OPEN HEAVENS

MATALA LE LAGI MO LE ASO SA 11 IANUARI 2026

(tusia e Pastor EA Adeboye)

Manatu Autu: O ai ea le tagata 1 ?(What is man? 1)

Tauloto Tusi Paia: Kenese 1:26 “Ona fetalai ane lea o le Atua, “‘Inā tatou faia ia o le tagata i lo tatou fa‘atusa, ‘ia foliga ‘iā i tatou, ‘ia pule fo‘i i latou i i‘a i le sami ma manu felelei, ma manu vaefā, ma le lau‘ele‘ele uma, ‘atoa ma mea fetolofi uma e fetolofi i le ‘ele‘ele.”

‭‭

Faitauga - Tusi Paia:  Salamo 8:3-9

A e vaai i fetu, o le masina ma le matagofie o le foafoaga, e faigata ona e le manatu poo le a le tulaga taua o le tagata i le Atua ua manatu mai pea iai. O le tulaga tonu lava lea na fesili ai i le fuaiupu 4 o le faitauga o le Tusi Paia o le asō. 

Mai le tauloto o le asō, ua tatou iloa ai na faia i tatou e le Atua i lona faatusa ma aumaia le pule iai tatou i le lalolagi (Kenese 1:26-28). O lona uiga o oe ma au ua tuuina mai iai e le Atua le pule i le lalolagi. E lei gata ai iina le Atua, na ia faaopoopo ma faapea mai i le Mataio 18:18 e na te faataunuuina tatou folafolaga i le lalolagi nei mai lona nofoalii i le lagi. Peitai, ina ua agasala le tagata, ua ia le toe maua lea tulaga ma aveesea le pule na avatu iai e le Atua mai le amataga o le foafoaga. O le mafuaaga lea na auina mai ai e le Atua lona atalii, Iesu Keriso, e toe faafoisia i tatou i le uluai tulaga na faia ai i tatou ma toe faafoisia le tulaga pule. 

Afai ua e talia Iesu e avea ma ou alii ma faaola, ua avea oe ma se tagata e sili atu i mea uma i lenei lalolagi (1 Ioane 4:4). Afai e te lei talia Iesu e avea ma ou alii ma faaola, ou te fautuaina oe e faia loa i le taimi nei. Aua foi a e tuulafoai i le agasala, e le toe pulea oe e mea e tutupu ae o le a e pulea mea e tutupu. E le toe fua i le tamaoaiga le mea e tupu ia te oe, ae o le a e tuputupu pea e aunoa ma se aafia i le tulaga o le tamaoaiga. 

O le tiapolo ma ana temoni, e fefefe i fanau a le Atua aua latou te iloa, ua faia e le Atua e nonofo faatasi lana fanau ma Iesu i mea oi le lagi e sili atu i alii sili ma faipule i le agaga (Efeso 2:4-6). O le mafuaaga lea afai e sau se tagata ou te lē masani ai ma fai mai ou te tatalo mo ia, o lau fesili muamua i lea tagata, ‘ua e faaolaina?’. Afai e lei faaolaina lea tagata, tusa pe ou te tatalo mo ia ma ua foia lona faafitauli, e ono sili atu le leaga o le mea e oo iai aua o lea tagata o loo lamatia pea e le tiapolo. 

Le au pele e, o le faavae o soo se fofo i ni faafitauli o Iesu Keriso. E tatau ona e salamo mai soo se agasala i lou olaga ma talia Iesu Keriso e avea ma ou alii ma faaola pe afai e te lei faia lava. Ia mautinoa o loo e ola faapaiaina e ala i le ola i lana upu ma usitai i ana faatonuga. A e faia, o le a e fiafia i le manuia ma e soifua e te pulea soo se luitau po’o se faafitauli e oo mai i ou ala. O le uluai fuafuaga a le Atua mo oe, o le nofo tupu e sili atu i soo se faatauli, i le suafa o Iesu, Amene.