Миний өглөө подкастын хүүхдийн баярын тусгай дугаарт нийслэлийн Баянгол дүүргийн 40 дүгээр сургуулийн 9а ангийн сурагч, Монголын радиогийн дэргэдэх хүүхдийн найрал дууны "Улаан бүч" чуулгын дуучин Т.Энх-Ану оролцлоо.

Миний өглөө подкастын өнөөдрийн дугаарт Үндэсний бахархал Мазаалай ТББ-ын гүйцэтгэх захирал Баянмөнх оролцлоо

Миний өглөө подкастын 95 дахь дугаар танд хүрч байна. Бид энэ удаагийн дугаартаа түүх судлаач, зохиолч, орчуулагч Д.Гүн-Үйлстэй саяхан гарсан "Монгол Заяатан" номын тухай, монголчуудын нүүдэлч соёлын тухай цөөн хэдэн минут ярилцлаа.

Жил бүрийн тавдугаар сарын 3-ныг дэлхийн нийтээр хэвлэлийн эрх чөлөөний өдөр болгон тэмдэглэдэг. Энэ өдөр нь 1991 онд Намиби улсад баталсан хараат бус, олон ургалч, хэвлэл мэдээллийг хөхиүлэн дэмжих тухай Виндхукийн тунхаглалаас үүсэлтэй ажээ.Тэгвэл энэ өдрийг тохиолдуулан Миний өглөө подкаст энэ удаагийн дугаартаа  МУИС-ийн Сэтгүүлзүй, олон нийтийн харилцааны тэнхимийн профессор, шинжлэх ухааны доктор (Sc. D), МУСГЗ М.Зулькафильтэй ярилцлаа.

Миний өглөө подкастын 92 дах дугаарт  Зохиолч, Мэргэжлийн болон Хувь Хүний Хөгжлийн Хөтөч Пүрэвдоржийн Ууганбаяр (Uuganaa Ramsay /Ууганаа Рамзий) оролцлоо.   Түүний хувьд Шотланд Улсын Шилдэг Амжилтанд хүрсэн Ази Эмэгтэй Шагналт, Шотландын Зохиолчдын Хорооны Жанетта Бавий Цомын эзэн төдийгүй, Европ дах Шилдэг Уран Бүтээлч Монгол Эмэгтэй 2014 шагналтыг Монгол хэмээх намтар зохиолоор хүртжээ. 'Монгол' ном нь 2014 оны 1 сарын 16нд худалдаанд гарч Англи хэл дээр эхний ээлжинд уншигчдын гар дээр очжээ. Уг номны нээлтүүд нь Гласгов, Эдинбүрг, Айр болон Лондон хотноо тус тус болсон юм байна. Уг ном нь 1980аад оны социалист үеийн хүүхэд нас, 1990ээд оны ардчиллын үеийн шилжилтийн нас, оюутан насны хөгжилтэй үе, мөн Их Британи улсад анх ирж байсан тухай болон талийгаач хүүгийнх нь талаар өгүүлдэг юм. Монгол хүн гэж хэн бэ гэдгийг жирийн хүний аж амьдралаар харуулахыг хичээсэн байна. Ууганаа энэ талаар Их Британий болон Монголын сонин сэтгүүлүүдэд бичиж, мөн радио телевизэд ярилцлага өгч байсан бөгөөд түүний талаар англи хэл дээр BBC News, BBC World Service, BBC Radio 4, BBC Radio Scotland, Talk Europe Radio, Scottish Sunday Express, Daily Record, Ayrshire Post, The Full Potential, SEN Magazine зэрэг сонин, сэтгүүлүүдэд гарч, BBC Mundo дээр испани хэлээр нийтлэгджээ.

Сонсогч танд шинэ 7 хоногийн өглөөний мэнд хүргэе. Миний өглөө подкастын 91 дэх дугаар танд хүрч байна. 91 долоо хоногийн турш хамт байсан сонсогч танд маш их баярлалаа. Бид энэ удаагийн дугаартаа Хүмүүнлэгийн ухааны их сургуулийн Сэтгэл судлалын тэнхимийн багш, сэтгэл судлалын шинжлэх ухааны магистр, сэтгэл зүйч Ж.Оюунсүрэн багштай ярилцлаа.

Миний өглөө подкастын энэ удаагийн дугаарт Япон орон судлаач Э.Чимэдцэрэн оролцлоо. Түүний хувьд 2016 онд МУИС-ийг Япон орон судлаач мэргэжлээр төгсөөд Япон улсын "Иватани техник , бизнесийн мэргэжлийн коллеж"-ын япон хэлний ангийг дүүргэж, "Ёокохама хотын их сургууль"-д хот, нийгэм судлалын судлаач оюутнаар тус тус суралцжээ. Ингээд түүний өглөөг угтах дадал зуршил, япон хэл сурсан арга барилд анхаарлаа хандуулцгаая

Миний өглөө подкастын өнөөдрийн дугаарт Английн нийслэл Лондон хотын төвд оршдог Лондон Соут Банк Их Сургуульд Менежментийн Ахлах Багш, Бакалврын хөтөлбөрийн эрхлэгчээр ажилладаг, Менежментийн ухааны доктор М.Саранзаяа оролцлоо. Энэхүү сургууль 1892 онд байгуулагдаж өдгөө нийт оюутнуудын тоо болон сургуулийн кампусаараа Лондондоо эхний тавд багтдаг том сургуулиудын нэг юм. Түүний хувьд 2017 онд ‘Соёлын болон институцын өөрчлөлтийн нөлөөн доорx Монголын орчин үеийн менежмент’ сэдэвтэй Докторын зэргийг нийгмийн ухааны сургалт, судалгаагаараа дэлхийн эхний 50-д багтдаг Английн Эссэксийн Их Сургуульд хамгаалжээ.

Сонсогч танд шинэ 7 хоногийн мэнд хүргэе. Өнөөдрийн подкастын дугаартаа бид "Монгол Экологи" төв болон "Байгаль орчны манлайлагчид" ТББ-ын зүгээр хамтран зохион байгуулсан "Уур амьсгалын өөрчлөлт ба залуусын оролцоо" сэдэвт хэлэлцүүлгийн үеэр яригдсан илтгэгчдийн онцлох ишлэлүүдийг багцлан хүргэж байна. ИЛТГЭГЧИД

Ургамал судлаач, биологич В.Гүндэгмаа,

"Гайхамшигт говь аялал жуулчлалын холбоо" ТББ-ын тэргүүн Х.Түмэндэлгэр,

TED илтгэгч, Харилцаа холбооны стратегич Б.Хулан,

Sustainable Mongol подкастын үүсгэн байгуулагч, хөтлөгч Н.Энхзул

Эх Дэлхийн цаг үйл ажиллагааны зохион байгуулагч Э.Ганхуяг нар.

Эх дэлхийн тогтвортой ирээдүйн төлөө дуу хоолойгоо нэгтгэж буй эдгээр илтгэгчид байгаль орчны салбарт амьдралаа холбосон түүх, уур амьсгалын өөрчлөлтийн эсрэг өөрсдийн авч хэрэгжүүлдэг шинэлэг санаа, мэдлэг, туршлагаа хуваалцсан юмаа.

Сонсогч танд шинэ 7 хоногийн өглөөний мэнд хүргэе. Миний өглөө подкастын ээлжит дугаар танд хүрч байна. Өнөөдрийн дугаартаа бид "Эх дэлхийн цаг" арга хэмжээг онцолж зочдоо урилаа. Хүн төрөлхтний анхаарлыг уур амьсгалын өөрчлөлтөд хандуулах, уур амьсгалын өөрчлөлттэй тэмцэхэд хувь хүний ойлголт, мэдлэгийг дээшлүүлж, оролцоог нэмэгдүүлэх зорилготойгоор Дэлхийн байгаль хамгаалах сангаас анх 2007 онд санаачлан “Эх Дэлхийн цаг”-ийг зохион явуулж эхэлсэн юм. Энэхүү хөтөлбөр нь жил бүрийн 3 дугаар сарын сүүлийн долоо хоногийн Бямба гаригийн 20:30-21:30 цагийн хооронд зохион байгуулагддаг. Энэ жилийн тухайд цар тахлын улмаас онлайн байдлаар дэлхийн улс орнууд зохион байгуулна. Үүний хүрээнд бид Дэлхийн байгаль хамгаалах сангийн Монгол дахь хөтөлбөрийн менежер Д.Энхээ, Зориг сангийн Байгаль орчны манлайлагчид хөтөлбөрийн 4 дэх элсэлтийн төгсөгч Б.Сэрчмаа нартай ярилцлаа. 

Хүмүүсийг нэг цагийн турш гэрлээ унтрааж, эрчим хүчээ хэмнэхийг уриалдаг бөгөөд хүн бүр эрчим хүчний үйлдвэрлэлээс гарах хүлэмжийн хийн ялгарлыг бууруулахад хувь нэмэр оруулах боломжтой гэсэн утгыг илэрхийлдэг.

Анх 2007 онд Австралийн Сидней хотоос гараагаа эхэлсэн “Эх Дэлхийн Цаг”-ийг жил ирэх тусам олон зуун сая хүн нэгдэж байгаа бөгөөд Монгол улс Эх дэлхийн цагт 2010 онд албан ёсоор нэгдэн орж, 2010 оны 03 дугаар сарын 26-нд Улаанбаатар хотод “Эх дэлхийн цаг” анх удаа зохион байгуулагдаж нийт 4000 орчим хүн оролцсон байдаг. Харин энэ жилийн тухайд илүү олуулаа, онлайн байдлаар оролцох боломж бүрдэж байгаа юм байна.