance, Mrs Happy MaKhumalo Ngidi.

Indvuna lebukele tindzaba tabomake, bantfwana kanye nalabakhubatekile ehhovisi lemengameli, Sindisiwe Chikhunga, usichazela ngalobekwenteka kulelilanga lekucala lemhlangano we-G20 Empowerment of Women Working Group lobanjelwe esiciwini setinyamatane i-Kruger National Park.

Mengameli wenhlangano yebaholi bendzabuko, i-CONTRALESA, Kgosi Mathupa Mokoena ukhutsata kukhulumisana emkhatsini webashayi bengoma kanye nebatali nakwentekile kutsi umtfwanma ubaleke watiyela matfupha engomeni. nanobe kunjalo, Mokoena uwusole kakhulu lomkhuba wekutfwalwa kwebantfwana bayiswe ngenkhani engomeni.

Inhlangano yebafundzi iSASCO seyiphakamise kutsi mengameli welive acoshe indvuna yelitiko letemfundvo lephakeme nekucecesha, Dr Nobuhle Nkabane. Simeme mabhalane jikelele weSASCO, Admission Monareng.

Bekavele enkantolo yamantji eSeshego umsolwa loneminyaka lengema-40  loboshelwe kubulala ake wakhe loneminyaka lengema-87  ngekumgabelela amente ticucu. Kubuka kutsi kusuke sekwente njani umuntfu nasekenta intfo leswacisa lugogo ngalendlela, sikhulumisana nemeluleki wengcondvo lotimele, Dr Rabi Phetla.

Inyonyana ye NEHAWU kulesifundza se-Mpumalanga beyibambe inkomfa lebeyifaka ekhatsi kukhetfwa kwebuholi lobusha besifundza. Ngembi kwekucala kwalenkomfa bekunemalunga lagongonyekile lebekamikise lenyomnyana enkantolo kepha sicelo sawo sicitsiwe, kwatsiwa asiphutfumi. Sicocisene namabhalane weNEHAWU eMpumalanga, Welcome Mnisi.

Kuleliviki lesibuya kulo sibone tinyonyana iNUM velonkhe ne NEHAWU  kulesifundza seMpumalanga tikhetsa baholi labasha. Kuletikhatsi lesiphila kuto tinyenti tisebenti letilahlekelwa ngumsebenti ngenca yekudzilitwa emsebentini, tibe tinyonyana tikhona. Ingabe tinyonyana tisawenta ngendlela lefanele yini umsebenti wato wekucinisekisa kuvikeleka kwemalungelo etisebenti? Kuphendvula lombuto naleminye sicocisene neMnumzane Bukani Mngoma.

I ANC itsi nakutawenteka i-DA yetfule sishukumiso sekungametsembi mengameli Cyril Ramaphosa loko kutawube kusho kuphuma kwe DA kulohulumende welubaniiswano i-GNU.  I-DA seyivele ivakalise kutsi angeke ihlanganyele kuletingcoco tavelonkhe tekwetama kutfola tisombululo tetinkinga letibukene nalelive lekuhlelwe kutsi ticale ngenyanga ye-Ngci kulomnyaka. Sicocisana nemhlatiyi wetepolitiki Njingalwati Ntsikelelo Breakfast.