靈異丨香港02

小紅帽遇到過唔少鬼，不過都係啲人畜無害嘅，周圍行過路過，你唔理佢哋，佢哋都懶得理你。最多就係打招呼，望吓我，或者同我講幾句，斷斷唔會諗住傷害人。佢哋生前都只係普通人，自然原因死亡，所以冇咩怨念，仲留喺呢個世界上，都係愛與和平，齊唱We are the world。相反，我遇到過二戰時期嘅日本兵，每一個都極具攻勢性，甚至係獸性，望下佢哋都隨時「掹槍」，每日仲係以打人殺人為樂。所以，見親佢哋都好討厭，我成日咒罵佢哋，想佢哋繼續虛妄，繼續沉淪阿鼻地獄。

無論係中港台三地，喺街上，郊外，或者一啲重要或歷史設施，都見到日本兵係度，有時候係單人，好多時都係連群結隊，唔係咩稀奇事。佢哋外表好易認，身上永遠仲係着住嗰套茶黃色軍服，托住支長槍。之前幾次見過佢哋喺街度行軍，有次見佢哋喺太空館打啲途人，有次見喺郊外追殺啲「平民鬼」。佢哋死後個樣仍然兇悍，雙眼血紅色，面目猙獰，行動近乎瘋狂，係咁叫囂同埋傻笑，成班顛晒咁樣，近乎瘋狂精神狀態。個種殘忍，直頭好似野獸一樣，sorry呢個我講錯，佢哋真係連獸類都不如。呢啲就係我對死鬼日本兵嘅客觀描述，一啲都無加鹽加醋。

講返今日嘅內容，事發地點係香港嘅彌敦道。嗰度係旺角段，六條行車線，車水馬龍；紅綠燈前，永遠人多到密密麻麻。喺咁繁忙嘅地方，大家點會諗到，原來成日有班日本兵，喺馬路來回咁行軍。我曾經見佢哋喺尖沙咀出發，以步操形式行到咗敦；又見過佢哋喺行到油麻地，突然走入去橫街打巷戰。今日，講嘅係喺旺角對開馬路，今次又見佢哋出動幾百人，場面比之前浩大。

我個晚好夜放工，行過惠豐中心對開，個陣時未有疫情，無人帶口罩。夜晚周圍啲霓虹燈照喺人嘅面上，五彩繽紛；但係照喺班日本兵上面，卻暗淡無光。佢哋個晚人多到，企滿晒來回行車線，我數下人流，可能有幾百個兵。「鬼未見，聲先到」，開始嘅時候，我係先聽到一輪清晰嘅日語，大聲係度叫口令，然後幾百個日本兵就迅速集合。大約10秒後，幾百人喺香港鬧市一齊嗌︰「banzai，banzai，banzai」意思係「萬歲」，或者係「天皇陛下萬歲」。當然了，成街人，係得我一個人聽到同見到。兩個平行時空，日本兵有佢哋嗌，行人繼續行街shopping，真係現實版嘅戰爭與和平，同共存空間。

老實講，呢班「鬼子兵」真係有紀律意識，令行禁上，完全聽前面個幾個施令兵叫口號同吹哨子。前面有一個騎馬嘅，應該係大軍官，手上攞住軍刀，腳夾住馬，口中不停「嘰哩咕嚕」，大意係宣講緊一啲作戰計劃同目標，講唔夠幾句，就叫一次banzai，振奮一下士氣。後面個班兵，全部就咁睇，個個皮黃骨瘦，雙目無神，好似喪屍咁企喺度。但當聽到前面「萬歲」，佢哋成班即刻著晒燈，打咗興奮劑咁，幾百人一齊舉起雙手，係咁跟住叫。

有個類似下級軍官嘅日本兵，企得同我比較接近，我睇得好清楚個樣。佢五短身材，大約160 cm高，頭戴黃色野戰版軍帽，側邊冇咗兩塊布。帶着一副圓形眼鏡，留咗日本人最鍾意嘅「希特拉」式小鬍鬚。着住泥黃色日本夏季軍服，雙腳有綁帶，腰側邊掛手槍，子彈袋同刺刀套。佢手握著把軍刀，大約半個人咁長。日本軍官當時係見到我嘅，大家四目交投，但睇佢個樣，只好好奇咗一陣，好快又投入返行軍嘅工作。

佢身後嘅日本兵，全部都穿著茶褐色嘅陳舊軍服，皮帶斜掛住胸前連住腰帶，頭上戴住土色圓鋼盔或者布軍帽。手上拎住三八式步槍，有部份仲上埋刺刀。雖然我係十米之外睇，仍然見到刀鋒上隱隱有血跡。中間一排，明顯同前面唔同，佢哋著晒禦寒大衣同戴皮帽，仲戴埋手套，佢哋呢班唔係個個有槍，有啲只係得刺刀，有啲仲係赤手空拳。最後面個幾排日軍，用衣衫襤褸來形容，直情乞兒咁款。身上衫破破爛爛，有啲連隻袖都冇埋，腰帶更久奉。用污糟邋遢嘅布來纏腳，赤腳咁企起馬路。呢班兵普通身型都矮，瘦到連新馬仔祥哥都大隻過佢哋。有啲仲離譜，屬老弱殘兵部隊，唔係斷手就係跛腳。有一個最勁，得返半邊頭同面，單眼死魚咁望住前面。我當時心諗，佢哋係咪死後至俾人臨時拉夫來集合？亦或係戰鬥到個個一岩一窟？真係唔知。佢哋明顯無最前面個班咁精神爽利，成班聽住指令都目無表情，轉身同向前行又慢，每行一步成幾秒鐘，動作又好唔自然，似機械人咁生硬。

講返大環境。一方面，彌敦道咁多車，6條行車線，無數嘅巴士同私家車駛過；另一方面，佢哋喺度擺陣，方隊及檢閱台就設喺路中心。陣仗唔細，又操練，又檢閱，仲要佢哋前後左右轉，盛況同年初二嘅花車巡遊唔差太遠。人車放埋一齊，實有衝突。日本兵隊被無數嘅大細車輪撞到同輾過。不過有趣嘅係，細車對佢哋冇咩影響，可能係因為私家車體量小，撞上方隊都唔見有咩反應；相反大車就唔同，當巴士撞上去嘅時候，好似刮起一陣大風咁，成隊兵都郁晒，好多士兵仲吹到跌晒落地咁。不過始終佢哋係靈，好快又起返身，拍吓身上嘅灰，又當冇事咁。

我當時真係有啲幸災樂禍嘅心態，好想大貨車同泥頭車過來，將佢哋好似保齡球咁撞到一仆一碌。唔知係咪我嘅心聲俾佢哋聽到，亦或係我喜形於色，竟然有兩個外圍守護嘅日本兵發現咗我，跟手行埋來。佢哋兩個係普通嘅士兵裝束，一個戴鋼盔，一個戴帽。兩個都有長槍在手，仲上埋刺刀。我當時原來企喺路邊等巴士，見到佢哋兇神惡煞，來者不善，即刻轉身入咗去附近一個舊式嘅商廈。佢兩個見我走，即刻加快腳步，雞咁腳咁跟咗入來。佢哋係咁叫：「バカ baka！」。好彩我有縮骨遮喺手，先有武器抵抗。兩人一前一後，一個喺入口唔夠兩米嘅地方停咗，舉槍瞄準我；另一個夠狼死，唔理三七二十一，一埋牙就刺。我臨危不亂，以遮係咁擋。開始嘅時候，我一啲都唔輸蝕，可謂旗鼓相當。但佢始終係專業殺人機器，訓練有素，好幾次我都失手被刺中。佢陰濕到專登瞄準個頭來拮。雖然我當場冇明顯受傷，但被刺中嘅地方，之後都會有幾日酸痛。佢拮多我幾下，都始終唔見受傷，開始驚起上來。一輪日文亂叫，大意係話「妖魔鬼怪」。我心諗，你個PK惡鬼先告狀。

外面嘅日本兵，見到勢色唔對，叫橫刺嘅日本兵避開，「砰砰」兩聲，連開兩槍。槍管冒煙，suppose我應該係中彈身亡。佢兩個等咗一陣，見我毫髮無損，仲笑笑口咁，先知道奈我唔何。戰鬥暫時停止，僵持局面。同一時間，馬路上嘅方陣仍然向前，而外面沿路有幾個行人經過，直接行穿過佢哋嘅身體。日本兵唔知道點算，拮又唔係，走又唔係，有啲手足無措。突然，哨聲響起，馬路上一個日軍官咗跑咗過來，又係「baka，baka」咁鬧個兩個兵。佢哋無得唔放棄，頭耷耷咁跟住軍官行返出去。之後我目送方隊步操往太子方向，兩個日本兵，仲不時回頭咁搵我…仲想報仇…

戰爭嘅時候，人性變成獸性，甚至比野獸仲兇惡。呢班日本兵，做咗鬼之後，都仲係繼續佢哋惡鬼嘅本性。希望佢哋沉淪阿鼻地獄，無休無止地從死而復生、生而又復死地受苦。

(專欄從2007年至今)

#靈異 #都市傳說 #鬼故事 #小紅帽 #偷渡客

有人喺窿度探頭出嚟，不過唔係朱向深，而係個細路仔，估計大約10歲左右。佢一見到我，就「呀」一聲，好似見鬼咁，係咁嗌︰「公安嚟啦，公安嚟啦」。佢係咁走，係咁繞住附近跑，跑圈咁跑，但始終冇離開。跑咗大約半分鐘，佢突然間成個人撞咗落棵樹度，之後就消失咗。我望望少英，佢一啲都唔驚奇，好鎮定繼續傾計。咦…莫非佢見唔到個細路？ＯＫ，我又要習慣大家嘅視覺頻道唔同。少英終於忍唔住，要入去搵佢男朋友，叫我無講論點樣，都要等埋佢出嚟，然後就「猝一聲」爬咗入去。其實以佢地兩個身高，起碼170 cm，我見個窿咁窄，小朋友入去都有困難。彎身去睇下個窿，「頂佢個肺」成個窿到盡頭只係有3呎長，而且係密封嘅……OK，我繼續等佢地出返嚟。

又過咗一陣，我聽到有把女聲喘晒氣咁，慢慢從裡面爬出嚟。今次係另一個女仔，紮咗對孖辮，我叫佢孖辮妹。佢着住半件恤衫，半條黑色長褲。點解半件？係因為佢成套衫褲，好似俾人剪爛晒咁。不過都唔係重點，佢瓹出嚟嘅時候，真係嚇咗我一跳。佢塊面腫到好似成個發霉嘅發水麵包咁，輪廓都已經睇唔到，只係約莫分到眼耳口鼻。孖辮妹出嚟見到我，好似見到親人咁開心，係咁搭住我膊頭係咁跳。我個下有啲唔開心，因為我知道佢之前點樣死法。佢又係話有電話號碼，又話要等家姐出嚟，想我幫佢哋打俾市區住嘅親戚。孖辮妹叫小桃，家姐叫小梅。父母喺國內運動嘅時候，已經捉咗去坐監好耐，屋企只係得返四幅牆。住嘅地方附近有個惡霸，睇中咗孖辮妹，想打佢主意。所以兩姊妹冇辦法之下，先至跟人去咗東莞，留咗半年先至游水到香港。小桃話我聽，其實佢咩都唔識，一切都靠小梅。佢地喺廣州事先用咗幾個月時間，先搵齊指南針、乾糧、膠袋、膠鞋同埋波膽。佢講開波膽嘅時候，特別感恩，因為全靠佢先嚟到香港。因為佢本身水性差，一有時間就去練習，當時好多人練習游水，全部都想偷渡。到咗落水個晚，佢家姐怕佢游唔惦，用條繩將兩人綁埋在一齊，兩姊妹要共同進退，生死與共。

佢繼續口述當晚嘅情況︰「喺大鵬灣出發，我仲好記得天黑先落水，個月光好圓，雖然夜晚11點成個海好黑，但都仲有啲光。我家姐其實游得比我快，所以我好驚，好驚游游下走失咗，之後搵唔返，好彩有條繩綁住。」根據佢講，游咗大約3個鐘頭之後，佢地覺得好凍，全身越嚟越冇力，但知道喺海中心唔停得。佢繼續講︰「我仲係咁搏命游，突然之間，我發覺我姐姐停咗落嚟，跟住我就俾佢扯埋落水，不過好彩我掙扎，之後醒返就已經上咗岸，喺咗呢度。好彩…真係𢴇返條命」聽到呢度，我已經估到，因為呢條繩最後令兩姊妹葬身大海。不過當時孖辮妹仲未知自己過身，我當然亦唔會同佢講，之後到輪迴時候，佢自然明白。

後來我查返資料，大鵬灣同後海灣相比，海面更寬，水更深，風浪更大，水流更急。個度真係浸死好多人。尤其係黑夜大浪中，淨係靠香港岸邊嘅微弱燈光為目標。一個浪頭打埋去，好多人沉落去，之後幾經掙扎先浮返上嚟，不過已經迷失咗方向，喺個海度亂咁游，最後體力耗盡而葬身大海。

望望天色，已經到黃昏，再唔走我就趕唔到車。但係望住佢，我又唔忍心就咁抌低佢。一個人一輩子嘅願望，我都想幫，就算係扮野，我都想做得似啲。再過咗一陣，有一個男人喺個窿到瓹出嚟。我一睇，就係朱向深。佢見到我同孖辮妹一齊，即刻成個人著晒，醋意大發，話孖辮妹點解同個陌生男人一齊。咦…佢真係盲，定係有病啊，我明明係女人，同埋頭先先見過，點會係陌生人呀。咦…等等我心諗，佢唔係少英個男朋友咩？點知佢轉頭，真係嗌孖辮妹做少英，oh my god! 真係好亂。不過未等我搞清楚，朱向深好似癲咗咁，喺個褲袋度攞咗把刀出嚟，作勢要插我。我真係火都嚟埋，心裡忍唔住ＸＹＺ，心諗「頂你個肺，成班痴線㗎」。雖然唔怕俾佢插，因為根本傷唔到我。不過我唔想再同佢地癲了，即刻走人算。講唔定，一陣個窿再瓹多啲出嚟，到時候就收唔到科。

當時個天已經黑晒，我獨自，開埋頭燈，連跑帶跳，總算撇甩咗佢地。行到去個石堆小平台，前面有個水氹，積滿晒水，可能係早幾日落雨關係。我行過嘅時候，下意識望咗一眼，點知唔望猶至可，一望嚇死我，喺頭燈光下，個氹啲水裡面，我見到孖辮妹同個女仔一齊，兩隻手綁住仔條繩，喺水裡面抬頭望住我…

後記︰我知道喺偷渡潮嘅時候，好多邊境原居民會誘捕或捉呢啲「偷渡客」，然後困起來，再問佢哋攞電話，打俾親戚，要佢哋嚟贖。當時曾經發生過幾單命案，唔係啲人蛇死，就係啲原居民。亦有套電影，講返當時嘅情節，個名叫「打蛇」。

#靈異 #都市傳說 #鬼故事 #小紅帽 #偷渡客

唔知大家知唔知道幾十年前，香港曾經有個政策叫「抵壘政策」，專門用嚟處理60至70年代，由大陸到香港嘅非法入境者，即係偷渡客。抵壘係棒球運動嘅述語，即係當球員及時抵壘，就唔需要出局。顧名思義，偷渡客如果成功扺達市區，就可以留喺香港。相反，如果喺新界或邊境地區不幸被截獲，就會被遣返內地。早排我喺報紙睇到美國邊境嘅偷渡客，令我諗返起N年前喺新界遇到60年代嘅「朋友」，佢地講返自己嘅恐怖故事。

當年同朋友行山，目的地係新界邊境地區，話嗰度勝在少人去，唔使成日撞見「發哥」。成班人行咗2、3個山頭，都係以車路為主。不過開始無幾耐，已經有人話之前唔夠瞓，頂唔住，要休息陣。尤其同行嘅四眼仔，平日聲大大話自己參加毅行者，但係就不斷話腰酸背痛同埋腳軟。所以我自己決定唔等啦，提早結束行程，離開大隊，原路折返。其實我仲有啲唔講得嘅原因……之前一齊行山，我遇到啲「污糟野」。有對眼，藏身喺唔同嘅草叢裡面，望到我實一實。再行多陣，竟然喺前面地面，又見到對眼，係咁望上嚟。有咗呢啲前科，我知道今日必定會撞到野，點知好嘅唔靈，醜嘅靈，早走都避唔到，都係俾我見到「靈」。

大約獨自行咗半個鐘，大約下午5點左右，個天已經黑咗一截。行下行下，經過一間石屋，我隱約覺得唔妥，等等，呢度點解會有屋嘅？頭先嚟嘅時候明明係空地…我當時膽粗粗咁行埋去睇，間屋好奇怪，外面環境好荒涼，生滿晒半個人咁高嘅野草。但喺窗口偷望入去，裡面嘅擺設又似有人住緊咁。個廳有碌架床，木枱，同兩張藤椅，擺碗嘅木櫃同上面有兩張黑白相。我仔細咁睇，個單門白色樂聲雪櫃上面，仲有兩個紅色嘅鋁製熱水壺。當時感覺直情係去咗香港故事館。另一隻窗應該喺房，我行埋去再八掛，淺色嘅窗簾拉到實一實，不過我睇到上面條罅，滲透住黃色燈泡暗光，相信有人喺裡面。我開始心寒，呢度荒山野嶺，點會無啦啦有間屋喺到，而且頭先成班人嚟嘅時候，點解留意唔到嘅。我心諗：死啦，當睇唔到，快啲走人算啦。

點知行唔到兩步，間屋突然有3個人衝出嚟，一睇就知道，前面兩個係偷渡客，因為同我以前睇啲戲嘅形象一模一樣。一男一女，第一個跳出嚟嚇我嘅係個四眼仔。佢頭髮蓬鬆，面上有幾道血斑，膊頭仲有血跡。佢個髮型，仲係以前嘅三七分界。着住件喺以前粵語殘片裡面，鄧寄塵同新馬仔最鍾意着嘅底衫。佢副眼鏡幾得意，只有一邊有鏡片，另一邊無。再睇真啲，冇鏡片個邊隻眼瘀到好似熊貓咁。正面睇，佢身上好似冇咩傷痕，但當佢轉身嘅時候，先發現佢後腦插着一條斷咗嘅木條。而同場另一個女仔，身穿白色格仔長袖恤衫，深色長褲同白飯魚鞋。佢嘅特色係紮咗一條好長嘅辮，長到差唔多去到腰咁滯。瓜子臉，大眼，身材瘦削。初時睇唔到佢有咩表面傷痕，後來先發現，原來佢條頸位置有好深色嘅勒痕。同埋佢行起路上嚟，一柺一柺。最後出嚟嘅係一個地中海中年肥佬，同樣著住白色背心，黑色唐裝外套，不過就溶溶爛爛。最觸目嘅係手上金錶，估計係靚野。佢地3個前後由屋裡面衝出嚟，目標原來唔係我，應該咁講，佢地係直情睇唔到我。年青男女係　running man，而中年肥佬喺後面想捉人。肥佬邊跑邊𢴇起側邊嘅竹昇，係咁叫︰「你地走唔X到㗎，俾我捉到你地，同我除晒啲衫去。」三個靈係間屋附近追逐，好幾次差啲捉到個長辮妹，但都俾佢快步避開。正當我睇到眼花繚亂嘅時候，裡面竟然出現第四個人，係一個上身半裸嘅女仔，而且手上有把較剪。佢衝出來嘅時候，粒聲都無，趁肥佬跑緊嘅時候，直接拮落去佢後腦。肥佬聲都唔聲，大字型咁跌落地下。個半裸女仔勉強行咗幾步，亦都成個跌埋落地，估計都死咗。突然由驚慓片，失驚無神轉為恐怖片，雖然知道自己喺靈嘅世界，但都一時之間唔知點反應。奇怪嘅係，一男一女睇嚟唔知道發生現場命案，仍然喺度 running man，仲要時不時回頭俾反應，好似仲俾肥佬追緊咁。成個duma大約維持咗1分鐘，我慢慢離開現場，想乘機走人。呢個時候，走佬男女突然好似滴咗眼藥水咁見到我，飛奔過嚟，仲叫我同佢地一齊跑，話肥佬過緊嚟，教我跑側邊出路。

老實講，我真唔知點解要走，不過俾人夾住無辦法。停低落嚟之後，我地３個你眼望我眼。個女仔應該係知青，講野好有禮貌︰「唔好意思，我叫少英，啱啱嚟到香港。請問你可唔可以俾啲野我哋食，已經餓咗好耐。」靈都要食野，我知嘅。所以我喺背囊度攞咗早上買嘅麵包，一件糯米卷，一包細薯片，再加支寶礦力。我慢慢放低食物，然後退後幾步，做出「請」既手勢。佢哋馬上雙眼發光，趴喺地下開餐。喺我眼中，佢哋將「空氣」就咁拎起再倒入個口，地下嘅食物仍原封不動，根本無郁過。唔好睇我攞得咁少野出嚟，佢地兩個「狼吞虎嚥」，都食咗差唔多10分鐘。少英用手袖抹下嘴，唔好意思咁望下我，意思問我仲有無。我開埋個背包俾佢睇，真係清袋。佢向我雙手合十感謝，跟手介紹埋佢男朋友朱向深我識。朱向深個人好深沉，只係點點頭，聲都唔聲。少英亦同時喺個褲袋度，剿咗張紙出嚟，成張紙皺到阿媽都唔認得。朱向深見女友想問野，馬上打眼色阻止，然後拉埋一邊講：「叫咗你唔好講，唔好講啊，個電話唔俾得佢㗎，俾佢知道咗，阿叔無錢嚟救我地㗎喇。」少英有啲遲疑，點頭同意，然後細細聲咁同我講：「呢位同志，請問點樣行返出去，我地俾人捉咗嚟呢度已經有成個星期，班衰人應該死晒喇。」

我估佢地應該仍然活喺自己世界，唔係走難，就一定係偷渡。我心諗，睇佢地嘅裝束，同講野嘅口吻，似係60、70年代嘅同胞。此地不宜久留，我連野食都唔要，轉身想走。朱向深一手攔住我話︰「唔好俾佢走，佢去叫人，我地呢鋪死緊。」當時我真係唔知點反應，心裡面都嬲嬲豬，想直接當佢透明。(其實佢真係透明) 不過行到佢面前，見到佢眼紅晒，成面都係血痕，始終有少少怯。尤其當時個天開始暗，周圍啲風越嚟越大，荒郊野外，都係唔好發圍，寧願安撫下佢。

我講：「你唔使驚，而家冇人捉㗎啦，我又唔係警察。」佢上下望下我，有啲半信半疑，再轉頭望向少英。過咗一陣，少英再喺個袋度剿返張紙出嚟，然後兩個人吱吱斟。我就似人質咁企起到，等待發落。轉頭少英笑笑口咁講：「同志，你不如幫吓我哋，打個電話，我哋想知道我阿叔個地址，我哋想出市區。」

原來係寫好嘅地址，已經俾汗水浸到花晒。正當我攞個手機，準備配合扮打電話嘅時候，突然聽到有人嗌救命，好淒厲。依對情侶即刻沿着側邊嘅小路衝過去，我亦只好跟住去。又行咗幾分鐘，過咗石澗，到達一個小平台，撥開草叢，竟然有個洞口，心諗真係別有洞天。不過事後回想，個洞口可能係幻覺，未必係真野。

其實講話洞口有啲唔妥，行埋去睇，先知道係個窿。窿嘅尺寸啱啱夠一個人爬入去。佢兩個好似熟晒地形，二話不說就爬入去。我當然企喺出面等，裡面估計唔係人就係蛇，或者人蛇。少英好快出返嚟，話搵唔到佢朋友，之後我地兩個就一齊坐係舊石度等朱向深。言談間小英好開心，因為終於搵到個人幫佢。佢話係度已經有10日，每日好多人經過，有老有嫩，不過都好似當佢哋透明。我問：「你哋嚟咗10日？」我有無聽錯，仲問佢哋今年係幾年幾日，少英喺個褲袋度攞張紙出嚟，上面寫住1969年3月11日，由廣東惠州出發。果然，大家係平行時空。OK，我而家要將自己代入返去以前嘅年代同佢哋相處。

當問到佢哋點樣偷渡，少英就好興奮咁回憶起上嚟︰「其實我哋都唔想走，不過向深屋企因為有外國親戚，已經冇辦法唔走。所以我哋一齊12月出發，喺北方用盡辦法走到去南方，又坐車又行路。其實今次已經係我哋第三次。我們已經用咗兩年時間，經歷咗２次失敗，嘗試咗３條路線，今次先至成功嚟到香港。我哋準備充足，有幾斤餅乾同米粉，由惠州行路去龍崗。日頭繞住山路行，唔敢行大路，因為怕有人捉。夜晚黑晒天跑上山，日頭喺草叢瞓。話你聽，草叢啲蚊多到好似舊雲咁，痕到入心。我哋出發個日，成日落雨，件衫濕咗又乾，乾咗又濕。每日隨便食啲乾糧，都食唔飽，最後食到無晒。前幾晚遇到民兵，有幾個同行嘅朋友俾佢哋捉咗，我哋一路跑落河匿埋，先走得甩。行咗一星期，先至到達香港。」當我正想問下剛才個肥佬係咩事，又有怪事發生……

下回繼續

#靈異 #都市傳說#鬼故事#小紅帽#偷渡客

又有位H先生，同佢老婆去台灣度蜜月，入住一間鄉鎮嘅小酒店，樓高只有3層，入住房間306。夜晚8點幾，H太太坐係床度玩手機，H就剛剛沖完涼出來。突然，門響起叮噹，H係防盜眼睇，外面咩人都冇。開門，兩邊都冇影，心諗邊個玩野。過咗一陣，都係小心D，直接打去大堂搵人上來睇睇。大堂經理答應轉頭搵人處理。電話講完仲剛放低，門鐘又響。H同老婆一齊企埋門口，防盜眼一睇，又係冇野。佢今次伏低睇下門隙，發現有對腳，黑色高踭鞋，對腳好肥。佢馬上叫老婆行開，數三下，再打開門…外面冇人。H口震震，同佢老婆講︰「頭先..有對腳..係度。」兩公婆面都青埋，慢慢好細力咁閂埋度門，再唔敢郁，一直企係個門口成分鐘，一直等，都再冇聲響。H再打電話去大堂，問點解仲唔叫人上來睇。個經理話已經搵咗個同事上306，仲有個女人應門。H聽到之後，成個人飆冷汗，即刻兩公婆用5分鐘時間，打包所有野，行樓梯直奔大堂。佢搵到之前去拍門既房務，個房務話︰「個女人只係開咗半扇門，著黑色TEE，踩住高踭鞋，睇個樣無咩特別，由此至終都無講野。不過佢突然諗返起，間房冇著燈，但係有D光係後面閃下閃下，隱約見到有個細路坐係地下。」H先生同佢老婆成晚就瞓喺大堂，第二朝直接返香港。

除咗酒店，有人係酒吧廁所都遇到過。P小姐有晚同朋友去尖沙咀飲野，突然肚痛，去咗有3格嘅女廁。佢個人比較小心，行入去嘅時候，先確定環境是否安全。頭個2格廁所都打開，冇人係度，佢就直入咗第3格。正當佢享受緊寂靜空間帶來快感嘅時候，突然聽到隔離廁格有動靜。廁板好似被人拎起、又放低；再拎起、又放低..不停重複，每個動作相隔1秒，並且好有規律。佢好肯定佢入來之後，再冇聽到有人開鎖入來，所以心諗邊個係度玩野？邊個又可以入到來玩？隔離玩廁板嘅聲仍然繼續，佢個心跳得愈來愈快。佢slow motion咁探低個頭，從下方嘅門隙去睇。兩個廁格，一個人都冇，半隻腳都睇唔到。之後佢坐返起身，唔敢郁住。半分鐘，廁板嘅開合怪聲又響起，而且規律一D都冇變，打開；合上打開。突然，有女人喊，由隔離廁格傳來，喊到仲上氣唔接下氣咁。不過喊聲只係咗持續半分鐘，突然成個世界又靜晒。P小姐原已經嚇到想一齊喊，但最後都係自救要緊。佢終於鼓起成世人最大嘅勇氣，慢慢打開門，慢慢行，咪埋2/3嘅眼，成咩到睇唔到。當佢經過第2格嘅時候，偷偷望咗一眼，裡面的確鬼影都冇隻，佢先放半個心，再抖佐啖氣繼續行。經過第一格，佢又好小心咁，擰佐1/4頭，瞄咗裡面一眼。今次大穫，有個著住花裙既女鬼，成塊面爛晒，前胸仲插住把刀。坐係個廁所，雙眼紅到蕃茄咁，當時直線咁望住P小姐。P小姐而家諗返，仲記得嗰時佢嘅眼神，佢自己講︰「望住我，一D表情都冇，又唔嬲，又唔笑。」之後P小姐爬著咁離開廁所，係過程裡面，佢一直唔敢開眼，一直唔敢抖氣，最後佢出來先感覺到痛，原來個背脊被人用指甲劃傷晒…..

最後一件「真鬼真事」，有關一對夫妻，佢地姓K。佢新居入伙，開開心心。入住3個月，咩事都冇發生，平安過蘋果。直到第4個月，佢地先至發現怪事。原來一直有同屋主，而且仲係有6個。K同我講︰「個晚我老婆先入房瞓，我係度睇波到2點幾，但個人一D都唔攰。之後熄好燈同電視先入房。當我打開門嘅時候，隱約睇到床對住嘅窗簾郁咗一下，但我肯定窗戶當時係閂咗，唔係被風吹起嘅。我行埋去睇，約3呎嘅距離，我先睇清楚，窗簾下面幾對腳，好似一排人咁企係窗簾後面。嘩，我當時嚇到叫咗出來，跟著我老婆都被我嚇醒咗，馬上開床頭燈，問發生咩事，係咪有賊。我指住個窗簾話後面有人，佢起身好嬲咁行埋去睇，鬼影都冇，嬲到火起，仲起勢咁鬧我發雞盲。，罸我唔準睇波成個月。」的確，真係過咗一排，相安無事，K先生當個日真係自己睇錯，冇擺年事係心。但過咗冇幾耐，佢又突然夜晚係幅牆度，見到幾個人嘅頭輪廓，有眼有口有鼻。但捽下眼，又發現冇咗。不過從此以後，成間屋開始唔對勁。燈成日自己著，電視畫面又不時跳，仲有怪聲係幅牆到傳出來，成日好似有人講野咁，仲係咁嘈交。直至到有一日，佢同老婆夜晚返屋企，先發現書房面企咗個人，背對著佢地，仲同佢老婆講︰「你地返來了。」之後係個廳，同時出現咗5隻鬼，全部血淋淋，望住佢地係咁傻笑。

今晚K先生同我講完呢件事，飲咗啖熱茶，轉身拎起個腰包要走。個時我先發現，原來佢都冇腳…。

今日我要講嘅係一D我聽返嚟嘅真人真事，都係被鬼騷擾，鬼整蠱。有人從此唔敢一個人住酒店，有人甚至連屋企都唔敢返。

而我地故事嘅主角，係一位退休救護員。以下係佢嘅自述…

救護員年輕嘅時候，駐守喺機場嘅消防局裏面嘅救護站。消防員同救護員一般都係分開工作，分開休息。但因為機場消防局好細，比救護員休息嘅地方有限，所以整日會質埋一齊。嗰晚好凍，但幾個救護員決定唔喺休息室裏面，費事俾出更嘅消防員嘈醒。局裡面有一間好細嘅健身室，四面都係玻璃，中間擺咗啲健身器材。係烏黑嘅石屎地好凍，佢哋執咗啲紙皮，鋪喺地下，坐咗喺度傾偈。過佐一陣，望一望個錶，仲有幾個鐘頭先至天光，又未有排更任務，所以佢哋3個決定瞌一陣。

就咁瞓喺地下，故事主角瞓喺最裏面，旁邊就係一塊鏡。個度好黑，緊急照明紅色光線，反映喺塊鏡度，有少少刺眼，但都將就。大約過咗半個鐘，主角半睡半醒，轉身面向塊鏡。突然，佢感覺到有啲嘢郁，本能反應，佢想再睇清楚啲，就捽開眼。點知一望，馬上嚇醒，鏡裡面出現咗一個着住白色衫嘅女鬼。正確D講，佢身上披着一塊白色布，長到落腳。個女鬼留好長頭髮，長度可以到腰。同場兩位救護員，已經瞓到扯晒鼻鼾，根本唔知道發生緊咩事。

佢喺門口，慢慢咁飄入去健身室，先望一望瞓喺地下嘅人。最外面嗰個側身咁面向門口，長髮女鬼就從頭開始到腳，哄嗰頭埋去係咁聞。中間來回咗幾次，愈聞愈享受咁。之後佢再重施故技，向中間嗰個埋手，又係一樣，由頭聞到落腳。第二位同事原先打鼻鼾最大聲，但當個女鬼聞時，佢一啲聲都冇，好似死咗咁。最裡面嘅救護員驚到震，係塊鏡裏面望到眼甘甘，佢同自己講︰「唔好俾佢發現我睇到，一於扮瞓。但自己又抵死，時不時偷偷裝下佢做緊乜。終於輪到佢啦。女鬼慢慢飄到佢個頭頂，然後將個頭貼住佢塊面。救護員驚到成個人僵咗，唔知係自己問題，定係個女鬼搞。但係，個女鬼竟然冇聞到佢，只係慢慢咁貼埋去耳仔，好細聲，好細聲，慢慢咁講︰「聽日輪到你了。」個救護員聽完之後，根本郁唔到，彷彿對外面嘅世界冇晒反應。過咗一陣，佢先恢復返力氣，坐起身，望到嗰個女鬼嘅身影，慢慢咁飄返出去。到第二日，佢唔敢同另外嗰兩個人講，亦都唔敢再夜晚喺同一地方，寧願成晚坐係架車度，開住眼扮精神。

各位，除咗呢位救護員，其實世界上好多遇到被靈騷擾嘅人，發生係唔同嘅地方…

另一位係T女士，係酒店房遇到嘅鬼騷擾。當日佢參加一個商務會議，晚上入住主辦方提供嘅房間。她住咗之後，發覺總係心諸不寧，成日形住唔妥，卻又說不出點解。房間裡有一個衣櫃，正對著床，櫃門總係閂唔到，有條好大嘅縫。佢話說晚上大約3點鐘，T女突然感到有人𥄫住她，在黑暗中有雙大眼睛，每2、3秒便眨一次眼，但從冇動靜。她想起身，但手腳都麻痺晒，用唔到力，在掙扎咗一陣，T女先勉強企起身，花咗一分多鐘嘅時間，才走到5呎外嘅衣櫃，小心打開佢，先發現，個對紅色嘅眼係衣櫃裡面，正正咁望住自己。當晚T女最終嚇暈咗，醒返時候先知道自己去咗醫院。

第二位係個男人W，佢去到中國廣西某個小城市，參加直銷大會。係酒店頭個晚，瞓到半夜，突然聽到廁所水龍頭有開水聲，又閂，又開，又閂。佢下意識以為係水龍頭壞咗，朦朧間又唔想起身，索性繼續大覺瞓。點不知過咗一陣，水龍頭聲突然轉換為花曬聲，而維持且一直噴水，中間仲隱約夾雜把女聲，係度「EE哦哦」。佢個人即刻醒晒，起身睇。佢慢慢行去浴室，打開門，摸黑開燈，係熱水既水蒸汽之間，佢竟然發現係淋浴間，企咗個女鬼，冇著衫，有頭髮但睇唔到塊面…佢今次冇嚇暈到，而係嚇到語無倫次咗兩日。

第三位是個中年大肚腩男人W。他同朋友飲酒到後半夜，返到酒店床已經係早上4點幾。但他話自己一直無醉，仍然非常清醒，仲通咗回咗幾個電郵先瞓。佢記得只係躺下大約半個鐘，身體突然就動彈不得，直情係「俾鬼砸」，腦仍然可以運作，知道發生緊咩事，眼睛仍然運作如常，周圍望，只係唔郁得。呢個時候，突然有種用銀幣刮牆嘅聲，刺耳到爆，維持咗大約幾分鐘。W掙扎想走，用盡九牛二虎之力，先起到一半身。正好見到床尾，有對好瘦嘅手，長指甲，wear住床邊，係咁用力wear，成個床塾直情陷咗落去。W成個人驚到叫咗出來，仲碌咗落床，係地下滾咗個圈。大件事，呢下佢先見得清楚，係個冇下半身既人，著白色底衫，同樣係個肥佬，仲望著佢係咁笑…..

輪到第四位V小姐。雖然件事已經係幾年前，但佢同我講嘅時候，個人仍然驚到好唔自在。佢話說參加一個外國嘅網上課程，最後要去國外實習。課程安排同另一個同學一齊住酒店，但因為對方臨時有事來唔到，所以得返V小姐一個人入住酒店走廊嘅尾房。晚上聽完講座，佢自己返房。開門嘅時候，聽到一陣音樂聲。佢自己描述，係音樂盒嘅聲。音色好清脆，好清晰，完全係個種上鏈音樂盒…大概10秒到，音樂就停咗，房間再無其他聲。V小姐明明記得自己間房冇音響，D聲點來？不過佢平時夠大膽，繼續行入去。正當佢想插卡開燈嘅時候，突然一把細路女嘅聲，同佢講野。把聲好尖，仲好嬲，係咁講︰「唔好開燈啊，叫你唔好開燈…」重複咗兩次。佢嚇到當時企係門口唔識反應，同我講嚇到瀨尿。佢之後慢慢轉身走，後面又響起音樂盒聲，中間仲夾雜咗D細路聲….

下回繼續

第三集

上次講到遇到個日本人「江口生」同我遊花園，不過佢個樣愈來愈後生，由50歲變返30歲既靚仔樣。我跟佢去到出名既歌舞伎町附近。周圍嘅行人越來越少，因為嗰晚氣溫得返10度以下，好彩我仲頂得住。「江口」係一個路口既自動售賣機前面撳咗一陣，部機睇係完全冇反應。但現實總係有無限可能，突然憑空咖啡喺機口出佐杯熱咖啡，仲係熱騰騰，當然係杯「靈咖啡」。我最後忍唔住，行埋去入錢，撳咗杯黑咖啡。佢望望笑笑口咁講︰「辛苦你啦」，仲拍我膊頭，好似係佢叫我一路跟住佢咁。個陣我都唔知係好嬲定好笑，只好行埋一邊自己慢慢飲。

呢個時候，「江口」個樣又有啲變化。佢嘅短髮又變返長髮，由30幾歲變得更年輕，而家直情應該係20出頭。原先嘅西裝西褲，亦變咗「格仔恤衫+牛仔褲，波鞋。」佢轉個頭同我講，：「好快佢哋就會來，好快，你再等多陣，辛苦啦。」我飲住杯咖啡，點一點頭，我都唔知點解突然間成為佢嘅拍檔，我亦都唔需要幫佢做任何嘢，我只係一個好奇害死貓嘅遊客。

喺等待嘅10分鐘裏面，我同佢都冇講嘢，佢不時攞個手機出嚟睇，見到屏幕上面既光時隱時著。佢用手指內會查找訊息，有時又打開啲相嚟睇。突然，冇伴奏既背景，主角現身。Oh My God，前面嘅一班狀似日本黑道嘅「靈」，大約有10幾人，雖然只係幾個身上有紋身，但望落個樣全部都兇神惡殺。佢哋當時押著一個女仔，嗰個女仔同「江口」應該差唔多年紀，20幾歲度。望落去好靚，有啲印象，不過當時醒唔起。嗰班黑道除咗好有氣勢，幾條街咁遠都聽到佢哋喺度大叫大嚷，我企埋一邊望，佢哋並冇發現我。

「江口」將裝滿錢嘅公事包放喺地下，俾前面嘅一個平頭佬檢查。佢手指點點口水，然後打開個包，係咁掃裏面有幾多張，掃完都要10分鐘，之後向老大示意夠數，然後為首嘅行去「江口」前面，同佢講咗幾句，就將個靚女放咗，然後揚長而去。我喺隔離睇住剝花生，一場英雄救美，以交贖金作ending。「江口」好用力咁抱住嗰靚女，然後喊咗出嚟。我第一次見到一個日本人喺我面前喊得咁厲害，之後個靚女都喺度喊，兩個人喊到呼天搶地。

係呢個時候，我覺得自己好似第三者咁，喺度偷窺別人嘅隱私。所以我慢慢退後，然後轉身走。喺嗰個咁凍嘅夜晚，雖然未食飯，但我一啲都唔肚餓，雖然好似係電影橋段，「江口」未必係英雄，不過佢喺佢嘅世界，用咗佢嘅方法，救出左一個美人。

後面仲有段插曲。我返到香港，先記起原來個晚見到嗰個靚女，原來係日本嘅AV女星，不過係過咗氣既。後來返嚟查資料發現，佢係90年代至-2000年中，拍過唔少AV，之後息影就再無消息。俾D貼示大家，個名有個美字既。

(聲演:張文獻)

第二集

上次講到遇到個日本人，攞住個公事包鬼鬼祟祟。我跟佢去到一個商廈既後樓梯。我直接打開防煙門，見到「江口生」正耷低頭，用左手拇指同食指握住一個煙斗，個煙斗鉢前面崩咗一個角。我微笑咁向佢點頭，然後喺後袋，攞返包煙出嚟吞雲吐霧，而佢亦若無其事咁繼續食佢個唔熄既煙斗。我主動打開話題：「你係咪喺呢度附近返工？」他吐出一口煙，然後用日語笑笑口講，「笨蛋，我都死咗了，仲返咩工？」雖然我日文半桶水，但係一聽佢講乜，馬上就自動翻譯為廣東話，所以無論咩內容我都完全明白。我笑笑口咁，繼續自己個口煙。佢亦再冇出聲。過咗一陣，佢將佢嗰啲煙灰「鄧」咗落地下，然後又攬住公事包喺心口，轉身撳lift離開。

我繼續跟。落到去地下，轉咗個街口，去到個商場門口，人來人往，「江口」喺人群之中穿插，停馬路交通燈嘅時候，不時攞個手機出嚟睇，好似等緊啲好重要既信息。就係呢個時候，我發覺佢嘅外型開始變化，由原來50歲既外表，慢慢變得後生仔，變個陣身體愈來愈模糊，好似半透明咁。大約僅僅用咗3分鐘，佢變返30歲既樣，而且長髮變短髮，成個人仲精神晒，連行路上嚟條腰都挺直咗，腳步都快咗。

後生版嘅佢，落咗JR山手線鐵路站。過個閘機嘅時候，係個口袋攞咗一張鐵路飛出嚟，放咗落去閘機。(自備票，無走數) 我睇落去，部機當然冇反應，但佢成個人就直接穿過，若無其事惦行惦過。入到列車，佢坐咗喺一個學生隔離。個日本學生妹正喺度睇緊本漫畫雜誌，佢伸個頭過去，同佢一齊睇，由上車到落車，聚精會神，唔俾任何嘢分心。到達原宿駅，佢好唔情願咁起身離開。轉身嗰刻，係月台剛好撞到一個着得好性感嘅女仔，佢成個人十字型咁訓咗落地下，公事包裏面啲嘢跌晒出嚟，喺嗰一刻我先睇到裏面原來裝滿晒錢，一沓沓的日圓，淨係跌出嚟嗰度，起碼都幾十萬。我心諗，天啊，佢竟然身懷巨款，嗰啲錢仲係真正嘅日圓咁樣，完全唔係陰司紙，無論係玉帝或冥皇個頭都唔喺上面，正版福澤諭吉印刷頭像清晰。鬼竟然仲用真鈔」我心諗真係講都冇人信，但偏偏就比我見到，仲要喺日本咁得意。

出咗車站之後，「江口」上咗一架的士，講得清楚啲，佢係突然間跳咗上一架有人坐緊嘅的士上面，我唔知佢知唔知道呢架車去邊，但我當時諗都冇諗，只好同時跳上另一架的士，跟住佢去。只係行咗10幾分鐘，就喺前面一個十字路口停燈位，佢隨即自己開門喺架車度行出嚟，我立叫即停車繼續跟。去到一個公園嘅門口，行咗入去兜咗大半個圈，喺另一個出口又出返嚟，前後嘥咗我半個鐘頭，似玩緊「反跟蹤」。我望望個天，由日頭玩到夜晚，周圍嘅霓虹燈著晒，而悲劇既係，我仲未食飯，個肚估估聲。我開始有啲動搖，係咪應該繼續跟落去，心裏疑惑係咪比佢玩緊。

(聲演:張文獻)

第一集

係日本旅行，見過好多靈，林林總總，多到數唔晒。唔講求其喺街度見到嗰啲，隨便行一條行人路，起碼10幾廿個企喺度，隨時多過人。點解日本容易見到街上有靈？我都唔知。不過係眾多既不期而遇既經歷裡面，最記得一次「勇救AV女優」，成件事查實係個由「跟縱」發展到「交贖金」。係我呢個旁人眼裡，過程一D都唔驚險，但實情兩個主角最後喊到收唔到聲，算係感人至深。

講返去日本旅行，我都會去一啲公園行吓，貪嗰度嘅樹木林蔭，可以俾我消耗一日時間，優哉游哉，忘記咗自己身處東京。嗰日我行吓行吓，轉身入咗去一個商業小區，嗰度有一啲好矮嘅建築，應該係唔同嘅商社。門口有啲木牌寫住xxxx商社，照啲木紋同埋顏色嚟睇，應該都有一段歷史。正當我喺度考究裏面嘅裝潢嘅時候，一個耷低頭嘅男人，直接撞到我。佢撞到我嗰一刻，彼此都好愕然。我嘅原因係因為佢直接穿過我；佢嘅原因，係因為佢個公事包竟然比我撞左落地上面。佢撞到我之後，並無鬧人或動操，而係先轉身去執返個公事包，用了一分鐘檢查是否完好無缺，再回身向我鞠躬道歉，一貫日本人嘅禮貌。見佢對個包咁小心翼翼，當係寶咁，我心諗，裏面裝住啲咩呢？又唔似係文件咁簡單。好奇害死貓，開始咗我之後一段跟蹤經歷。

不過係跟蹤之前，我先描述一下佢嘅外貌裝束。佢大約50歲度，當時身淺藍色西裝外套，白色長褲+黑色皮鞋。個條長褲應該有段時間無洗，D漬係上面，又繅，好「污搲」。不過佢勝在夠高大，約180CM，又瘦，仲留長髮，外貌睇真啲，似後生版嘅江口洋介，不過係「四眼系列」，個副粗框眼鏡一睇就知係老花。

呢位「江口生」，見佢攬住個公事包實一實，轉身入咗去一條橫街。我當然2仔底死跟。轉左兩個彎，過咗幾條馬路，不時神情緊張，四圍望，仲攞個電話出嚟係咁掃。個電話我已經唔記得係咩牌子，不過仲記得嗰個樣，係一款摺機，應該係早十幾年都有見過既日本電話Model。去到某幢四層樓嘅商業大廈，佢停係門口，望咗幾秒鐘，證實冇人跟蹤先至快步咁入去大堂。我喺遠處唔敢跟得太近，等佢入咗lift之後我先行入去，電梯喺3樓停咗。我唔想比佢發現，自己行咗後樓梯上去。果幢商廈嘅樓梯好窄，地下周圍布滿煙頭，應該唔少人打邊爐。當我行到去2樓，係防火門嘅玻璃側邊，一眼𥄫到「江口」。估計頭先喺3樓停咗落嚟，自己行落一層樓。佢真係一個好小心嘅靈，行蹤亦好神秘，無形中又鼓勵咗我繼續跟落去。

(聲演:張文獻)

又有一次，我已經好耐冇見到「執到寶」，佢其實已經好似成為咗我間房嘅常客，有時候唔見咗佢，都有少少唔習慣，心諗究竟去咗邊。個日放學返嚟，入房放低書包，抬頭就見到佢坐喺個窗口嗰度寫信。佢望望我，點頭打招呼就繼續寫。我又哄埋去睇，佢嗰手潦草英文寫道好似教科書上面嘅示範字體咁，有棱有角，工整到靚過晒鬼佬寫，我忍唔住講出來話︰「嘩，寫得好靚啊」。「執到寶」笑笑口咁望住我，好似搵到知音咁，然後低頭繼續寫。大約15分鐘，我見佢喺個前面衫袋度，攞咗個信封出嚟，好小心咁將封信摺好，塞落個信封，再舐下信封條邊，好小心咁壓平封口。我問佢寄去邊，佢叫我埋去睇吓個信封，我記得上面寫住一啲英文，具體地址我而家已經唔記得咗，但我清楚記得上面嗰啲國家名稱USA。我再望望信封右上角，郵票位有張貼紙，係一個舊式香港郵票，只係圖案睇唔清，只係有輪廓。

我地同屋主嘅「生活」，由小三直到中四。有時一個月會出現幾次，有時候幾個先見一次。但彼此從冇講過嘢，亦冇溝通，但都平靜各自有各自做自己嘢，永遠唔會阻住或干犯對方，相安無事，風淡雲清，而且見親「執到寶」永遠都係笑笑口，好淡定，好有台型咁款，唯獨個一次……，真係有啲意外。個次亦都係最後一次見佢，係喺農曆新年之前嘅年廿七。阿媽逼我同細妹大掃除，叫我哋清晒唔要既舊嘢，包括衫同舊書薄等。我踎低想喺床下底搵返個擺工作紙嘅紙箱出嚟。見到「執到寶」，當時瞓床下底，捲埋個身喺咁喊。成個人喺度抽搐，一路喊，喊到直情開唔到聲。雖然我聽唔到，但個種淒涼到我而家大個咗，仍然會驚。我當時手足無措，因為對於呢個老朋友，我哋從來冇感情交流，所以根本嗰陣時唔知道點樣關心佢，更何況安慰佢。我想捉住佢件衫，想拉佢出嚟，但我係摸到嘅仍然係空氣。佢亦冇理到我，將個頭縮埋喺個身嗰度，盡情咁喊，一直到尾3個鐘。

喺呢件事之後，執到寶就再冇喺我間房度出現過。而家諗返起，靈就算過咗身，仍然對生活有感，有悲歡離合，有順心時候，亦會淒涼。呢啲係咪就係人生？生前死後只係一個轉化，內容似乎都係一樣。

係咁多，下次再講另一次經歷。

#靈異 #鬼故事

(聲演:張文獻)

#靈異 #都市傳說 #鬼故事 #盂蘭節 #podcast #執到寶

上次講到，「執到寶」係我間房度第一次出現，之後陸續有來。不過我冇同屋企人提起呢次奇遇，一來好似發緊夢咁，唔知點形容；二來驚講完比佢地話亂講嘢，大吉利是，到時阿媽藤條侍候。不過，有得第一次，好快有第二次，而且係日光白白。嗰日中午放學返屋企，食完飯，睇準時間做功課，諗住一陣衝去睇卡通片，要先過阿妹轉台。本身平時冇執好書包，個日好唔容易，終於搵返本英文生字練習簿出來。當我正抬頭起身嘅時候，一個身影喺我間房嘅左邊，迅速跑到去右邊，時間只係秒算。「執到寶」仍然係個套白色西裝。我企喺中間，完全俾唔到反應。說時遲那時快，佢直接穿過我身體，然後一個轉身90度，飛穿幅牆出街。係佢即將穿牆嗰一刻，回頭仲望住我，笑笑口咁。俾佢穿過個一刻，我係一啲異樣都冇，好奇怪。

呢件事之後，「執到寶」好多次喺我間房到現身，無分日夜、好天雨天，亦不論場合。當我同阿妹係間房度鬥氣嘅時候，打交嘅時候，或者傾心事嘅時候，佢都惦行惦過。不過大部份時候都係慢慢行，一啲都唔急，好似喺度行街shopping咁。

不過，都會有特別嘅時候。

有一次我喺間房度坐住喺櫈仔度睇書，「執到寶」同我一齊喺度睇，坐係個窗口，屁股伸咗出係街。當時我偷睇佢睇咩書，上面寫住「第二次世界大戰實錄」，封面係一個士兵拿住一個手榴彈，作勢要掟咁樣。（後來我真係去圖書館搵到嗰啲本書，封面同我當時睇嘅一模一樣。）又有次我見到佢喺度睇日本漫畫，個本書明明係我細佬喺朋友屋企借返嚟㗎，佢睇到入晒神，完全唔知道我行咗埋去。我今次好大膽，伸手想去摸本書，好似摸空氣咁。當時覺得好得意，馬上又跑去隔離房，睇吓個本書仲喺唔喺度，果然，個本書仍然係我細佬個書包裡面。我可以肯定兩本書係同一本，因為個封面之前好似攞嚟塾過煲，成個烘仲喺上面。

另一次夜晚見到「執到寶」，喺我間房係咁講緊電話，不過要聲明，個陣時未流行用手機講，而係用屋企電話。佢攞住黑色嘅聽筒，我順住條線去睇，竟然埋係喺幅牆裡面，自己都笑咗出嚟。我見到佢講到好開心，一時講中文，一時講吓英文，口沬橫飛。對面嗰個應該係一個女士，因為好明顯佢講嘢嘅時候，陰聲細氣，好似氹緊人咁。我梗係好奇，想哄埋去聽吓佢究竟同邊個講緊嘢。「執到寶」睇到即刻擰歪面，然後揞住個話筒，驚死我聽到咁。我有啲嬲，話晒大家咁耐同屋主，所以自己坐返起度。過咗一陣，我阿媽叫我出去幫手執枱食飯，返嚟嘅時候，我喺佢頭先坐嗰個位，見到一張紙，嗰張紙係喺我張回條到撕落來嘅一角，上面清楚寫咗一個電話號碼。細個嗰陣時我唔知佢寫乜，後來大個先知道係美國嘅長度電話號碼。佢竟然喺我間房度打長途電話，喺一個小朋友間房度打，電話費同邊個出呢？

(聲演:張文獻)

#靈異 #都市傳說 #鬼故事 #盂蘭節 #podcast #執到寶