ကျွန်မကတော့ ငယ်ရွယ်သူဖြစ်တာနဲ့အညီ စွန့်စားချင်တယ်။ တော်လှန်ချင်တယ်။ မတရားမှုကို မကြိုက်ဘူး။နောက်တော့ ကျွန်မတို့ သတင်းဌာနရဲ့ စီစဉ်ပေးမှုနဲ့ လွတ်မြောက်နယ်မြေထဲမှာ အခက်အခဲတွေကြားက သတင်းတင်ဆက်ခဲ့တယ်။ အဲ့ဒီ့မှာ မလုံခြုံတော့လို့ နောက်ဆုံး တစ်ဖက်နိုင်ငံကို အခက်အခဲ မျိုးစုံကြားကနေ ခိုးကြောင်ခိုးဝှက် အထောက်အထားမဲ့စွာ ဝင်ခဲ့ရတယ်။ အဲဒီမှာစပြီး ခံစားမိတာက ကျွန်မတို့မှာ ဘာအပြစ်ရှိလို့ ဒီလိုမျိုး မလုံမခြုံနဲ့ ခိုးကြောင်ခိုးဝှက် နေနေရတာလဲ။ တစ်ဖက် အိမ်နီးချင်းနိုင်ငံကို ရောက်ခါစက ဘာအထောက်အထားမှ မရှိတဲ့အတွက် ကျွန်မ အပြင် မထွက်ရဲခဲ့ဘူး။ မိုးလင်းကနေ မိုးချုပ် အလုပ်ထဲမှာပဲ အချိန်ကုန်ရင်း အလုပ်နဲ့ အိပ်ခန်း၊ အိပ်ခန်းနဲ့ အလုပ်သာ ကမ္ဘာတစ်ခု ဖြစ်ခဲ့တယ်။