OPEN HEAVENS

MATALA LE LAGI MO LE ASO LULU 14 IANUARI 2026

(tusia e Pastor EA Adeboye)

Manatu Autu: O ai ea le tagata 4?(What is man? 4)

Tauloto Tusi Paia: 1 Peteru 5:7 “Ia tu‘uina atu ‘iā te ia mea uma tou te popole ai, auā o lo‘o manatu mai o ia ‘iā te ‘outou.”

‭‭

Faitauga - Tusi Paia: Filipi 4:4-7

E matua taua le tagata aua e mafai ona afio ai le Agaga o le Atua i totonu ia te ia. O se mea e pito sili ona matagofie aua e matuā matautia le Atua, o le lagi o lona palealii a’o le lalolagi e tuu ai ona aao ( Isaia 66:1), peitai na finagalo e tuu o ia maualalo e afio i totonu o i tatou (Ioane 14:16-17). I le Esoto 25:1-9, na faatonu e le Atua Mose ia fausia le malumalu e afio ai lona mamalu. Peitai, ina ua maea ona maliu Iesu mo tatou agasala, na ia faia lana fanau uma ma malumalu e afio ai. O lona uiga afai o oe o se atalii poo se afafine o le Atua, o loo afio o ia i totonu ia te oe ma o mea uma e tali i le Atua, e tali foi ia te oe. O se avanoa matuā taua. 

Ou te manatua ina ua avea au ma sui o le RCCG, sa ou manatu o a’u o se tagata poto, aua ou te faiaoga i le Iunivesite. O le toatele ia o tagata e lē aooga i la matou Ekalesia i lena vaitaimi, ma sa ou vaai maualalo iai latou. Peitai i se tasi aso, na ou manatu ai ia te au lava, ‘o nei tagata e ui e lē aooga peitai e susulu lava lo latou olioli a’o a’u ou te popole lava i lea mea ma lea mea. E maua lava e i latou le filemu peitai e pei o se taua o loo faia i totonu ia te a’u’. Ona ou manatu lea o le a foai lou ola ia Keriso i lea aso, ma o le mea muamua na ou tofo iai o le filemu. O mea uma na ou popole iai ua mou atu, ae mo le taimi muamua i lou olaga, ua ou maua le fiafia ma le olioli. O le olioli na ou maua i totonu o au ua matua tumu e oo atu i le taeao na sosoo ai, na vaaia e lo’u pule i le galuega lo’u olioli e aunoa ma se upu na ou tautala atu ai. 

O le tagata e lei faia, ia popole i se mea. O le tagata ina ua paū na fai ma auala ua aveesea ai lo tatou olioli. O le tulaga lelei, na afio mai Iesu e toe faafoisia le uluai fuafuaga a le Atua mo le tagata. E te maua le filemu ma le olioli pe a avea oe ma malumalu o le Atua Maualuga aua fai mai le Salamo 16:11 o i ona luma le fiafia e malie ai; ae fai mai le Filipi 4:7 o le filemu o le Atua e silisili lava i mea uma e manatu i ai. 

Le au pele e, afai e te lei talia Iesu Keriso e avea ma ou Alii ma Faaola, e lē mafai ona avea oe ma vaega o le uluai fuafuaga a le Atua. E finagalo le Atua e afio atu i lou loto (Faaaliga 3:20) ma ou te faamalosiau atu ia te oe, e talia o ia. E na te amo i lau avega mamafa ( Mataio 11:28) ona e maua lea o le filemu ma le olioli e sili atu muamua. A e malamalama i lou tofi o le malumalu e afio ai le Agaga o le Atua, e maua ma e fiafia i lona olioli ma le filemu, i le suafa o Iesu, Amene.