المهارات الناعمة (Soft skills) تشمل العديد من الأمور مثل القدرة على حل المشكلات غير المتوقعة .. التفكير النقدي .. إدارة الوقت أو العمل تحت ضغط .. وبعدني مش متطرق لمهارات التواصل أو لغة الجسد .. كلها كانت أسباب مركزية برفض التوظيف لكثير من الكوادر المميزة بتعليمها واللي تعبت سنوات لتحقيق علامات أو امتلاك خبرة معينة. بسوق فيه احنا مقبلين على زيادة الاعتماد على الذكاء الاصطناعي ومشتقاته .. مهم نتوقّف عند المؤهلات اللي لازم نمتلكها للتقدم بمسيرتنا المهنية ، وجزء منها الوعي التقني اللي بنذكره في مرات كثيرة من حلقات البودكاست. 

والكلام غير محصور على الموظفين بس .. لتكوني مبادرة ناجحة وتقدري تحصلي على تمويل أو استثمار - ممكن قدراتك ببناء علاقات مهنية مثمرة تكون المفتاح .. أو إذا حابب تكون مدير له سُمعة مميزة - احتمال تكون بحاجة لتطوير قدرات الاستماع أو إدارة الأزمات والإبداع في فض النزاعات.اسمعونا بحلقة دسمة، ممكن تكون مصعد يرفعكم حتى بالمعاش .. لأنه بحسب منظمة التعاون الاقتصادي والتنمية (OECD) ذوي المهارات الشخصية تزيد معاشاتهم بنسبة تتخطى الـ 20%، وإذا سمعتوا حلقاتنا السابقة عن الموارد البشرية، صرتوا عارفين - كل ما إبداعكم وقدراتكم الشخصية زادت .. ولا عشر أدوات ذكاء إصطناعي وجي بي تي بأنواعه ممكن يبدلوا قيمتكم لمكان العمل والمجتمع اللي تنتموا له.

استمعوا للحوار الذي يستضيف من خلاله المدوّن التقني أنس أبو دعابس، ضيفة الحلقة المختصة أميرة قاسم. 

مؤسسة شريكة JOBS 360، خبيرة بمجالات تطوير المهارات والتشغيل لسنوات طويلة، صاحبة لقب ثاني في إدارة المؤسسات غير الربحية من الجامعة العبرية بالقدس، محاضرة في كلية القاسمي.

============

لا تنسوا تفعيل زر الاشتراك الموجود في تطبيقكم تصلكم حلقاتنا الأسبوعية مع الضيوف والمواضيع التقنية.

لملاحظاتك واقتراحاتكم: [email protected]

أو عبر قناة التليجرام الخاصة: https://t.me/sowteltech

صوت التك، بودكاست تقني من انتاج “راديو الناس”، الناصرة