OPEN HEAVENS

MATALA LE LAGI MO LE ASO GAFUA 23 FEPUARI 2026

(tusia e Pastor EA Adeboye)

Manatu Autu: O Le Atua E Leai Se Tapula’a (5) - The Unlimited God (5)

Tauloto Tusi Paia: Hakai 2:8  “O lo‘o ‘iā te a‘u le ario, o lo‘o ‘iā te a‘u fo‘i le auro, ‘ua fetalai mai ai le ALI‘I o ‘au.”

Faitauga - Tusi Paia:  Salamo 50:10-15

I ni nai aso ua tuanai atu, sa ou talanoa atu e lē mafai ona taofia le Atua pe tetee mai nisi, pe lē fetaui le taimi pe le talafeagai le siomaga. O le a faagasolo atu pea i le asō i le talanoa atu i auala na te pulea ai mea e faia e tagata ma e lē taofia i le lelava o oloa.

Fai mai le Salamo 24:1 “O le lalolagi ma mea ‘ua tumu ai o a le ALI‘I ia; o le atu laulau ma ē o nonofo ai.”

E leai se mea e telē tele e le mafai ona faia e le Atua Matautia, o Lē na faia le lalolagi ma mea uma o tumu ai. O le tagata pito i mauoa i le lalolagi atoa i le taimi nei, e na te umia na o sina vaega itiiti o le oa o le lalolagi atoa. E le gata i lea, o le oa ma le tamaoaiga o tagata pito mauoa i le lalolagi, ua na o se tulutulu i le moana pe a faatusa i faulaiga oa na tuu e le Atua i le lalolagi. I le Mareko 6: 35-44 ina ua tumutumu atu le motu o tagata i luma o Iesu, na popole le ausoo pe faapefea ona fafaga i latou. Na fetalai atu Iesu, ia saili mai ni falaoa, ae na latou maua na o se meaai a se tamaitiiti. Ou te mautinoa na manatu le au soo e ataata nei Iesu pe a avatu, peitai na faaaoga e Iesu lenei tamai meaai ma faateleina e fafagaina le sili atu ma le 5000 tagata. A e avatu na o sina vaega o lou tamaoaiga i le Alii, o le a ia faamautinoaina e te maua mea uma e sili atu i mea e te manaomia. 

I le 2 Tupu 4:42-44, na sau se tagata ma meaai ia Elisaia, e tausia o ia mo ni aso poo vaiaso. Peitai e lē na o le pau lea, e 100 isi tagata, o atalii o perofeta sa auai ma ia. Ina ua fai atu Elisaia i lana auauna e avatu sina meaai i tagata, na manatu le auauna pe faapefea ona lava lenei meaai itiiti. Peitai ina ua auina mai le Upu a le Atua e leai se tapulaa, o sina meaai itiiti lea na fafagaina le 100 o tagata, ma e tele meaai na totoe. A oo mai le Upu a le Alii i luga o sina mea o loo ia te oe, e faateleina ma e lava ma totoe. 

I le upu tauloto mai le Tusi Paia o le asō, na fetalai le Atua o le auro ma le ario o ia e ana. E faapena foi i le faitauga o le Tusi Paia o le asō na fetalai le Atua o loo ia te ia manu uma i le vao matua ma manu e tata‘a i mauga e afe. O le Atua e leai se tapulaa o ana oa, ma o se tasi o auala e te fiafia ma maua ai, o le ola i se olaga faafetai. A e loto faafetai i le Atua mo mea uma ua ia faia, e sili atu mea e faia e le Atua. O le finagalo lea o le Atua ia te oe, ia e avatu le faafetai (1 Tesalonia 5:18). 

Le au pele e, ia avea le loto faafetai i le Atua, le Tamā i le lagi e avea ma masani o lou olaga. E leai se tapulaa o mea e faia e le Atua mo oe pe afai e te masani e avatu le faafetai ia te ia i mea uma ua e maua, i le suafa o Iesu, Amene.