Í Konsert kvöldsins förum við á tónleika með bandarísku hljómsveitinni Low á Antigel festival í Genf í Sviss núna 15. Febrúar sl. Þegar það er búið heyrum við nokkur lög með KK Bandinu á Bræðslunni fyrir þremur árum, en það var verið að tilkynna dagskrá Bræðslunnar 2019 núna fyrir nokkrum dögum. Low sem hefur fjórum haldið tónleika í Reykjavík varð til í Duluth í Minnesota árið 1993. Hjarta sveitarinnar samanstendur af hjónunum Alan Sparhawk sem spilar á gítar og syngur, og Mimi Parker sem trommar og syngur. Með þeim í dag er svo bassaleikari sem heitir Steve Garrington, en hann er fjórði bassaleikari sveitarinnar. Þau Alan og Mimi eiga tvö börn og eru mormónatrúar. Tónlist Low hefur hingað til meira og minna einkennst af lágstemmdum og rólegum lögum og tónlistarpressan smellti snemma hugtakinu „Slow core“ á tónlistina þeirra sem þau sjálf hafa aldrei verið sátt við. Það er sannarlega satt að indie-kántrí-rokkið, eða hvað við eigum nú að kalla þetta sem Low spilar, er yfirleitt spilað hægt. Þetta er dramatísk músík og Low á harða aðdáendur um allan heim. Sveitin hefur verið á samningi hjá Sub Pop útgáfunni allar götur síðan 2005 og nýjasta platan þeirra sem heitir Double Negative kom út í september í fyrra og sló heldur betur í gegn. Hún hefur kannski ekki selst neitt sérstaklega mikið en hún var valin ein af plötum ársins á allskyns listum sem voru birtir núna um áramótin hjá blöðum, tímaritum og vefmiðlum. Platan lenti t.d. í fyrsta sæti hjá tímaritinu Uncut, 7. sæti há Spin - 8. hjá Pitchforkmedia og 19. sæti hjá Mojo. Sannarlega áhugaverð plata en dálítið súr og tormelt og vel þess virði að kynna sér hana ef maður á annað borð hefur einhvern tíma haft smekk fyrir Low. Og Low hefur verið að fylgja Double Negative eftir síðan hún kom út og í febrúar kom sveitin við á Antigel Festival í Sviss og spilaði gömul lög í bland við lög af nýju plötunni.