OPEN HEAVENS

MATALA LE LAGI MO LE ASO TOONAI 3  IANUARI 2026

(tusia e Pastor EA Adeboye)

Manatu Autu:  Opogi Lana Upu (Embrace His Word)

Tauloto Tusi Paia: Eperu 4:12 “Auā o lo‘o ola le afioga a le Atua, o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū, o lo‘o vaevae fo‘i e o‘o lava i le vavae‘eseina o le loto ma le agaga, o gaugātino fo‘i ma ‘a‘ano o ivi, o lo‘o fa‘amasino fo‘i i manatu ma filifiliga o le loto.”

‭‭

Faitauga - Tusi Paia: Kenese 1:1-5

Ae lei malama le taeao fou i le Kenese 1:1, sa iai le Atua. O loo tusia i le Tusi Paia, i le amataga, na faia e le Atua le lagi ma le lalolagi. O lona uiga, ae lei oo mai le aso fou muamua, sa iai le Atua. Fai mai le Ioane 1:1, “Sa i le amataga le ‘Upu, sa i le Atua le ‘Upu, o le Atua fo‘i le ‘Upu.”

‭O le Atua na faia mea uma i le amataga, ma na ia faia le amataga i lana Upu. Na ia faia lenei tausaga fou ma mea uma o le a tutupu ai i lana Upu. O lona uiga, afai e te fia pulea mea uma o le a tutupu i lenei tausaga fou, e tatau ona e vaavaai ma le faaeteete i le Upu a le Atua. Fai mai le Mareko 11:22-23 “‘Ona tali atu lea o Iesu ‘iā te i latou, “‘Ia ‘outou fa‘atuatua i le Atua; auā e moni, ‘ou te fai atu ‘iā te ‘outou, ‘ai sē fai atu i lenei mauga, ‘‘Ia si‘itia oe, ma ‘ia lafoina i le sami,’ ma le lē māsalosalo lona loto, ‘ae peita‘i e fa‘atuatua o ia e taunu‘u lava mea na ia fai atu ai, ‘ona faia lea mo ia o le mea na te fai atu ai.”

‭‭

E tusa ma le fuaitau o loo taua i luga, afai e te faatuatua i le Atua, e mafai ona e faatonuina mauga o loo i le ala, e siitia ese, ona latou siitia ese lea. O loo fai mai foi le Tusi Paia iai tatou i le Roma 10:17, e oo mai le faatuatua pe a faalogo i le Upu a le Atua. O le tele o le Upu a le Atua e te faataga e nofo i lou loto i lenei tausaga, o le fua foi lena o le malosiaga o le a ia te oe e faasagatau atu ai i mauga. A e suesue i le Upu a le Atua i aso uma, o soo se taimi e te fetaiai ai ma se mauga, o le a matua faatumuina oe i le Upu ma le faatuatua ma afai e te tautala atu i le mauga, o le a siitia ese. Fai mai le Salamo 107:20 “‘Ua ia ‘auina atu lana afioga ma fa‘amālōlō ‘iā i latou ma lavea‘iina ai nai lo latou malaia.”

E iai lava faama’i e le mafai e se fomai i le lalolagi nei ona fofo. E iai foi taotoga e lei mafai lava e fomai ona iloa le auala e faatino ai. E iai foi taotoga ua mafai ona faatino e masini e faaaoga ai le sulu e ati le vaai atu i totoga o le tino e le mafai ona oo atu iai naifi tipitipi a fomai. O le mafuaaga lea na fai mai ai le Tusi Paia o le  fa‘aalia mai o au afioga e fa‘amalamalamaina ai (Salāmo‬ ‭119‬:‭130‬ ), o lona uiga a auina mai e le Atua Lana Upu, e faamaloloina ma’i e leai ni fofo, e oo atu foi i vaega o le olaga o se tagata e manatu e lē mafai ona oo atu iai. 

Le au pele e, opogi le Upu a le Atua i lenei tausaga e sili atu i tausaga ua mavae. Suesue, manatunatu iai ma folafola ia te oe ma le filigā i aso uma. Ao e faatumu lou loto i le Upu a le Atua, ma avea ma au paaga i taimi uma i lenei tausaga, ou te folafola atu, o le a e maua le manumalo i so’o se vaega o lou olaga, i le suafa o Iesu, Amene.