Ons en die Onderwys

8 November 2026: Estel de Beer praat met Christelle Webb-Joubert oor haar ervaring by die Woordfees, en haar onderhoud met Cheraldine van der Merwe, projekbestuurder van Vriende van Afrikaans. Daarna hoor ons die eerste deel van dié gesprek oor lees, ondersteuning vir onderwysers en ouers, en die organisasie se werk by skole.

1 November 2026: Estel de Beer praat met prof. Alta Vos, ‘n navorsingsgenoot aan die Universiteit van Pretoria, oor handboeke se rol in die klaskamer. Die gesprek fokus op die verborge boodskappe wat handboeke oordra, en hoe onderwysers dié bronne kan kies, bevraagteken en aanpas om leer te ondersteun.

25 Oktober 2026: Estel de Beer praat met Wilna van Rooyen, ‘n onderwyskundige by die Afrikaanse Onderwys Netwerk, oor skermgebruik en die keuses wat onderwysers en ouers kan maak om ’n gesonde balans te help skep.

18 Oktober 2026: Is ’n stil klas noodwendig ’n klas waarin leerders leer? Estel de Beer praat met Chanéll Homann, ‘n dosent in opvoedkundestudies aan Akademia se Fakulteit Opvoedkunde, oor betekenisvolle deelname in die taalklas. Die gesprek fokus op praktiese onderrigidees, dissipline en onderwysers se werkslading.

11 Oktober 2026: Wêreldonderwyserdag is op 5 Oktober gevier. Estel de Beer praat met Paul Sauer van die SAOU oor die beskerming en bevordering van die onderwysberoep.

4 Oktober 2026: Wanneer ’n gesprek tussen ’n ouer en ’n onderwyser oor ’n kind se gedrag, vordering of uitdagings gaan, kan dit maklik sensitief raak. Johan van Lill praat met Adel Jacobs, afdelingshoof van Professionele Dienste by die SAOU, oor waarom hierdie gesprekke soms skeefloop en hoe ouers en onderwysers moeilike sake op ’n konstruktiewe manier kan hanteer

27 September 2026: Die nuwe nasionale katalogus vir grondslagfase-leermateriaal het die afgelope maande tot ondersoeke, onsekerheid en ’n openbare meningsverskil binne die Departement van Basiese Onderwys gelei. Johan van Lill praat met dr. Jaco Deacon, uitvoerende hoof van FEDSAS, oor wat gebeur het, hoe die proses behoort te werk en waarom dit vir skole, ouers en leerders belangrik is.

20 September 2026: Hoe kry ’n mens opleiding nader aan die plekke waar vaardighede werklik nodig is? Johan van Lill praat met Phillip Harmse, Uitvoerende Hoof: Besigheidsontwikkeling by Africa Skills, oor ’n samewerkingsmodel wat opleiding, praktiese werkservaring, plaaslike ondernemings en gemeenskapsbehoeftes bymekaar bring.

13 September 2026: Estel de Beer, senior regisseur: mandaat, drama en opvoedkunde by RSG, praat met Johan van Lill ter viering van sy 650ste program. Hulle kyk terug na hoe Johan by die program betrokke geraak het, hoe die onderwysgesprek oor die jare verander het, en wat hy uit honderde gesprekke met mense in die onderwyswêreld geleer het.

6 September 2026: Johan van Lill praat met prof. Dorothy Laubscher, waarnemende navorsingsdirekteur van die Noordwes-Universiteit se Navorsingseenheid Selfgerigte Leer, en Eunice Pretorius, koördineerder van die PGCE-program en junior lektor aan die Noordwes-Universiteit, oor selfgerigte leer en waarom dit toenemend belangrik word in ’n veranderende onderwyswêreld. Hulle gesels oor wat selfgerigte leer werklik beteken, hoe die rol van die onderwyser verander en watter invloed kunsmatige intelligensie en assessering op die ontwikkeling van selfgerigte leerders kan hê. Hulle kyk ook vooruit na die Eenheid se jaarlikse internasionale konferensie.