Die Verkiesingskommissie van Namibië het sy verkiesingskalender en Raak Betrokke-veldtog bekend gestel vir die plaaslike en streekraadverkiesings op 26 November. Aanvullende kiesersregistrasie vind plaas van 1 tot 14 Augustus vir nuwe kiesers en adresveranderings. Die verkiesingsuitslae word op 30 November verwag. Kosmos 94.1 Nuus het gepraat met De Wet Siluka, die Verkiesingskommissie se woordvoerder, wat beklemtoon dat dit belangrik is om te gaan stem.

Die lynminister, Lucia Iipumbu, sê dat Namibië se komende elektroniese identiteitskaarte landsburgers in staat sal stel om toegang tot noodsaaklike dienste te verkry sonder om die fisiese ID-kopie te toon. Die digitale ID-inisiatief, wat in vennootskap met die VN se ontwikkelingsprogram bekendgestel is, vorm deel van die land se breër strewe na digitale transformasie en verbeterde dienslewering.

Geslagsgeweld bly 'n ernstige probleem in Namibië, maar die #EndGBVNamibia-veldtog bemagtig gemeenskappe om dit te konfronteer. Oshana-goewerneur Elia Irimari het ouers versoek om skadelike tradisies wat meisies stilmaak, te verwerp. Hy sê dat sulke praktyke 'n kultuur van minderwaardigheid bevorder, maar dat mans ook ly onder geslagsgeweld. Kosmos 94.1 Nuus het met die sosiale aktivis Ethne Mudge gepraat.

In haar eerste 100 dae het president Netumbo Nandi-Ndaitwah reeds Namibië se regering hervorm, haar kabinet van 21 tot 14 verminder, 'n vroue-meerderheid leierskapspan ingestel, gratis universiteitsonderrig vir 2026 belowe, en 'n ambisieuse teenkorrupsie en ekonomiese diversifikasieveldtog van stapel gestuur wat daarop gemik is om 500 000 werksgeleenthede te skep en streeksinvloed te versterk. Kosmos 94.1 Nuus het reaksie ontvang van politieke ontleder Ndumba Kamwanyah.

Die Europese Unie het vyf 30-ton-veevragmotors ter waarde van 20,68 miljoen Namibiese dollar aan die ministerie van landbou geskenk om die noordelike gemeenskaplike veewaardeketting te versterk. EU-ambassadeur Ana Beatriz Martins het gesê die vragmotors dui op beter markte, laer vervoerkoste en sterker landelike ekonomieë. Die ministerie se uitvoerende direkteur, Ndiyakupi Nghituwamata, het dit 'n tydige oplossing vir 'n groot uitdaging genoem: vervoer.

Die loongeskil tussen die heersende Afrikabeker-kampioene vir vroue, Banyana Banyana, en die Suid-Afrikaanse Sokkervereniging is opgelos. Banyana het geweier om in Marokko te oefen weens onbetaalde salarisse en kampoefen-geld van SAFA. Die span berei voor vir die toernooi wat op 5 Julie begin. Die SAFA visepresident, Linda Zwane, het na afloop van die vereniging se kongres in Sandton erken Maart-bonusse is nie betaal nie en gesê die saak is afgehandel:

Boere in die Stampriet-bekken het skriftelike besware teen die hernuwing van omgewingsklaringsertifikate vir eksplorasiebedrywighede deur Headspring Investments ingedien. Die maatskappy se agt lisensies verval in Augustus vanjaar en moet dus hernu word. Headspring se boorpermitte is egter deir die landbouministerie teruggetrek en al word die sertifikate hernu, sal die maatskappy nie sy bedrywighede kan voortsit nie. Kosmos 94.1 Nuus het gepraat met Aldo Hengari, die bedryfsdirekteur van Headspring Investments.

Die GOOD Party het die DA se onttrekking aan die Nasionale Dialoog gekritiseer en noem dit politieke teater gemotiveer deur partybelange. Die sekretaris-generaal, Brett Herron, sê die DA se optrede ondermyn pogings om Suid-Afrika se werklike uitdagings aan te spreek. Hy sê dialoog in plaas van onttrekkings is nodig vir vordering en beskuldig die DA van skynheiligheid en mediagedrewe optrede. Herron doen 'n beroep op vennote in die regering van nasionale eenheid om te fokus op inklusiewe regering, deursigtigheid en die lewering van oplossings vir Suid-Afrikaners:

Die Interpol-misdaadambassadeur, Andy Mashaile sê die inhegtenisneming van die hoof van misdaadintelligensie, Dumisani Khumalo is rede tot ernstige kommer vir wetstoepassing. Khumalo en ses ander is Donderdag in hegtenis geneem op aanklagte van bedrog en korrupsie. Die Pretoria-landdroshof het borgtog van 10 000 rand aan vyf van die beskuldigdes toegestaan, terwyl een beskuldigde in aanhouding bly vir soortgelyke aanklagte in 'n ander saak. Mashaile het aan SABC News gesê dis jammer dat die vertroue in misdaadintelligensie skipbreuk ly:

Die DA sê die party oorweeg 'n mosie van wantroue teen president Cyril Ramaphosa en beskuldig hom dat hy ministers beskerm wat van korrupsie aangekla is. Die DA-leier John Steenhuisen het ook die party se onttrekking aan die Nasionale Dialoog aangekondig en noem dit 'n verkwistende ANC-verkiesingsfoefie. Dit volg na die afdanking van die voormalige adjunkminister van Handel en Nywerheid, Andrew Whitfield, na 'n ongemagtigde VSA-reis. Steenhuisen sê die dialoog is nou 'n mors van tyd en waarsku Ramaphosa sy leierskap van die regering van nasionale eenheid is in gevaar: