OPEN HEAVENS

MATALA LE LAGI MO LE ASO LULU 11 MATI 2026

(tusia e Pastor EA Adeboye)

Manatu Autu:  Maua o le manuia lelei 2 (Attaining good success 2)

Tauloto Tusi Paia: Iosua 1:8 “E le te‘a i lou gutu le tusi o lenei tulafono, a ‘ia mafaufau i ai i le ao ‘atoa ma le po, ‘ina ‘ia e ‘ana‘ana e fai e tusa ma mea uma ‘ua tusia i ai; ‘ona manuia ai lea ‘iā te oe o lou ala, ‘ona e manuia ai lea.”

Faitauga - Tusi Paia: Iosua 1:1-9

Ina ua manao Serupapelu e fausia le malumalu i Ierusalema, na fai iai Sakaria, e lē o le malosi poo le fitafita, ae o le agaga o le Alii (Sakaria 4:6). E mafai ona manuia ma ausia taui o galuega e lē mafai ona ausia i lou malosi, o a’u o se molimau ola i lea tulaga moni. I le taimi na ou tusia ai lenei faamalosiau, ua iai le Ekalesia RCCG i le 190 atunuu o le lalolagi, ma e lei soo uma nei atunuu ia te au. O se faataitaiga lelei lea o galuega ausia e lē faia ise malosi. Emafai ona avatu e le Atua le manumalo e aunoa ma le manaomia o lou  tulaga maualuga, poto, malosi poo le tulaga pule o loo ia te oe, ae mafaia i lona alofa mutimutivale ma lona alofa tunoa. 

I le Salamo 37:5, o loo fautua atu Tavita e tu‘uina atu ou ala i le ALI‘I, ma fa‘atuatua ‘iā te ia, ‘ona faia lava lea ma faataunuuina. E taua tele aua afai e te lē lafoai mea uma i le Alii ae Ia foai atu le manuia, e te ono faagalo ia te ia ma e manatu ua e manuia ona o lou taumafai. O nisi tagata ua manuia ma ua faigata ona maua se moe ma leai se filemu ona ua lē lafoai mea uma i le Alii. Ina ua avea au ma taitai aoao i le Ekalesia RCCG, e na o le 39 aulotu na iai i Nigeria. O le taimi nei, ua faitau afe Ekalesia i le lalolagi atoa, ae o loo lelei pea le fua o lo’u toto aua foi ou te iloa o le Atua o loo i tua o nei mea uma. O po uma ou te moe lelei e aunoa ma sou popole i se mea. Ou te maua le filemu aua ua ou lafoai ma tuuina atu i le Atua mea uma. 

E finagalo le Atua i lana fanau e fiafia i manuia. I le tauloto mai le Tusi Paia o le asō, na ia faaalia ia Iosua se tulaga taua ia maua ai le manuia, o le manatunatu i lana Upu. O le manatunatu o le mafaufau loloto i se mea, na fetalai le Atua ia Iosua ia tausi i le tusi o tulafono i lona loto ma ona laugutu i taimi uma aua ua ia silafia, o soo se mea o loo i lona loto ma ona laugutu e oo ina taunuu. E silafia e le Atua afai e na te taitaia oe e talitonu o lona finagalo lea ia e manuia, ma e folafola atu i le faatuatua, e leai se mea e taofia oe mai le manuia. Afai o loo e faitau ma faalogo i lenei faamalosiau ae o loo e iai i faigata ma le toilalo, ou te folafola atu, o le a suia mo le lelei mo oe, e amata atu nei, i le suafa o Iesu. 

Le au pele e, manatumanatu i le upu a le Atua i le ao atoa ma le po ma tautino mea ua ia folafola mo oe, o le tulaga lena e tatala ai ma fiafia i le manuia lelei. Faaavanoa se taimi i aso uma e mafaufau ma manatunatu ai i folafolaga a le Atua mo lou manuia, i le suafa o Iesu, Amene.