Tè, encuèra ua emission en la vath d’Azun! Uei que prenem lo camin de la Vath d’Estanh, en la maison M. dab Hélène Jouanigou e eth hilh Cyprien. L’escambi que’s hè dehòra, lo vent que boha mes l’arcueilh qu’ei hèra bon.

Hélène que parla de la legenda deu martèth panat, de las broishas, de la mina d’Estanh e deu mestièr de paisan.

Adiu pipiu, puisqu’ès aquiu, e qu’arrivas au bon moment que partim uei, figura-te, au bistrò, e ne vam pas dehens un bistrò de mèrda, avisatz-pe. Que vam au vilatge de Bun en vath d’Azun. Mes lo praube cafè qu’ei barrat adara, mes l’esperit qui demora dab ua persona qui s’apèra Eugène. Parlam de la vath, de toponimia, de brochas, de tribalh… Un encontre preciós!

Uei que vos perpausi de partir en Vath d’Estanh, en la comuna qui s’apèra tanben Estanh, au dessús d’Argeles Gasòst a l’encontre d‘un aulher a la retirada. Aqueth òme charmant que’ns parle deths trucos, deras queras, dera vath e deth calhavari. Un escambi tranquil, sense córrer. Joseph Serres que vos arcuelha dens la maison Badia.

onzau

Detzau

Nauau

Ueitau

A l’entrada de las Barronias de Bigòrra, que s’i tròba lo vilatge de Labastida, coneishut per la gròtas de las Pugas esploradas en 1932 per Norbert Casteret, que compta enquèra un punhat de locutors naturaus de l’occitan gascon. E uei qu’avem a pujar ua còsta entad anar a l’encontra de Fernande Ferran de la maison Líndo. Lo parat de parlar de las tradicions a l’entorn deu maridatge a Labastida, de la lua, deu casau e deu tribalh dab lo carrasson.

Silvan Carrèra.

Adishatz, brave monde. Uei, que prenem lo camin de la maison Moluquet, en la comuna de Bièla, en vath d’Aussau, a l’encontra d’ua hemna aperada Henriette Miro. E entad aqueth encontre, que soi acompanhat de Felip Barrèra, mainat deu vilatge e amic d’Henriette.

E que chapotejam sus ma taula de la sala a minjar. Lo sorelh que pampa coma cau dehòra. N’i a pas un gat per la carrèras de Bièla aqueth vrèspe pr’amor d’un enterrament au ras deu vilatge. Lo parat d’escambiar dab Henriette deus nau molins de Bièla, de la creienças, deu mestier de costumèra e de l’aviéner de la lenga nosta.

Alavetz, ça-vietz dab nosauts a Bièta, tèrra d’Aussau dab Henriette. Per Sagòrra e Magòrra, sheisau.

Silvan Carrèra:

“Biarnés, fausse cotèths. Bigordans, piri que cans.”

E en Lavedan, que son bandolets. La vielha ZX que passa arras en Lavedan. Entà tirar de cap au vilatge de Shirèish, Sireix en francés, vilatgòt deu canton d’Aucun, en vath d’Azun de Bigòrra.

E uei, qu’avem rendetz-vse dab un òmi gualhard, la cigarèta en boca e lo bonet suu cap. E au hum deu tobac, qu’escoti la soas paraulas a perpaus de tot, de la legenda deu lac d’Estanh e tot çò qui hè aqueth país. George Fromigué obrier paisan de Shirèish, e cantaire tanben, dens lo grop Eths d’Azun, que nos acompanha uei sus aquèra antena.

Alavetz, ça-vietz dab nosautes entà escotar la Vox Populi.