Marketer.ge Podcast

წელს ზაფხულის სპორტული დასასრული მნიშვნელოვანი და საინტერესო იქნება - 25 აგვისტოდან 10 სექტემბრამდე კალათბურთის მე-19 მსოფლიო ჩემპიონატს ვადევნებთ თვალს, რომელიც პირველად ჩატარდება 3 ქვეყანაში და რაც ყველაზე მნიშვნელოვანია, პირველად ისტორიაში ასპარეზობს საქართველოს ეროვნული ნაკრები. საინტერესო პოდკასტის სტუმარია ზაზა ფაჩულია, მასთან ერთად განვიხილავთ მსოფლიო ჩემპიონატს.

წამყვანი: ნატალია ფირცხალავა

თანაწამყვანი: გიორგი ზურაბიშვილი

გახსოვთ, რა ნახეთ ბოლოს სიზმარში და რა აუხსნა მოუძებნეთ მას?

ჩვენ მხოლოდ დღე არ ვცხოვრობთ, სიზმრებშიც ვაგრძელებთ ცხოვრებას და ზოგჯერ, ძალიან მნიშვნელოვან ქმედებებსაც ჩავდივართ - ასე გვარწმუნებს იუნგი.

არის თუ არა სიზმარი ტვინის რენდომ აქტივობის შედეგად გენერირებული პროდუქტი, თუ, მის უკან გაცილებით მნიშვენლოვანი ახსნა დგას? არის თუ არა ის მართლაც ჩვენი რეპრესირებული სურვილების ექსპრესია, როგორც ამას ფროიდი ამბობს?

სიზმრების შესახებ უამრავი თეორია არსებობს, მათი ინტერპრეტირება მართლაც ცალკე ხელოვნებაა, თუმცა, დღევანდელი შესაძლებლობების ფარგლებში, მეცნიერებს კიდევ უფრო მეტი ვალიდური არგუმენტაცია აქვთ ხელთ კვლევების შედეგად, თუ რა ხდება ჩვენს ტვინში, როცა სიზმარს ვნახულობთ, რა გავლენა აქვს მას ჩვენს ფიზიკურ და მენტალურ ჯანმრთელობაზე, აქვს თუ არა მას რაიმე საერთო წინასწარმეტყველებასთან...

ერთი სიტყვით, ძალიან საინტერესო ფანჯარას გამოვაღებთ დღეს, რაშიც ჩვენი დღევანდელი სტუმარი, სამეცნიერო ჟურნალისტი ზაზა დობორჯგინიძე დაგვეხმარება.

ობიექტურად რომ შეაფასოთ საკუთარი თავი, როგორც მძღოლი, როგორ ეპითეტებს გამოიყენებდით? დაგყავთ თუ არა თქვენი ავტომობილი სეზონურ შემოწმებაზე, დროულად უცვლით თუ არა სეზონურ საბურავს, უსმენთ თუ არა მას და საერთოდაც, გესმით თუ არა მისი?

სერიოზულად კი, საგზაო მოძრაობის კულტურა და უსაფრთხოება ერთ-ერთ მოწინავე პრობლემად რჩება ჩვენს ქვეყანაში. 2021 წლის მონაცემებით 7700 ადამიანი დაშავდა, ხოლო 450 გარდაიცვალა. ამის მთავარი გამომწვევი მიზეზები სიჩქარის გადაჭარბება, გაუმართავი ავტომობილი, ჩვენი კულტურული მახასიათებლები და მავნე ჩვევებია.

კარგი ამბავი ისაა, რომ ზუსტად ვიცით, სტატისტიკა გვეუბნება, რომ შესაძლებელია ისეთი სისტემის აწყობა, რომლის მეშვეობითაც საგზაო შემთხვევები მინიმუმამდეა დაყვანილი. მაგალითად, ეს შეძლეს სკანდინავიის ქვეყნებმა.

ერთ-ერთი ძლიერი ინსტრუმენტი ამ პრობლემის მოგვარების, რა თქმა უნდა, ცნობიერების გაზრდაა ამ საკითხის ირგვლივ, რასაც ძალიან წარმატებულად აკეთებს მაგალითად თეგეტა მოტორსი, რომელსაც უკვე წელზე მეტია მიმდინარე კამპანია აქვს საგზაო მოძრაობის კულტურასთან დაკავშირებით. სწორედ ამ კამპანიის ამბასადორი, ავტომრბოლელი დათა ქაჯაიაა დღეს ჩვენი სტუმარი, რომელიც გვასწავლის როგორ გავხდეთ მეტად პასუხისმგებლიანი და კულტურული მძღოლები.

თანამედროვე ადამიანების მუდმივი გამოწვევა თვითგანვითარებაა. ტემპი ძალიან მაღალია, ტექნოლოგიების ასეთი სისწრაფით წინსვლა ყველაფერზე აისახება, მათ შორის, ძალიან შესამჩნევად განათლების სისტემაზეც, რომელიც ცდილობს, რომ რბოლას არ ჩამორჩეს.

დღეს მოცემულობა სხვაგვარია - თანამედროვე პროფესიების პოპულარობამ ცოდნის მიღების წყაროებიც შეცვალა, გადმოინაცვლა ციფრულ სამყაროში და განათლების მიღება სულ უფრო და უფრო თანასწორი და ხელმისაწვდომი გახადა - ადამიანები, ასაკის და მიუხედავად, რადიკალურად იცვლიან პროფესიებს, აღმოაჩენენ ფარულ შესაძლებლობებსა და ნიჭებს, იჩენენ დამატებითი შემოსავლის წყაროებს. ერთი სიტყვით, ცვლიან საკუთარ ცხოვრებებს.

ჩვენი სტუმრები upway.ge-ს, კურსების სანდო და მრავალფეროვანი სისტემის დამფუძნებელი სამი სხვადასხვა მხრივ საინტერესო ქალია, მარიშა გოგოლაური, მარიამ აბულაძე და მარიამ ცანავა.

გადაცემის წამყვანი: ნატალია ფირცხალავა

გადაცემის წარმდგენი: საქართველოს ბანკი

რა ასაკიდან შეუძლია ბავშვს, გახდეს პროგრამისტი?

როგორ რთულადაც არ უნდა ჟღერდეს პროგრამირება, სწორი პროგრამით, რესურსებით და მიდგომებით, დიახ, ბავშვებს შეუძლიათ საკმაოდ პატარა ასაკიდან დაიწყონ მისი შესწავლა.

არ არის აუცილებელი ბავშვი გაყვეს ამ პროფესიას, პროგრამირების სწავლა მაინც ძალიან ბევრ სარგებელს მოუტანს თქვენს შვილებს: განუვითარებს და გაუძლიერებს კრიტიკულ აზროვნებასა და პრობლემის გადაჭრის სქილებს, გაუღვივებს კრეატიულობას და საკუთარი თავის გამოხატვაში დაეხმარება, რადგან პროგრამირება სწორედ ეგ არის - გადააქციონ საკუთარი წარმოსახვითი იდეები ხელშესახებ, ციფრულ ქმნილებებად, იქნება ეს თამაშების დიზაინი, თუ ვებგვერდის აწყობა.

ამ პროფესიის პოპულარობისა და სარგებლიანობის გამო, ბითქემფმა, რომლის დამფუძნებელიც ჩვენი სტუმარია დღეს, გარდა ზრდასრულებისა, პატარებზეც დაიწყო ზრუნვა და საბავშვო პროგრამაც შეიმუშავა, რომელიც ამ ზაფხულიდან იქნება ხელმისაწვდომი და რაც მთავარია, ონლიან და რაც კიდევ უფრო მთავარია, ძალიან მხიარული და არამოსაწყენი, რომ ბავშვებს საზაფხულო არდადეგები არ დავუფრთხოთ 😊)

ბითქემფის თანადამფუძნებელი და თავად პროგრამისტი ოთო ზაკალაშვილია დღეს ჩვენი სტუმარი.

გადაცემის წამყვანი: ნატალია ფირცხალავა

პროექტის წარმდგენი: საქართველოს ბანკი

როგორია ცხოვრება მას შემდეგ, ის, რასაც ბავშვობიდან მოყოლებული, უამრავი წლის განმავლობაში მთელი გულით აკეთებ, წყვეტ უამრავ ვარსკვლავს, ხარ გულშემატკივრის უძლეველი ენერგეტიკის ველის ეპიცენტრში და მიუხედავად ამ ენერგეტიკისგან გამოწვეული ბიძგებისა, მაინც მყარად დგახარ მოედანზე, რაღაც მომენტში, მართალია, კანონზომიერად, თუმცა, მაინც მთავრდება?

საქართველოს ეროვნული ნაკრების ყველა დროის საუკეთესო ბომბარდირი, ტრაბზონსფორის, აიაქსის, რეინჯერსის და ალკმარის ვარსკვლავი, საფეხბურთო კარიერის დასრულების შემდეგ, გამოწვევას მწვრთნელობით პასუხობს.

საინტერესო პოდკასტის სტუმარია შოთი არველაძე. გარდა იმისა, რომ გავიგებთ, რას შვება ახლა ის, თავს როგორ გრძნობს და რა გეგმები აქვს, კარს მომდგარ, ჩვენი ქვეყნისთვის ამჟამად ყველაზე მნიშვნელოვან საფეხბურთო მოვლენაზე - უეფას 21 წლამდე ევროპის ჩემპიონატზეც მოვისმენთ მის მოსაზრებებს.

საინტერესო პოდკასტის მასპინძელი: ნატა ფირცხალავა, თანაწამყვანი, დიმა ნებიერიძე.

საინტერესო პოდკასტის წარმდგენია საქართველოს ბანკი

თავს მოგზაურად უფრო მიიჩნევთ, თუ ტურისტად?

მოგზაურობის დაგეგმვა, მიმართულების შერჩევა, მარშრუტის მოხაზვა - ეს ყველაფერი ნამდვილი მოგზაურებისთვის დიდი ვნებათაღელვის მომტანია.

ჭეშმარიტი მოგზაურები მოგზაურსა და ტურისტს ერთმანეთისგან განასხვავებენ. არჩილ ქიქოძის ნორვეგიულ დღიურებში ამოვიკითხე ძალიან კარგი ფორმულირება, რომ მოგზაურს ტურისტისგან ის განასხვავებს, რომ მან ისიც კი არ იცის, სახლში დაბრუნდება თუ არ.

რადგან ჩვენ მოგზაურობის მოტრფიალეები ვართ, ჭეშმარიტი მოგზაური მოვიწვიეთ სტუმრად დღეს, რომელიც მოგზაურობასა და კერძოდ, ტაილანდურ თავგადასავალზე მოგვიყვება ისტორიებს - სამხრეთ აღმოსავლეთ აზიის ამ საოცარ, ტროპიკულ ქვეყანაზე.

ალექსანდრე ბაგრატიონ-დავითაშვილი მოგვიყვება დღეს, როგორ მოხვდა ტაილანდში, რა ადგილები მოინახულა და რამ აღაფრთოვანა

რამდენად კარგად იცნობთ საკუთარ და საკუთარი შვილის ემოციებს?

ჩვენს ცხოვრებაში ემოციებისა და გრძნობების ადგილი, რბილად რომ ვთქვათ, ძალიან დიდია. პაოლო სორენტინოს ფილმის, Youth-ის ერთ-ერთი პერსონაჟის ფრაზით: “You say emotions are overrated. Emotions are all we got”. მართლაც, ემოციების გარეშე ჩვენი ცხოვრება ბევრად მოსაწყენი იქნებოდა, ვიდრე ახლაა.

შიშს, ზიზღს, ბრაზს, სიხარულს, სევდას, გაოცებას - მათ ყველას სჭირდება მართვა. მართვას კი - ცოდნა. სწორედ ამ ცოდნის ერთ-ერთ წყაროზეა დღევანდელი პოდკასტი.

ემოციების დიდი წიგნის მიზანია, მშობლისა და შვილისათვის მეტად ნათელი გახადოს ემოციების მნიშვნელობა, უკეთ გაიცნონ ერთმანეთი, ისწავლონ ემოციების იდენტიფიცირება და მიღება და რაც მთავარია, მათი მართვა.

პროექტის ავტორების და სოლოს მხარდაჭერით ეს წიგნი უკვე ხელმისაწვდომია ულამაზესი ილუსტრაციებით და სწორედ მისი ავტორია დღეს ჩვენი სტუმარი, ქეთი დალინკევიჩი, კლინიკური ფსიქოლოგი და ფსიქოთერაპევტი, რომელთანაც ვისაუბრებთ როგორც წიგნზე, ასევე, ზოგადად, ემოციებზე.

ჯერ კიდევ 2012-ში მარიამ შარანგიამ პირველი ნაბიჯები გადადგა IT სფეროს მიმართულებით და დღეს უკვე Meta-ს პროექტ მენეჯერია. შეუპოვრობა, ნდობა და მხარდაჭერა კი სწორედ ის ფაქტორებია, რომლებმაც მისი წარმატება განსაზღვრა, როგორც ადგილობრივ, ისე საერთაშორისო ბაზარზე.

მართალია, თავიდან პიანისტობა უნდოდა და წლებიც დაუთმო ამ სტატუსის მოპოვებას, მაგრამ საბოლოოდ მაინც ინფორმაციული ტექნოლოგიებისა და ბიზნესის სფერო არჩია. თუმცა მუსიკის სამყაროში მოპოვებული გამოცდილება ამ სრულიად განსხვავებულ ინდუსტრიაშიც ეხმარება.

მარკეტერის პოდკასტში მარიამი საკუთარ გამოცილებას გვიზიარებს — იესემის სკოლიდან UCL-მდე და კარიერის პირველ თუ შემდგომ ეტაპებამდე. ამავდროულად, გვიყვება პროექტ მენეჯერის, როგორც ერთგვარი დირიჟორის როლის შესახებ: რა გამოწვევების წინაშე დგას ის, როგორ უნდა მართოს გუნდი/პროექტი სწორად, როგორ დაამყაროს სწორი კომუნიკაცია ყველასთან და ა. შ. ამის პარალელურად კი, თანამედროვე სამყაროს ლიდერის „იდეალურ სახეზე“ გვესაუბრება, თუ როგორი უნდა იყოს ის გუნდთან მიმართებით.

მარკეტერის პოდკასტს წარმოგიდგენთ საქართველოს ბანკი ბიზნესი

იცით, რა არის პტსა და როგორ განვასხვავოთ ის უბრალო ტრავმული გამოცდილებისგან?

ნავარაუდებია, რომ, სამწუხაროდ, ადამიანთა 80%-ს ცხოვრების მანძილზე აუცილებლად უწევს სხვადასხვა ტრავმული გამოცდილებების მიღება. ხოლო, აქედან 5%-ს უვითარდება პტსა, ცნობილი როგორც ptsd - ანუ, პოსტ ტრავმული სტრესული აშლილობა.

ეს არის კონდიცია, რომელიც გამოწვეულია ტრავმული გამოცდილებით, რომლის მიზეზითაც, ადამიანი თითქოს იჭედება ერთ ადგილზე, სადაც სამყარო აღარ არის უსაფრთხო.

საინტერესო პოდკასტის სტუმარია ფსიქოთერაპევტი ელენე ჯაფარიძე.