Moiesstudio

Kiermes wéi fréier – dat ass de Motto an der Gemeng Stroossen. Dat heescht, blénkeg Knuppautoen, grell Luuchten a faarweg Plastik-Spillsaachen, wéi een et villäicht vun der Schueberfouer kennt, ginn et hei keng. Dofir lackelt d’Stroossener Kiermes d’Leit mat traditionelle Spiller: Wat genau kann ee sech hei drënner virstellen?

Amplaz 5 Deeg an der Woch 8 Stonnen ze schaffen, géif een der Propos vum Aarbechtsminister no just 4 Mol an der Woch op de Büro fueren, an dann awer 10 Stonne laang bleiwen. Wat sinn d'Gefore bei esou engem Modell?

Méi wéi 50 Joer hunn se d'Bild zu Beidler an der Gemeng Jonglënster gepräägt. Elo ginn d'Sendemasten vun enger Spezialfirma aus Däitschland an enger spektakulärer Aktioun gesprengt.

De belsche Kinnek wëllt haut matdeelen, ob hien dem Premier Bart de Wever seng Demissioun unhëllt. Mir schwätze mat eiser Korrespondentin Agathe Cherki.

De Mouvement Écologique huet de Projet “Odyssée pour notre santé “ empfangen. An deem Kontext goufen et och Temoignagë vu Persounen, deenen hir Kriibs- oder hir Parkinson-Krankheet a Frankräich als Beruffskrankheet unerkannt gouf. De Grond dofir: Si hunn alleguerte mat Pestizide geschafft.

D'Anne Frausing huet e Buch iwwer hir Aarbecht am Centre de Primo-Accueil Tony Rollmann geschriwwen. Si erzielt eis iwwer hir Erfarungen.

Eng Geschicht erfannen, Figuren zeechnen an alles zu engem Buch zesummesetzen – an dat a just 24 Stonne Kreativaarbecht. Beim BookAthon vum Service national de la jeunesse hunn 30 Jonker tëschent 14 a 27 Joer zéng Bicher fir Kanner bis véier Joer entwéckelt. De Chris Meisch huet eng Ekipp am Forum Geesseknäppche begleet a mam Sofia, Kayla a Joya geschwat. Déi dräi weisen, wéi aus der Iddi vun engem Delfin, dee säin Doheem schütze wëllt, e Kannerbuch entsteet – a firwat dobäi net nëmme Kreativitéit, mee och Teamaarbecht an Zäitmanagement gefrot sinn.

De Staatsrot huet ee Gesetzesprojet vum Inneminister iwwer dat automatescht Erkenne vun Immatrikulatiounsplacken duerchfale gelooss. Wat si genee d’Kritikpunkten a wéi geet et elo weider? Froen un d'CSV-Deputéiert Stéphanie Weydert.

2013 ass Kroatien Member an der EU ginn. Zënterhier ass d’Europäesch Unioun net méi gewuess.

Virun der Dier stinn zéng Länner, déi Interêt ugemellt hunn. Eent dovun, Montenegro, huet reell Chancen an zwee Joer den 28. Member vun der EU ze ginn.

Dat huet d’Europäesch Kommissioun dem klenge Land um Balkan gëschter offiziell attestéiert - an hirem neie Rapport iwwer d’EU-Erweiderung, dee gëschter presentéiert gouf.

D’Zensure falen net fir all d’EU-Kandidate gutt aus, mee och un deenen, déi ewéi d’Tierkei eng Datz kréien, ass d’EU weider interesséiert.

D’Danièle Weber doriwwer, wou den Erweiderungsprozess vun der Europäescher Unioun drun ass.

Mir froen eise Korrespondent Philip Crowther.