Lesincumo samengameli waseMelika Donald Trump sekwenyusa intsela yemali lebhadalwa imikhicito lengena eMelika siyachubeka nekutamatamisa timakethe temave emhlaba. Kulo leliviki Trump umemetele kutsi ukumisa ngetinsuku letingema-90 kukhuphula lentsela yakulamanye emave ngephandle kweChina layikhuphulele nga-125%. Sicocisana naProf Bonke Dumisa kutosichazela kabanti ngalendzaba yema-tariffs.

Inyonyana yetisebenti tamasipala i-South African Municipal Workers' Union , isemukele sincumo senkantolo yemtsetfosisekelo lesitsi incenye yemtsetfo  i-Municipal Systems Act  levimbela tisebenti kutsi tibambe tikhundla tepolitiki siphambene nemtsetfo sisekelo futsi asikho emtsetfweni . Lesincumo sita  ngemuva kwekutsi i-SAMWU iphikisane netigatjana letitsite kulomtsetfo i-iMunicipal Systems Act  lebetivimbela tisebenti tamasipala kutsi tiphatse tikhundla  letiyamene nepolitiki . Kukhuluma kabanti ngalesincumo simeme lisekela lesibili lemengameli weSAMWU, Portia Nkuna.

Inhlangano yemakhomanisi iSACP itsi ikhumbula imphilo yemholi wayo lowabulawa Chris Hani eminyakeni lengemashumi lamatsatfu nakubili leyengcile, ngelusizi ngoba ikholelwa ekutseni bulungiswa amange bugcinwe ikakhulukati ngekukhululwa ejele kwembulali wakhe Januz Waluz. Sikhulumisene namabhalane jikelele we-SACP kulesifundza seMpumalanga, Umnumzane Lucky Mbuyane

Indvuna yelitiko letekuhwebelana netimboni Parks Tau nendvuna yelitiko letekutfutfukiswa kwemabhizinisini lasasemancane asemalokishini, Stella Ndabeni betfule ngalokusemtsetfweni sikhwama semali lengu R500 million yekwesekela emabhizinisi lamancane. Kukhuluma ngalendzaba sicele uMnu Sakhile Madonsela lovela enhlanganweni i-Food 4 Nation Foundation. 

Litiko letemaphoyisa kuvelonkhe litamukele tiphakamiso takamuva  letentiwe likomiti letemaphoyisa ephalamende leliphakamise kutsi kwentiwe luphenyo nge-forensic laboratory emaphoyisa. Kunemibiko letsi kunekubambeleleka kwekukhishwa kwemiphumela yeluhlolo lweDNA lolutsintsa emacala lasenkantolo labalelwa ku-140 thousand. Kukhuluba kabanti ngalendzaba sicocisana na Brigadier Fikile Hlalela lophuka ku-Forensic Laboratory emaphoyiseni.

Litiko letemisebenti yesive, imigwaco kanye netekutfutsa kulesifundza seMpumalanga litsi limatasatasa lilungisa letinkinga letibange kwabambeleleka kubhadalwa kwabanikati betimoti letitfutsa bafundzi naabaya noma babuya sikolweni (scholar transport). Kuyiva kahle lendzaba simeme lokhulumela lelitiko, Umnumzane Bongani Dlamini.

Mengameli Cyril Ramaphosa utsi ubalulekile lomgomo lotsi bulungiswa kufanele bubonakale bentiwa kuze kuliwe nabudlova lobeyamenennetebulili kanye nekubulawa kwebantfu labasikati. Ramaphosa bekakhuluma kulenkomfa yelishumi nesikhombisa yemaJaji abomake iBiennial Conference of the International Association of Women Judges (IAWJ) lebanjelwe eeKapa ngaphansi kwesicubulo lesitsi " Resilience: Women in leadership to End Gender Based Violence and Femicide.  Sicocisana ne-Senior Researcher ku-Democratic Governance and Rights Unit e-UCT Law Faculty, Zikhona Ndlebe

Isongwa namuhla ingcungcutsele ye- African Peer Review Mechanism (APRM), lekungumtimba lowasungulelwa kubuka kucobelana ngelwati lekuhola, kubuka tindlela tekusombulula tinkinga letikhungetse i-Africa, kuletsa kutinta kutepolitiki kanye nekufukulwa kwemnotfo. Kukhuluma ngebumcoka bayo le-APRM sicocisana nemhlatiyi wepolitiki yemave ase-Africa, Advocate Sipho Mantula.

 Kuyacala namuhla kusebente kwentsela lebhadaliswa imikhicito lengena eMelika kulandzela kumemetela kwemengameli Donald Trump ngekwenyusa letindleko. Kantsi ke takamuva ne China seyivakalise kutsi itayenyusa nga-84% intsela lebhadaliswa imikhicito yaseMelika letfunyelwa eChina.  Kuyibuka lendzaba asemukele sati setindzaba temnotfo Umnumzane Owen Nkomo lovela kusikhungo Inkunzi Wealth Group

Lisekela lendvuna letemfundvo kumabanga laphakeme nekuceceshwa Dr Mimmy Gondwe utsi kumcoka kutsi emakolishi etemfundvo ema-TVET asebentisane netimboni tangasese kuze bafundzi batotfola litfuba lekufundza ngekwenta.