OPEN HEAVENS

MATALA LE LAGI MO LE  LULU 28 IANUARI 2026

(tusia e Pastor EA Adeboye)

Manatu Autu: Malamalama I Mailei a Satani 2 (Understanding Satanic Traps 2)

Tauloto Tusi Paia: Teuteronome 30:19 “Ou te vala‘au i le lagi ma le lalolagi i le aso nei e fai ma molimau ‘iā te ‘outou, ‘ua ‘ou tu‘uina atu i ou luma o le ola ma le oti, o le manuia ma le malaia; o lenei, ‘ia e filifili i le ola, ‘ina ‘ia ola ai oe ‘atoa ma lau fānau;”

‭‭

Faitauga - Tusi Paia: Esoto 21:2-6

Ua ou iloa mai le tele o tausaga ua mavae, e lua ituaiga tagata puapugatia e maileia i saisaitiaga a le tiapolo. O le vaega muamua o i latou e leiloa o loo saisaitia e le tiapolo ao le vaega lona lua, o i latou o loo iloa lelei o loo latou saisaitia. I totonu o le vaega lona lua lea, e lua ituaiga tagata, muamua, o i latou o loo naunau e fia saoloto ma lona lua, o i latou e lē mananao e faasaoloto. O le asō, o le a ou talanoa atu i tagata puapuagatia, e iloa lelei o loo saisaitia, peitai e lē fia saoloto. E ono lē logomalie ni tagata puapuagatia e le fia saoloto mai saisaitiaga, peitai mai le tauloto o le Tusi Paia o le asō ma vaega o le olaga ua ou ui mai ai, e toatele tagata o loo i le vaega lea. 

Mo se faataitaiga, ua ou fetaui i ni faataulaitu, e fiafia i lo latou tulaga lea, ma e lē fia saoloto. Ou te manatua se mea na tupu i tausaga ua mavae. Sa iai se ulugalii na amata ona o mai i le lotu, peitai e lei leva ae lē toe sau le fafine. Ina ua matou asiasi ia te ia, ae fai mai talu ona sau i le lotu ua lē toe mafai ona lele i latou fono ma aitu i le po. Ona e manao e lele i latou fonotaga, e le toe sau i le lotu. O loo avanoa le faasaolotoga ae na filifili e saisaitia pea. 

Sa iai foi seisi fafine o se taulaitu foi, ua sau i le matou lotu, ua matou tatalo mo lona faasaolotoga. Ina ua leai se mea e tupu, ua ia faapea mai, ‘aisea tou te tatalo ai mo a’u? O le mana lea ou te pulea ai la’u tane, e na te ave au i le fale o lau uo tama, faatali i le taavale ao ou fiafia ai ma la’u uo, ona ia toe aveina lea o a’u i le fale. E te manao e aveesea lea mana ma a’u?’ Sa ia uu mau i le saisaitiaga e ui e mafai ona faasaolotoina o ia. 

A finagalo le Atua e faasaoloto se tagata mai le saisaitiaga, peitai e le talia e le tagata le ofo atu, o le a tumau pea o ia i le saisaitiaga, aua foi o le mea lena e manao iai lea tagata. O lea tagata o loo manao e tumau i saisaitiaga, ma e tusa foi pe faamalosia ona faasaoloto, ae lē gauai i le Atua, e toe ulufia ma toe saisaitia o ia (Mataio 12:43-45). O le aso a taeao, o le a ou faamatalaina le auala e lē mafai ai e se auauna faamaoni a le tiapolo ona faaooolima ia te oe ma mafai ai ona e taitaiina i latou e faasaolotoina. O i latou o saisaitia ae lē talia le faasaolotoga o loo ofoina atu e Iesu, e ono lamatia i le faafanoga e faavavau, i le suafa o Iesu, Amene.