Sekuvuliwe kufakwa kweticelo tekuphakamisa tisebenti tetemphilo letitawuklonyeliswa ngetindondo ngekwenta umsebenti loncomekako esiveni. Kutfola kabanti ngalendzaba,  sicocisene na Dr Faith Mahlangu.

Imphalasontfo yephasika igujwa minyaka yonkhe ngulabo lebalandzela inkholo yebu-Krestu, lapho kubungatwa kufa kanye nekuvuka kweNkosi yebo Jesu Kristu. Simeme Umfundisi Sam Ngobe lovela ebandleni i-TheoBasileio kutobuka naye kubaluleka kwalolusuku.

Njengoba kucala lemphelasontfo lendze yeliphasika bantfu batawube baphume kuyotijabulisa ngekwehlukahlukana kwabo lapho liningi litawube lihambele tingcungcutsela temasontfo kantsi labanye bayoticitsela situnge. Lesikhatsi seliphasika lalonyaka sifikisana nekucungutela kulabanyenti ngetindzaba tekukhushulwa kwentsela kanye futsi nebumancikancika besimo setemnotfo. Kuva kutsi yini bantfu lokumele bakunakisise nganasi sikhatsi salamaholide, simeme  umeluleki ngetetimali longumphatsi weThe BigR Financial Solutions, Saubrey Tshabalala.

Uniketwe ibheyili yetinkulungwane letingemashumi lasihlanu temalangeni Alpheous Nxumalo lobekakhulumela hulumende waSeswatini. Nxumalo uboshwe ngasekucaleni kwaleliviki ngetinsolo tekugagadlela. Sikhulumisene  nentsatseli yeSwaziland News, Zweli Dlamini njengoba kungilo leliphephandzaba lelaveta loludzaba esiveni.

Emaphoyisa esifundza seMpumalanga atawube atse citsi saka nasonke lesifundza kucinisekisa kuphepha nekuvikeleka kwetakhamuti takulesifundza kulamaholide ephasika. Sikhulumisene naBrigadier Donald Mdluli lokhulumela emaphoyisa esifundza

Inhlangano yematekisi i-SANTACO itsi konkhe kume ngemumo ekutseneni ikhone kumelana nalesiphitsiphitsi semaholide eliphasika. Lokhulumela iSANTACO Rebecca Phaala.

I Cancer Association of South Africa (CANSA) itsi kuyakhatsata kwekutsi tinsita letinyenti tekwelapha umdlavuta titfolakala emadolobheni lamakhulu. I Head of Advocacy ku-CANSA Zodwa Sithole utsi bangenelela ngekuchumana nesibhedlela nangabe batfola tikhalo letichamuka kutigulane letiphetfwe ngumdlavuta.

Umhlaba wonkhe namuhla uchushisa ngesifo sekopha lokungakhawuli, World Haemophilia Day. Bacwaningi betemphilo batsi lesifo sibanga kopha lokungancamuki ngoba ingati ingakhoni kwenta emahlwili. Sicocisene neMnumzane Nkosinathi Nkambule lophuma kulesinye setikhungo letelapha i-Haemophilia eErmelo.

Mengameli Cyril Ramaphosa uyachubeka nekutfumela Mcebisi Jonas njengesitfunywa lesikhetsekile kulaseMelika. Loku kuta ngemuva kwekuvela kwetitfombe letinyakatako letikhombisa Jonas achaza mengameli waseMelika Donald Trump njengemuntfu lonelubandlululo nalotondza titsandzani tebulili lobufanako. Kuva kutsi bosomabhizinisi bakuleli batsini ngalokucokwa kwaJonas, simeme mengameli weBlack Business Council, Umnumzane Gregory Mofokeng

 Litiko letebasebenti netekucasha kulesifundza se Mpumalanga lisukumise umkhankaso wekuvakashela imboni yema loli (Trucks) njengencenye yekucinisekisa kulandzelwa kwemigomo yetisebenti kulena mboni. Lelitiko litsi loku kuyincenye yekwetama nekugwema tingoti temgwaco letibangwa ngemaloli. ekahambe libanga lelidze ngaphandle kwekuphumula lekuyintfo lebeka labanye basebentisi bemgwaco engcupheni. Kuva kabanti ngalomkhankaso sikhulumisana na Provincial Chief Inspector and Enforcement kulo litiko letebasebenti nekucasha kulesiufndza, Umnumzane Boikie Mampuru