Die Amerikaanse president, Donald Trump, sê hy gaan die sanksies ophef wat meer as ʼn dekade gelede teen Sirië ingestel is.

Kry die nuus soos dit breek.

Lüderitz het môre tussen 8-uur en 3-uur 'n geskeduleerde wateronderbreking weens dringende herstelwerk aan die dorp se belangrikste watertoevoerpyp. Volgens NamWater kan lae waterdruk tot volgende week verwag word. Kosmos 94.1 Nuus het gesels met die dorpsraad se segsman, Elwin !Gaoseb, wat meer inligting gee.

Die uitvoerende hoof van Orania Joost Strydom het met Matt Gaetz op One America News gepraat oor kommer oor kommunisme en sê skole en myne is reeds genasionaliseer.

RISE Mzansi sê die Departement van Grondhervorming en Landelike Ontwikkeling het onthul dat hy sedert die begin van die 2024/'25-boekjaar meer as 217-miljoen-rand in 287 eise betaal het. Hiervan was 14 produktiewe plase ten tyde van die skikking. Die departement het tussen 2014 en 2024 nie 'n enkele stuk grond onteien nie. Makashule Gana van RISE Mzansi sê dié inligting slaan weereens die waninligting oor die Onteieningswet in die wind:

President Donald Trump sê die verhouding tussen Amerika en Saoedi-Arabië is ʼn basis van sekuriteit en voorspoed. Hy het gister begin met die eerste deel van ʼn vierdaagse diplomatieke toer na Saoedi-Arabië, Katar en die Verenigde Arabiese Emirate. Trump het talle ooreenkomste met Saoedi-Arabië se regering onderteken, wat militêre samewerking insluit. Hy het in Riaad tydens ʼn beleggingsforum tussen dié twee lande Iran beskuldig dat hy die streek vernietig en bloedvergieting in ander lande befonds:

Voormalige werknemers van Air Namibia is weer op die voorgrond met die moontlike herlewing van ‘n nasionale redery. Die groep het geweldige uitdagings met goed soos belasting en meer, met die likwidasie van Air Namibia wat nog nie afgehandel is nie. ‘n Vergadering is Maandag gehou met die regering en die verteenwoordiger van die groep, Renier Bougaard het met Kosmos 94.1 Nuus gepraat.

Die vakbondfederasie Cosatu sê dis kommerwekkend dat die werkloosheidsyfer in die eerste kwartaal van vanjaar tot 32,9-persent gestyg het. Matthew Parks van Cosatu sê Statistieke SA se verslag dat drie uit vier jongmense werkloos is, is ontstellend en hy doen ’n beroep vir dringende hervorming om werksgeleenthede te skep. Hy pleit vir ’n grootskaalse uitbreiding van openbare werksprogramme, vaardigheidsopleiding en vakleerlingskappe in die privaat sektor:

Casandra, oftewel Cassie, Ventura het verskyn as die belangrikste getuie in die sekshandelverhoor van Sean "Diddy" Combs in New York. Die 55-jarige Combs is aangekla van rampokkery, sekshandel en die vervoer van persone om aan prostitusie deel te neem. Hy het skuld ontken. Die agt-maande swanger Ventura, die hip-hop-mogul se eks-meisie, het emosionele getuienis gelewer en beweer dat hy haar mishandel en beheer het tydens hul verhouding. SkyNews se Martha Kelner berig uit New York.

President Cyril Ramaphosa sê die groep van 49 wit Afrikaners wat na Amerika vertrek het, is volgens hom ongelukkig met pogings om die verlede se ongelykhede aan te spreek. President Donald Trump het hulle vlugtelingstatus toegeken as slagoffers van wat hy ʼn volksmoord noem. Die president het gister ʼn verrassingsbesoek gebring aan die jaarlikse Nampo-oesdag naby, Bothaville in die Vrystaat. Ramaphosa sê Suid-Afrikaners is veerkragtig en hardloop nie weg van hul probleme nie: