A xenial Maruja Mallo foi unha transgresora no vivir, no falar e no pintar. Formou parte das Sen Sombreiro e conseguiu converterse nunha das figuras máis representativas da xeración do 27 e nun dos grandes expoñentes internacionais do surrealismo figurativo. Dalí definiuna como “metade anxo, metade marisco”. Lorca asegurou que os seus cadros son os que vira pintados “con máis imaxinación, emoción e sensualidade”. E María Zambrano dixo dela que cometeu un dos erros máis destrutivos e imperdoables: ser libre. Nesta sesión, a xestora cultural Loli Docampo, gran coñecedora da súa traxectoria en Galicia, comparte con nós datos do seu percorrido vital e artístico, poñendo especial énfase na súa relación coa vila de Bueu, onde a pintora se inspirou para realizar o que hoxe coñecemos como Caderno de Galicia ou Caderno de Beluso, que marcaría fortemente as obras da súa etapa americana.