OPEN HEAVENS

MATALA LE LAGI MO LE ASO SA  22 FEPUARI 2026

(tusia e Pastor EA Adeboye)

Manatu Autu: O Le Atua E Leai Se Tapula’a (4) - The Unlimited God (4)

Tauloto Tusi Paia: Tanielu 2:21 “O ia fo‘i na te liua tausaga ma tau; e ‘ave‘eseina e ia o tupu, e tofia fo‘i e ia o tupu; Pe foa‘iina mai e ia le poto i ē o popoto, ma le malamalama i ē o iloa mafaufau.”

Faitauga - Tusi Paia:  Ioane 11:20-44

O le asō a o fa’aauau ona o’u faamatala le natura lē fa’atapula’ā o le Atua mata’utia, ou te mana’o e fa’ailoa ia te oe, e lē taofia fo’i Ia e le taimi, auā o Ia e pule I taimi ma fuata, e pei ona o tatou faitau I le fuaiupu tauloto o le asō. Na te tofia tupu ma aveeseina tupu mai le nofoalii. O ia le pogai o le poto uma lava. E foaiina mai e Ia le poto i e o popoto, ma le malamalama i e o iloa mafaufau. Ou te ta’utino po o a lava ni lu’itau o e ui ai, o le Atua e leai se tapula’a, e pulea le taimi ma fuata, o le a Ia feliuaina mea uma mo lou lelei, i le suafa o Iesu.

E leai se mea e ta’u o se ‘tuai tele’ i le Atua auā e lē mafaia e le taimi ona taofia Ia pe a finagalo e faataunuu se mea. I le Tusi Paia faitau o le asō, na manatu tagata uma e aofia ai ma tuafafine o Lasalo, ua tuai tele ona toe faia e Iesu se gaioiga ia Lasalo aua o lea ua maliu. Peita’i na fetalai Iesu, “E lē faatuai lava a’u.” Na manatu Maria ma Mareta e le o malamalama Iesu i le tulaga ua i ai le tino o Lasalo (tulou), ma na faapea mai Mareta, “O le taimi nei ua o’o ina manogi o ia auā o lona po fa lenei.” Latou te le’i iloa e lē mafai ona tuai le Atua e faailoa lona mamalu. Ou te folafola atu, o faamanuiaga uma ua tuai tele ma ua taligā mo oe, o le a amata fa’aalia i lou olaga.

Sa i ai se fafine sa le maua sana tama, ma sa tele se vaega tupe na fa’aaluina e lana tane i le tau sailiga o se fofō o le faafitauli ae le’i manuia. Mulimuli ane na o atu i laua i se polofesa, na faia ni suesuega faapitoa ma iloa ai e leai ni totoga fanau o le fafine. Na valaau le polofesa i le tane a le fafine ma fai i ai, “Aisea e maimau ai lou taimi? O lau ava e leai se totoga fanau. E lē mafai ona ia fanauina se tama, aua le toe manatu i ai; e le mafai ona oulua maua se fanau.” Ina ua faalogo le fafine i le lipoti a le polofesa na tonu i lona loto ua leai se faamoemoe mo ia ma e le mafai ona ia fanauina se fanau. Peita’i fai mai lana tane, “O le lipoti lena a le fomai, ta o ta saili se lipoti a Iesu.” Na aumai e le tamaloa lenei lona toalua i se tasi o sauniga a le RCCG ma, a o fa’ae’e o’u lima i luga o le tina, sa pa’ū o ia i lalo i le faauuga ma taoto ai pea i luga o le eleele pe a ma le 45 minute. Sa ou faapea o moe auā o le po sa fai ai le sauniga, peita’i ou te le’i iloa ua faia e lo’u Tamā se taotoga faapitoa mo le fafine. I le tausaga na soso’o ai, na toe sau ai le fafine ma sii mai lana pepe ma le olioli.

Le au pele e, ou te tatalo mo oe i le asō, ia fa’alēaogaina e le Atua leai se tapula’a soo se lipoti e faalavelave i le finagalo o le Atua mo lou olaga i le suafa o Iesu, Amene.