Naja LG

Thontest… 1,2,3 – ja, es stinkt! Im Hause Vivi gaht es Thonsandwich-Lüftli ume – d’Kleo isch da! Und mitenand rededs über es gmeinsams Wuchenend im Piemont, d’Vivi vezellt no e vergesseni Gschicht us ihrne Summerferie und d’Kleo vomene Solo-Kinobsuech. Usserdem beantwortet’s d’Frag, wie Selfcare für sie usgseht, wenn und wie sie vo Dihei uszoge sind, was sie eigentlich für en Wuchetag wäred und bi wellere Promi-Hochziit sie gern debii gsii wäred. Apropros debii sii: Liest eigetli irgendöpper die Beschriebige amigs? Lönds mich wüsse. Und mit mich mein ich d’Vivi. Ich ha ja mal en Lehrer gha, wo ide Ufzgi-Materialie amigs Code-Wörter versteckt hett und wemmer die im Unterricht inere Antwort heimlich ihbunde hett, hett mer es Schoggistängeli übercho. Lustigi Gschicht, oder?! Herr Meisterhans – absoluti Legende. Naja, das wär’s gsii für hüt. Hebed en Schöne und bis Endi November!

Two trailerpark girls go round the Podcastmikrofon – und au wenn d’Kleo die Folg am liebschte usfalle lah hett, muess mer sege, hett sie doch alles, was es so brucht für zwei chlini Gschichtli-Erfindo: Diskussione über Arbetsverhältnis und Machtstrukture, lustigi Erlebnis bi WG-Castings, romantischi Ihblick ide Vivi ihri Summerferie, nervigi Ohrwürmer vo Internetsongs und e Lobeshymne an moderne Feminismus ide Popkultur – wir machen’s cool, dass ihr euch Fotze nennt. I dem Sinn: Erhebed eui Kafis, Tee’s und Spassgetränk – uf eu, ihr Schnügelbööge – söll gelte!

Vom Ahfang vo dere Folg wett sich d’Autorin vo dem Text distanziere. D’Vivi und d’Kleo hoffed jedefalls, dass eue Tampon guet sitzt. Naaaaja. Die beide vezelled vo ihrere Reis id Niederlande, reded über de Kleo ihre Start id Lehr und beantworted wiedermal paar Frage usem Publikum: Welli Filmposter hanged bide Vivi ide Wohnig? Wie isch ihres ERSCHTE MAL gsii (im Europapark)? Und au di namensgebendi Frag vo dere Folg wird diskutiert: Wenn Merch?! Wir gehen rein.

Wösch mache, Rucksack packe, Nägel lackiere, Podcast ufneh – was mer halt so macht am letschte Tag vor de Ferie. Churz bevor d’Vivi und d’Kleo uf ihren gmeinsame Trip uf Holland gönd (HAHA, TRIP WEGE HOLLAND) widmed sie sich anere neue Folg Naja LG. Sie bespreched, was sie ide Ferie unbedingt erlebe wennd, was sie vom neue Nolan-Film halted, was e gueti Änderigsschniederei usmacht und fröged sich, wo dass eigentlich das Jahr ane isch?! Bald, bald fangt d’Kleo ihri Lehr ah, d’Vivi wird für d’Winterthurer Musigfestwuche wieder id Steibi zügle und es wird nomal so richtig de Pavarotti gmacht. Andiamo!

Hebed eu am Bänkli, d’Nina macht es Ränkli. Und zwar eis, wo ihres Lebe uf de Chopf stellt. I dere Folg verchündet sie, warum di letschte Mönet sehr intensiv und vonere wichtige Entscheidig prägt gsii sind. Und d’Vivi ist auch dabei. Halt wükli. Wie sich’s ghört für beschti Fründinne. Nacheme Life-Update und chli Gschnädder, beantworted di beide denn Frage rund um Summer, Strandtäg und Reise. Welles Land die beide gar nöd reizt, was uf ihrere Summer-Bucketlist staht und welli (Hör)-Buech Tipps i ihrne Ärmel stecked, sind es paar vo de Theme i dere Folg. Cremed eu ih, trinked gnueg und gnüssed die Podcastfolg irgendwo, wo’s hoffentlich gmüetlich und gnueg chüehl isch. Das ist die perfekte Welle, das isch die perfekti Folg. Aso, fasch.

Hüt isch schwierig, hends denkt. Aber Podcast is doing it’s magic und d’Kleo und d’Vivi hend denn doch zimmli schnell de sogenannti Rank gfunde und sich vode letschte paar Wuche vezellt: Vom gmeinsame Plansche ide Töss (inklusive Uftritt Badeschueh), vo Ferie z’Wien und eme Churztrip uf STUGGERT (männlich und bsoffe für Stuttgart). Sie reded über gmeinsami Ferieplän, Fleischchäs, Dünn sii uf Social Media, s’geilste Thai-Restaurant z’Winti und denked luut über d’Zuekunft vo ihrem Podcast nah – lohnt sich’s no wiiterzmache? Wird’s je wieder en Live-Podcast geh? Liest überhaupt öpper die Caption? Hender Tipps für Den Haag & Rotterdam? Und wie chömed mir schnell und günstig döt ane? Melded eu. Mir freued eus. LG, euri beide Gourmöse!

Wer sich i die Folgebeschriebig verirrt hett, ide Hoffnig, da en Antwort uf d’Frag im Titel z’finde, de oder die müemer leider enttüsche. Clickbait isch Clickbait – sind froh, isch die Folg nöd hinder ere Paywall. Jeeeedefalls lueged d’Vivi und d’Kleo i dere Folg zrugg uf es kunterbunts Geburtstagsfäschtli und vezelled eu, welli Cypher-Parts sie das Jahr zum lache bracht hend und bi wellne fasch es paar Tränli gflosse sind. Denn werded paar cringe Bewertige gspitted und es erwarted eu wie gwohnt Samples vo Internetperle. Ach und d’Vivi vezellt no, dass sie churzerhand es neus Festival gründet hett – aso, fascht. PS: S’Ristorante Italia hett a dem Abig komplett verseit und mir sind im Rote Delfin glandet – meh dezue denn ide nächste Folg… Vilicht.

Welle Oscar würsch am liebste günne? Muess mer de Timothée Salamé cancle? Spukts wükli im Coop am Stadelhofe? Wie hend sich denn etz d’Lüüt im Mittelalter gweckt?! Was, wemmer sich in Sache Hürate nöd einig wird? Was füres Hölle-Werk isch de Globi-Film? I weles rabbit hole isch d’Kleo wieder gheit? Zwüsched wellne Internetperle cha sich d’Vivi dasmal nöd entscheide? Und werded di beide eines Tages wieder normal chöne sege: «SO GEIL!»?!  Wer, wie was, wieso, weshalb, warum? Wer nicht hört, bleibt dumm.

He, so geil! Geil wie Zahreinigung am Mäntigmorge, wie 30 Kilometer z’Fuess zrugglegge, wie s’alte Tramdepot z’Bern. Geil wienes Boomer-Theater ame Fritigabig, wie Schach spiele ufem Handy, wienen Vogel im Briefchaste. Geil wienes neus Roman Empire, wie lustigi Hate-Kommentär, wienen Ohrwurm, wie Ice Tea Lemon und vor allem: Geil wiene neui Folg Naja LG! Das isches doch, oder Claudia?! Mir finded scho. Und bitte, und los!

«Alles glänzt so schön neu» - aber kei Angst! D’Vivi und d’Nina hend ihres Studio nöd verbrennt und d’Asche nöd wie Koks gschnupft. De Peter Fox macht da sis eigene Ding. Di beide started aber miteme neue Cover i ihres 3. Podcastjahr. Es wird verhältnismässig früeh im Podcast über s’Mittelalter gredet, uf Wiehnachte und Silvester zruggglueget, Danger Dan zitiert und endlich wiedermal di eint oder ander Frag vom Publikum beantwortet. Usserdem werded ihr mitgnoh uf e Reis anes DJ Bobo Konzert im Europapark. Und last but not least fiired d’Vivi und d’Kleo de Uftakt vonere neue Rubrik: D’Internetperle chunnt es Gschwüsterti über – wir gehen rein!