【詩名】：年兜

【作者】：韓滿

【詩文】：

年兜的跤步愈來愈近

日頭的喙鬚愈來愈長

故鄉的田塗愈來愈芳

逐家轉來鼻田塗味

外口鬧熱滾滾

內面冷吱吱

慣習泡二杯咖啡

年兜暝那啉那等你

干焦聽著老時鐘滴答滴

小小的溫度燃著過去

拍開柔柔的旋律

一人一杯一杯閣一杯

月娘也醉也綿綿

多情守到天光

智慧佮感情畫平行線

春天一走二十晃

你若重出世

你若無啉孟婆水

阮欲揣你講過去

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。