Labo labanenshisakalo yekufuna kuba balingisi bayamenywa kutsi batawuholanganyela kuma-auditions lahlelwe yinkapani i-Dlambili Production. Sibite yena umnikati walenkapani iDlambili Production lophindze abe ngumbhali wemafilimu, Kate Masilela.

Umcondzisi weVoice of America utsatsele tinyatselo temtsetfo tikhulu tahulumende wamengameli wasemelika Donald Trump ngemitamo yekuvala lenkapani yabetindzaba. Loku kulandzela simemetelo samengameli Donald Trump ngasekucaleni kwalenyanga nakatsi akuvalwe lenkapani nekutsi tisebenti talenkapani atitsatse likhefu emsebentini kantsi labo lebangasebenti ngalokugcwele bona bamisiwe emsebentini..Simeme Umnuzane Hopewell Hadebe lovela ku-SANEF kutocca ngaloludzaba.

Namuhla sicubungula libhuku lelibhalwe nguThandeka Mtsweni, lelinesihloko lesitsi 'The  Broken Soul'. 

Indzaba yabosomabhizinisi labacekela phansi takhiwoncanti temanti kuze batohlomula nangabe emanti angasafiki ebantfwini, ivelile ngalesikhatsi mengameli Cyril Ramaphosa etfula inkhulumo yekuvula inkomfa yemanti lltsetse emalanga lamabili eJozi. Sikhulumisana nelisekela lendvuna yetemanti netekuhlanteka, David Mahlobo.

Sekusungulwe ngalokusemtsetfweni umtimba lekutsiwa utawubukelela tindzawo letihlalisa bafundzi lobitwa nge-National Association for Student Accomodation Transformation (NASAT). Lomtimba kubikwa kutsi utawucinisekisa kutsi bafundzi batfola tindzawo tekuhlala letiphephile njengoba utawusebentisana naletinye tinhlangano letimele banikati betindzawo letihlalisa bafundzi. Lotasichazela kabanti ngalomtimba ngumabhalane wayo i-NASAT, Amos Mdluli.

Belubanjwe namuhla lilanga lekucwashisa ngesifo sesifuba iTB, kulesifundza seMpumalanga. Simeme umphatsiwa welitiko letemphilo eMpumalanga, Sasekani Manzini.

 Inhlanbgano yelusha letibita ngeYouth of Mbombela beyihlangene namuhla kutewubika kutsi bahambe kangakanani ngekukhulumisana kwabo neUniversity of Mpumalanga. Ngaphambhilini lenhlangano yamashela kulenyuvesi iyokhala ngekutsi bafuna kucashwa nabo kulemisebenti levuleka kulenyunivesi. Kutfola takamuva sikhulumisana nalomunye webaholi bale Youth of Mbombela, Thapelo Magagula.

Likomiti lemcebo lombiwa phansi ephalamende litsi likhatsatekile ngemagalashi etimoto latsengisa i-diesel ne-petrol lengcolile. Luphenyo lwalekomiti lutfole kutsi manyenti emagalashi latsengisa emafutsa etimoti langakalungeli kutsi angatselwa etimotini ngoba anebungoti lobutsite. Sicocisene nasihlalo walelikomiti Mikateko Mahlaule

Bekubanjwe umhlanganosifundvo wekuhlonipha loyi lowake waba nguNdvunankhulu wesabelo besatiwa ngeKaNgwane ngesikhatsi sahulumende welubandlululo, Umnumzane Enos Mabuza. Mabuza wadlala inzima lebaluleke kakhulu enkululekweni yebantfu balelive ikakhulu balendzawo yanganeno beyatiwa ngaphambhilini ngeEastern Transvaal lesekusifundza seMpumalanga. Lowetfule lenkhulumosifundvo bekulisekela lendvuna yetemfundvo lesisekelo, Dr Reginah Mhaule. 

Sikhungo lesitsatsisa emalayisensi ekushayela timoti lesingaphansi kwamasipala weThembhisile Hani sesitawungena ngaphansi kwelitiko letekuphepha kwemphakatsi, kuvikeleka nekuchumana kulesifundza seMpumalanga. Loku kuta ngemuva kwesincumo sekutsi tonke tindzawo letitsatsisa emalayisensi ekushayela tifakwe ngaphansi kwalelitiko.. Sicocisana nalokhulumela lelitiko kulesifundza Moeti Mmusi.