OPEN HEAVENS

MATALA LE LAGI MO LE ASO GAFUA 12 IANUARI 2026

(tusia e Pastor EA Adeboye)

Manatu Autu: O ai ea le tagata 2 ?(What is man? 2)

Tauloto Tusi Paia: 1 Peteru 2:2 “Fa‘apei o tama meamea fa‘ato‘ā fānau mai, ‘ia naunau ‘outou i le suāsusu fa‘aleagaga e lē suia, ‘ina ‘ia ‘outou tutupu ai i le fa‘aolataga.”

‭‭

Faitauga - Tusi Paia:  Kalatia 4:1-5

O ananafi, sa ou faamatalaina le uluai fuafuaga a le Atua mo le tagata e pule i le lalolagi ma mea uma o iai, peitai na lē toe maua e le tagata lea pule ina ua oo mai le agasala, ae na afio mai Iesu Keriso ma toe faafoisia i tatou i le uluai tulaga. Na ou faamatala foi, a e fanau fouina loa, e te sili atu i mea uma i lou siomaga auā e sili o ia ‘ua ‘iā te ‘outou, i lē ‘ua i le lalolagi (1 Ioane‬ ‭4‬:‭4‬). O le faanoanoaga, o le toatele o kerisiano o loo ola pea i saisaitiaga a le tiapolo. Ua latou maua le pule e pei ona uluai faia ai i latou e le Atua, peitai latou te le faatinoina lenei pule. 

Le au pele e, e le mafai ona e faatinoina lenei pule i lou tulaga o se pepe poo se tama meamea. Fai mai le Kalatia 4:1 “Ou te fai atu fo‘i, o aso uma o itiiti ai le suli, e ui lava o ia e ana mea uma, e leai se mea e ‘ese ai o ia ma le pologa.”

O le faatinoina o lou tulaga o se atalii poo se afafine o le Atua, e tatau ona e tupu i le Agaga e ala i le tatalo ma suesue faifaipea ma le filiga i le upu a le Atua. E toatele kerisiano e talai ma fai mai ua tele tausaga talu ona faaolaina, peitai i le agaga, o loo pepe pea olaga aua e le o tutupu ae i lo latou tulaga e tatau ona iai. O nisi kerisiano e tatau ona tutupu a’e i le agaga i le tulaga ua tatau ona latou faatutuina tagata mai le oti e ala i le faauuga a le Atua i o latou olaga. Peitai e lei maua lava le loto toa e mafai ai ona faaloaloa o latou lima i luga o se tagata o loo tigā le ulu. 

I lou tulaga o se atalii poo se afafine o le Atua, ia e matua naunau i le upu a le Atua aua o le meaai lea e te manaomia e te tuputupu ai faaleagaga. Fai mai le 1 Peteru 2:2 “Fa‘apei o tama meamea fa‘ato‘ā fānau mai, ‘ia naunau ‘outou i le suāsusu fa‘aleagaga e lē suia, ‘ina ‘ia ‘outou tutupu ai i le fa‘aolataga.”

Na fetalai foi Iesu i le Mataio 4:4 e lē na o meaai e ola ai le tagata ae o afioga uma e tulei mai le fofoga o le Atua. 

Le au pele e, afai e te fia savali ma le pule e pei ona faia ai oe e le Atua, e tatau ona e ola ma soifua i le upu a le Atua e pei ona e ola ma maua le malosi mai meaai o loo e tausami ai. E pei lava o Ieremia, na faapea mai na ia ai i afioga a le Atua ( Ieremia 15:16), e tatau ona e ai i le upu a le Atua e sili atu i lou ai i meaai i le tino. E tatau foi ona e tatalo faifai pea. O le mea moni, a e suesue i le upu a le Atua e faifaipea, e uunaia ai oe e tatalo aua a e suesue, o le a e iloa ai, lou naunau e te fia talanoa i Lē e ona le upu o loo e suesue iai. Ave le faamuamua i le mafuta ma le Atua e ala i le tatalo, suesue i lana upu ona e savali lea i le tulaga pule i soo se vaega o lou olaga, i le suafa o Iesu, Amene.