Во замокот Нојшванштајн Паула и Филип сретнаа непознат и многу таинствен човек, кој ја носи наметката на кралот Лудвиг. Тие истражуваат под какви мистериозни околности починал кралот.

Човекот со раскошна наметка, иста како онаа на кралот Лудвиг, сака да ги натера Паула и Филип да веруваат дека тој е починатиот монарх. Но, како починал всушност кралот Лудвиг? Двајцата уредници преку радиодрама ги објаснуваат различните теории околу неразјаснетата смрт на кралот Лудвиг на Eзерото Штарнберг. Клучното прашање гласи: дали беше убиство на несакан владетел или пак самоубиство на умоболен крал?

Преку средбата со непознатиот човек се прикажуваат различните форми на обраќање меѓу пријатели и непознати. За оваа намена се воведени формите за обраќање „Sie“ и „du“. Освен тоа ќе ги погледнеме и одредените глаголски форми од глаголот „sein“.

Во Радио Д Паула и Ајхан го поздравуваат новиот колега. Веднаш потоа двајцата уредници ја добиваат првата задача: кралот Лудвиг од Баварија, кој одамна е мртов, наводно сé уште бил жив.

Филип ги запознава колегите Паула и Ајхан, како и ексцентричната Јозефине, која се грижи за хигиената. Во редакцијата на Радио Д не останува многу време за одмор, бидејќи Филип и Паула веднаш ги очекува првата задача: има гласини дека легендарниот крал Лудвиг Втори од Баварија е сé уште жив. Тој почина во 1886 година под мистериозни околности. Двајцата уредници доживеаја невообичаена средба при истражувањата во замокот Нојшванштајн.

Мистериозните случки секогаш отвораат многу прашања. Така имаме можност и во оваа лекција подетално да ги објасниме прашалните зборови и одговорите.

Во редакцијата на Радио Д сите го чекаат Филип. Паула и Ајхан, неговите идни колеги, се досадуваат. Но Филип едноставно не се појавува. Освен тоа и телефонската комуникација не функционира.

Поради лошото време Филип многу задоцни. Тој се обидува да ја информира Паула по телефон. Но,за жал, не може да ја добие. На крај Паула и нејзиниот колега Ајхан ја напуштаат канцеларијата. А кога уште мајка му на Филип се јавува во редакцијата, се создава целосна збрка.

Филип се обидува да се извини за неговото доцнење. Слушателите учат различни форми на извинување.

Филип тргнува за Берлин. Но лошото време му ги расипува плановите. Додека го чекаат уредниците им се претставуваат на слушателите.

Филип патува со автомобил кон аеродромот во Минхен. Од таму сака да лета за Берлин. Но, како што најавија во временската прогноза, има невреме и силен дожд, па затоа возењето ќе трае подолго од очекуваното.

Истовремено, во оваа лекција на слушателите им се претставуваат вработените во редакцијата на Радио Д, Филип и неговата мајка. Различните начини на претставување покажуваат како се претставува пријателски или формално.

Филип сé уште не може да се одмори. Покрај здодевните инсекти, сега му пречи и вревата кај соседите. Неочекуван телефонски повик од Берлин е повод тој веднаш да замине. Филип се упати кон Радио Д.

Филип навистина не може да ужива во очекуваниот мир на село. Поради една моторна пила и еден дилетантски трубач во соседството тој на крајот ги губи нервите. Телефонскиот повик на Паула, која работи во Радио Д во Берлин, доаѓа во вистински момент. На големо разочарување на мајка му, Филип веднаш заминува за главниот град.

И во оваа сцена, со познавање на малку зборови, може да се заклучи што се случува. За подобро разбирање помагаат пред сé интернационалните зборови и интонацијата. На тој начин се вежба и акустичното разбирање на јазикот.

Филип е младо момче, кое со својот автомобил тргнува на село. Посетата кај мајка му Хане треба да биде одмор за него, но набргу Филип ги запознава и непријатните страни на селската идила.

"Недопрена природа, колку е убаво", вели Филип, кој сака малку да се одмори кај мајка му на село. Но, покрај крави и мачки, на село има и други животни. На пријатното пиење кафе во градината бргу ќе му дојде крај. Здодевните инсекти му пречат на Филип и не му дозволуваат да ужива во толку посакуваниот мир. Згора на тоа, тој доживува и болно искуство.

Овие сцени може да ги разберете и доколку знаете малку зборови. Звуците што се слушаат појаснуваат каде се наоѓа Филип. Слушателите ги учат различните форми на поздравување и збогување.