Pro(te)st Niejohr

Frohed niedet Johr.

Betlang weer 2024 je eenigermoten ruhig, wenn man dat mit 2023 in’t Verhältnis setten deiht.

Dat blifft overs ni so ruhig. Näste Week ward de Emotschoon wiss weller düchti hochkooken – in de Politik jüst so as an de Stammdische.

Protest un Streik is ansett. Un dat glieks vun dree Sieden. Dor sünd to’n Een de Landwirte, de den subventschoneerten Agrar-Diesel beholn un ook wiederhen keen Fohrtüüchstüüer op ehr Treckers betohln wüllt. Dorför goht, nä, dorför fohrt se an Mondag, Middeweeken un Friedag op de Strooten, üm den Verkehr an möglichst veele Steeden lohm to leggen.

De tweete Protest-Gruppe is de GdL, de Gewerkschop vun de Lokföhrers. De wüllt gern weniger arbeiden. Un üm düütli to moken, dat se würkli weniger arbeiden wüllt, ward näste Week de een‘ oder annere Isenbohn stohnblieven. Na jo, ’n Isenbohn de gor ni erst kümmt, kümmt weenstern ni to lot.

To’n Drütten geiht de Ünnernehms-Verband Logistik in Utstand. Dor is man splitteri, weil de Lkw-Maut un de CO2-Priese steegen sünd. Wat de genau an Protestaktschoon plont, dat weet ick gor ni. De Strooten mokt je al de Buuern dicht un op de Schien‘ hett de GdL ehrn Duum. Ick bün gespannt, wat dat allns tosom afgeeven ward.

Ni, dat sick de ünnerscheedlichen Interessengemeenschopen noher noch gegensiedig in de Flicken kümmt. So, vun wegen: „Söch di ’n anner Stroot, hier protesteer ick!“

Un ick hoop, dat de Protestlers keen Krankenwogens, Füüerwehrautos un so wieder blockeert.

Anners kunn de Larm nömli ook tehmli gau no achtern losgohn.

Man schull sick vun Mondag an jedenfalls ’n beten mehr Tied inplon‘, wenn man Termine hett. Un wenn de Landwirte sick mit ehr Treckers nästen Friedag in Kiel dreept, ward wi sehn, wat de Opstand bröcht hett.

De Eenzigen, de sick de ganze Tied freut, dat sünd de Ölkonzerne. Denn annerlei, wat bi de Proteste rutkümmt, de verdeent munter wieder. Ook an den Diesel, de bi‘t Protesteern ut’neen fohrt ward...

In düssen Sinn