Dögg Patricia Gunnarsdóttir er gestur þáttarins en hún útskrifaðist frá Listaháskóla Íslands í fyrra sem fatahönnuður. Við ræddum BA ritgerðina hennar þar sem hún skrifaði um mögulega framtíð í textílhönnun þar sem bakteríur koma til sögunnar. Dögg hafði haft áhuga á því að skoða nýjar leiðir til þess að sporna við þessari miklu neyslu sem er í tískuiðnaðinum og fór stuttlega yfir ferlið sem þarf til þess að búa til einn bómullarstuttermabol. Grænþvottur kom eins og svo oft áður til umræðu, en hann spilar stórt hlutverk í blekkingu stórfyrirtækja sem reyna að villa um fyrir neytendanum um uppruna vöru og hvað verður um hana þegar við hættum að nota hana. Þá ræddum við einnig þá hugarfarsbreytingu sem þarf að eiga sér stað og felur í sér hvernig við sem neytendur þurfum að endurhugsa neyslu okkar.

Í þættinum ræði ég við Elfi Sunnu Baldursdóttur, myndlistarnema, en hún búsett í Amsterdam, við ræðum plastneyslu og hún deilir með okkur þeim leiðum sem hún fer til þess að lifa umhverfisvænna lífi. Elfur hefur búið á hinum ýmsu stöðum, þar á meðal Berlín, Amsterdam, Reykjavík og Akureyri og við veltum fyrir okkur hver munurinn er þar á þegar kemur að flokkun á heimilissorpi. Þar eru farnar ólíkar leiðir, en við komumst að því að þessir staðir eigi það sameiginlegt að alltaf er ábyrgðinni komið yfir á neytandan. Hann á að passa upp á að flokka heima hjá sér, en á móti virðist vanta að verslanir og fyrirtæki taki ábyrgð sín megin og hætti að nota plast og aðrar einnota pakkningar í svo miklu mæli.

Hópurinn Endurhugsa er gestur þáttarins í dag, en hann samanstendur af þeim Ágústu Gunnarsdóttur, Jóhönnu Ásgeirsdóttur og Vigdísi Bergsdóttur og við ræðum umhverfisvitund og verkefni þeirra saman í skapandi sumarstörfum í Kópavogi síðastliðin tvö sumur. Við veltum því fyrir okkur hvað þægindi séu í nútímasamfélagi og hvað við þurfum í raun og veru til þess að lifa af. Einnig ræðum við hversu mikil breyting hefur verið frá því að við vorum í leik- og grunnskóla og hvernig umhverfis-uppeldið er að byrja nú fyrr en áður.

Sóla Þorsteinsdóttir er gesturinn að þessu sinni og við ræðum skrif hennar á veftímaritinu Flóru sem fjalla meðal annars um móðurhlutverkið á tímum loftslagsbreytinga og hvernig við sem erum líklegri til þess að gera eitthvað eða styrkja málefni ef við vitum að við græðum á því sjálf. Við ræðum einnig sinnuleysi stjórnvalda á Íslandi og heiminum öllum og hvað er hægt að gera til þess að sporna við þessu áframhaldandi ástandi, þar sem að stjórnvöld lofa miklu en gera lítið.

Eyja Orradóttir er gestur þáttarins og við pælum í veganisma út frá umhverfinu. Þá veltum við fyrir okkur stöðu veganisma á Íslandi sem og vegan fatnaði þar sem að hann er gjarnan búinn til úr gerviefnum (þar á meðal plastefni) sem skila sér í sjóinn við þvott. Einnig ræðum við kjötneyslu og hvort að það þurfi að verða breyting á viðhorfi fólks gagnvart kjöti að því leiti að það verði flokkað sem lúxusvara, vegna þess hve mikil áhrif ræktun dýra hefur á umhverfið.