Kak wupada šula přichoda, zhubja so tafle z krydu dospołnje, narunaja tablety bórze zešiwki a knihi? Kak derje su naše kubłanišća a wučerjo na digitalizaciju přihotowani? Lydija Maćijowa je so rozhladowała.

Trochu w pozadku je so Afriska swinjaca mrětwa pozhubiła. Hačrunjež je w tutym zwisku wšo druhe hač měrne. Němska dotal njeje potrjechena ale hajnicy a ratarjo su alarměrowani, wě Betina Wenderothowa.

Wobsedźerjo lěsa maja wot lońšeho ruce połnej dźěła. Skórnik je tójšto štomow zničił, k tomu suchota a wichory. Dźěła je potajkim dosć w našich lěsach. Betina Wenderothowa wo dilemje tych, kiž so ze swójskim lěsom bědźa.

Paul Lipič je wědomostnik, kotryž w Zhorjelcu při "Senckenbergowym muzeju za přirodowědu" na wjelčim projekće slědźi. Monika Gerdesowa je so z nim podała na slědy wjelka.

Bukečanska Bjesada a Serbske ewangelske towarstwo stej sobotu popołdnju do Bukec na dźěłarničku ewangelskich Bjesadow přeprosyłoj. Kubłać so we wěrje, rěči a kulturje. Tež Lydija Maćijowa bě sobotu w Bukecach pódla.

Naš swět bywa dźeń a digitalniši. Dokoławokoło sportowych disciplinow ma přiwisnik abo žurnalist dźeń a lěpše móžnosće, so tež přez detaile w kopańcy abo wolejbulu informować. Jurij Bjeńš wě wjac.

Wosoba lěta nowinskeho magacina TIME z USA bě 2019 Greta Thunberg, kotraž kaž nichtó druhi hibanje za škit klimy reprezentuje. Nowa hra činohrajneho studija Budyskeho dźiwadła rěka "Greta". Měrćin Wjenk rozprawja.

Spěwarka a komponistka Christin Herrmannec z Lipska wuda na dźensnišim pjatku nowu tačel. Jeje album rěka "Za moju domiznu" a je přewažnje serbski. Wobspěwa mjez druhim politiske konflikty kaž prawicarstwo.