Í baráttunni við hamfarahlýnun er vísindamenn farnir að sækja innblástur í útblástur jarðarinnar. Uppi eru hugmyndir um að líkja eftir ákveðnum áhrifum eldgosa í þeim tilgangi að draga úr krafti sólarinnar og kæla þar með jörðina. Snorri og Tómas halda á gruggugar slóðir jarðmótunar, en það eru markvissar, stórtækar og ekki síst stórhuga aðgerðir til að hafa áhrif á loftslag jarðarinnar. Rætt er við Sigurð Reyni Gíslason, jarðfræðing og Evgeniu Ilyinskayu, dósent í eldfjallafræði. Umsjón: Tómas Ævar Ólafsson og Snorri Rafn Hallsson.

Hamfarahlýnun jarðarinnar skrifast að miklu leyti á umframmagn gróðurhúsalofttegunda í andrúmsloftinu. Það er ekki nóg að draga úr losun, við þurfum að hreinsa upp eftir okkur. Í þættinum skoða Tómas og Snorri jarðmótun, sem eru markvissar, stórtækar og ekki síst stórhuga aðgerðir til að hafa áhrif á loftslag jarðarinnar og kynnast náttúrulegum og tæknilegum aðferðum við föngun og förgun kolefnis. Rætt er við Sigurð Reyni Gíslason, jarðfræðing og Söndru Ósk Snæbjörnsdóttur, yfirmann koldíoxíðsförgunar hjá CarbFix. Umsjón: Tómas Ævar Ólafsson og Snorri Rafn Hallsson.

Á internetinu er ætíð fylgst með okkur. Hegðun okkar og atferli er skrásett og hagnýtt í þágu betri þjónustu. Ein slík þjónusta er myndbandaveitan YouTube sem beitir ýmsum aðferðum til að halda áhorfendum við skjáinn. En það eru ekki bara skondin myndbönd af sætum köttum og nýjustu tónlistarmyndböndin sem YouTube heldur að okkur. Tómas og Snorri kafa ofan í kanínuholur og veröld samsæriskenninga og öfgastjórnmála sem algóritmi YouTube heldur að fólki. Rætt er við Eirík Bergmann prófessor í stjórnmálafræði um róttæknihæningu, bergmálsklefa og falskar fréttir.

Í kjölfar hryðjuverkaárásanna í New York þann 11. september 2001 fór af stað öryggis- og eftirlitskapphlaup sem ekki sér fyrir endann á. Á flugvöllum er hver einasti farþegi undir smásjá og ógnin leynist víða. Tómas og Snorri fylgjast með hringferðalagi um Bandaríkin til að kanna rökvísi öryggiseftirlits, og kíkja til Kína þar sem tæknivæddu samfélagseiningakerfi er ætlað að sporna við tortryggni og vantrausti milli einstaklinga, fyrirtækja og stofnanna. Rætt er við Tómas Hrafn Ágústsson, æskuvin, Ásgerði Jóhannsdóttur, textasmið og Joönnu Kraciuk, nema í tölvunarfræði.

Þegar bóluefni Pfizer og BioNTech kom til landsins, var því fylgt frá flugvellinum af sérsveitarmönnum með alpahúfur og ómerktum lögreglubílum. En það voru ekki bara vopnaðir menn sem tryggðu öryggi efnanna heldur tæknilegt eftirlit, tölur og gögn sem safnað var saman og unnið út. Í þætti dagsins skyggnast Tómas og Snorri undir yfirborðið á gagnaeftirliti, spá í veðrið og hvernig snjallúr og lífkennamælingar koma upp um okkur. Rætt er við Heiðar Eldberg Eiríksson, kerfisfræðing hjá Controlant, og Morten Pedersen hjá danska lífkennamælifyrirtækinu iMotions.

Árið 2010 var Google Maps bíllinn eltur af köfurum með heygaffla í Björgvin. Í upphafi var ekki ljóst hvað mönnunum gekk til en töldu sumir að um mótmæli væri að ræða enda Google ekki alltaf á beinu brautinni þegar kemur að friðhelgi einkalífsins. Tómas og Snorri kafa ofan í ætlun Google til að skrásetja heiminn, allar götur, allar bækur, allar upplýsingar um allt sem er. Þeir heyra einnig í bílstjóra Já 360 bílsins sem myndaði götur á Íslandi og læra í eitt skipti fyrir öll hvað vafrakökur eru, hvað þær gera og hvernig má græða á þeim upplýsingum sem þær safna um okkur. Rætt er við Snæbjörn Val Lilliendahl, bílstjóra Já 360 bílsins og Þór Matthíasson hjá Svartagaldri.