Mizzima 108FM ၏ အောက်တိုဘာလ ၁၃ ရက် နားဆင်ခံစားဆောင်းပါးများအစီအစဉ် 

Politics on Mizzima 108FM October 13  

စစ်အုပ်စုအထိနာတဲ့ D-Day ခေါ်ပြီး တစ်လတာ ပြည်သူ့ခုခံစစ်

ပြည်သူ့ခုခံတော်လှန်စစ်ဟာ D-Day ခေါ်ပြီးကတည်းက အားကောင်းလာတာဟာ တစ်လတာအတွင်း အရှိန်တိုးသထက် တိုးလာနေပါတယ်။ လက်နက်ကိုင် တိုက်ပွဲဖြစ်တဲ့အတွက် ပြည်သူ့တော်လှန်ရေးသမားတွေဘက်မှာ ထိခိုက်မှုတွေ ရှိသလို စစ်အုပ်စုဘက်က ထိခိုက်သေဆုံးမှုတွေကလည်း အတော့်ကို များလာပြီ ဖြစ်ပါတယ်။စစ်အုပ်စုဟာ နိုင်ငံအလယ်ပိုင်း စစ်ကိုင်း၊ မန္တလေး၊ မကွေးတို့မှာ အင်အားအလုံးအရင်း သုံးပြီး ထိုးစစ်ဆင်တိုက်ခိုက်နေတာကြောင့်လည်း ပြည်သူ့ ခုခံတော်လှန်စစ်က ပိုပြီးတော့ အားကောင်းလာနေပါတယ်။ NUG အစိုးရနဲ့ ပူးပေါင်းနေတဲ့ ချင်းအမျိုးသားတပ်ဦး - CNF နဲ့ ချင်းပြည်အခြေစိုက် ပြည်သူ့ကာကွယ်ရေးတပ်ဖွဲ့တွေ အားကောင်းမှုက မြေပြန့်တော်လှန်ရေးအင်အားစုတွေနဲ့ ချိတ်ဆက်မိသွားရင် ထိန်းမရတော့မှာကို စိုးရိမ်တဲ့အတွက် စစ်အုပ်စုဟာ နိုင်ငံအလယ်ပိုင်းဒေသတွေမှာ အင်အားသုံး ထိုးစစ်ဆင် ဖြိုခွဲနေတာလည်း ဖြစ်ပါတယ်။