Í Konsert í kvöld heyrum við tvenna tónleika. Í seinni hlutanum heyrum við Seasick Steve á Gurten Festival í Bern í Sviss frá því núna í sumar, en fyrst heyrum við upptöku með Magnúsi og Jóhanni á Reykjavík Folk Festival árið 2013. Leiðir Magnúsar Þórs Sigmundssonar og Jóhanns Helgasonar lágu fyrst saman í hljómsveit sem hét Nesmenn. Þegar Nesmenn gáfust upp árið 1968 héldu þeir félagar samstarfinu áfram fyrst með rafmagnsgítarana sína en skiptu þeim fljótlega út fyrir kassagítara. Þeir Magnús og Jóhann náðu samningi við Fálkann, héldu í hljóðver og tóku upp eigin lagasmíðar og texta sem allir voru á enskri tungu. Samningurinn við Fálkann gekk á endanum ekki upp og fyrsta platan þeirra Magnúsar og Jóhanns kom því ekki út fyrr en um haustið 1972 á útgáfumerkinu Scorpion. Þar er meðal annars lagið Mary Jane sem varð mjög vinsælt á sínum tíma. Seinna varð hljómsveitin Changes til og undir þeim fána störfuðu þeir báðir að mestu á árunum 1973-1975 og að mestu í London, það átti að "meikaða". Eftir að sveitin lagði upp laupana fyrir jólin 1975 héldu þeir Magnús og Jóhann hvor í sína áttina. Magnús Þór hóf sjálfstæðan feril og sendi frá sér nokkrar plötur á næstu árum. Meðal annarra hina mögnuðu plötu Álfar. Jóhann sinnti einnig sólóferli og lagasmíðum, auk þess að verða helmingur dúettsins Þú og ég. Eftir þá félaga liggja fjölmörg lög sem eru stór hluti af íslenskri dægurlagasögu, lög eins og Ást, Söknuður, Dag sem dimma nátt, Yakety Yak, Þú átt mig ein, Blue Jean Queen, Mary Jane, Seinna meir, She´s Done it Again, Ísland er land þitt o.fl, en mörg þessara laga hafa þeir samið fyrir aðra flytjendur. Þeir Maggi og Jói hafa af og til á undanförnum árum dregið fram gítarana sína og tekið lagið, yfirleitt með hljómsveit, en þau hjá Reykjavík Folk Festival fengu þá til að kom og spila bara tveir á hátíðinni 2013. Við heyrum það í Konsert í kvöld.