عالسّلم

حلقة خفيفة لطيفة عن الفسح والخروج والانبساط، 

بنخرج عشان نتصور ولا بنتصور عشان خارجين؟ 

بنروح مكان عشان نجرب؟ ولا عشان نثبت اننا شبهه؟

نخرج ليه لو ممكن نطلب الأكل في البيت؟؟ هو الخروج أكل بس ؟

طيب جربت تخرج وتروح أماكن جديدة بنقولها في الحلقة ..... 

اسمع الحلقة للأخر واكتبلنا المكان ال نفسك تزوره سواء روحته قبل كدة أو لسة

- اتجوزت ؟؟؟ 💍

- خلفت ؟؟ 🍼

* مبروك النونو وعقبال ما تخاووه 👨‍👩‍👧‍👦

وسط موجات كتير تنادي باللا إنجابية، ومنجيبش أطفال نظلمهم وليه تجيبهم وسط ظروف المجتمع دي ممكن الرؤية متبقاش واضحة إيه اللي المفروض نعمله.فبنحاول نبسط الأمور الحلقة دي ونشوف الموضوع ده ممكن يتبص له إزاي ولو حصل وربنا كرم وخلّفت، تتوقف عند طفل واحد؟ طب تلاتة؟ ليه مش أكتر؟نتمنى الحلقة دي تبقى خفيفة عليكم وتفك بعض التشبيك اللي حاصل في الأفكار اللي بتتقدم لنا واستعينوا بالله، استخيروا ولا تعجزوا.

الوقت هي أغلى حاجة نمتلكها ... وطول الوقت حاسين أنه مش موجود ومستعجلين ....

مفيش وقت وناس بتجري ورا بعضها والوقت بيضيع

- هل الوقت قلّت البركة فيه ولا احنا اللي بنضيعه؟

- مش يمكن احنا شاغلين يومنا بحاجات أقل أولوية؟

- أو يمكن زاحمين يومنا بحاجات أكثر مما يتحملها؟

كل واحد بقى منغلق على ذاته في فرحه وحزنه وحياته بشكل عام.

هل إحنا قاصدين نبقى كده؟ يعني الوحدة دي إحنا اخترناها عن رضى ورغبة مننا فيها ولا البيئة اللي حوالينا اتصممت لده؟

شاركونا رأيكم ونتمنى الحلول اللي هنطرحها في الحلقة تبقى سهلة التنفيذ وتجيب نتيجة وتخلي حياتكم اسعد،

في الحلقة دي بنتكلم عن الوظيفة وريادة الأعمال، كنا حاسين بانزعاج شديد لإن الناس بتمجد في ريادة الأعمال وتقلل من شأن الوظيفة وكأنها عيبة، نسينا خالص أن الطريقين ما هما إلا وسيلة لأكل العيش ونعرف نعيش سعداء ونتقي الله قدر الإمكان.

مفيش وسيلة أفضل من التانية والمعادلة أكبر بكتير من إننا نقول لكم إيه الأحسن، القرار قرارك، اعرف أنت واقف فين؟ هتقدر تتحمل إيه؟ وبلاش العبارات اللي بتلمع تخدعك وتوكل على الله.

الحلقة دي هتديك تعريف أساسي بمقدمي البودكاست، جوز شباب تسعيناتي في بداية دوامة الحياة اللي بجد بعد الجواز والخلفة وكانوا كل شوية بيحتاجوا حد يفكرهم بسؤال سبيستون؛

لماذا لماذا لماذا، لماذا نحن هنا؟

فقرروا يتقابلوا بشكل أسبوعي، يفكروا بعض و يفكروكم لماذا نحن هنا؟

بودكاست عالسّلم برنامج خفيف، ظريف بيناقش مشاكل حياتية بنقابلها كل يوم وبيحاول يقدم لها حلول عملية نساعد بيها نفسنا وآملين إننا نساعد بيها غيرنا. تعالى اقعد معانا عالسّلم، شاركنا الحوار واقترح علينا المواضيع اللي نناقشها فيما بعد.