Jo, ick weet, ich heff em al mol ziteert, den Satz vun Josef Stalin. Nu heff ick mit Stalin würli nix an mien knappe Frisuur, overs mit düssen Snack hett he nu mol Recht hatt. He hett mol seggt: „In Düütschland kann dat keen Revolutschoon geeven, weil man den Rosen ni betreden dörft.“

Dat is wohr. Bi uns in’t Land vun de Dichters un Dinkers is würkli allns regelt. Un noch verrückter is, dat man blots ’n Schild opstelln mutt, un de mehrsten Lüüd hölt sick doran.

Denn wat op ’n Schild steiht mutt je richti ween. Ganz klor.

Nu bün ick veellicht ni so’n ganz tüpischen Düütschen, denn ick hol mi ni jümmers an de Schiller.

Een Bispeel: Wenn man vun Meldörp op de B431 no Alversdörp fohrt, denn kümmt man kort achter Bargenstedt dör Dellbrück. Un in Dellbrück is ’n Seniornheim. Dorüm dörft man bi dat Heim, dat links, also op de annere Strootensied liggt, blots 70 Kilometer in de Stünn fohrn. So steiht dat op dat Verkehrsschild.

Fort man overs op desülbige Streck‘ vun Alversdörp in Richtung Meldörp, denn steiht dor ’n Schild no dat man 80, also teihn Kilometers gauer fohrn dörft, liekers man je op de Sied fohrt, an de dat Heim liggt. Worüm is dat so? Wat is de Zweck dorachter, dat man gauer fohrn dörft, wenn man dichter an’t Heim is? Een Schelm is, de dor Bösed dinkt. Na jo. Ick fohr dor jedenfalls jümmers langsom.

Oder dat hier: Annerletzt heff ick ünnerwegens mol op Tant‘ Meier musst. So bün ick an ’n Tanksteed anholn. Un dor hungen över de Tolette twee Schillers. Op dat erste Stunn, dat man de „Klobürste“ verwennen schull. Op dat Tweete stunn: „Bitte kein Papier und andere Fremdabfälle ins WC werfen.“

Hä? Dat weer figeliensch. Ick weer je dor, üm mien, also för de Tanksteed fremme Affälle dortoloten. Un achteran wull ick natüürli Poppier bruuken un nie de Bösst, de weer mi to kratzig.

Dorüm, Regeln hen, Regeln her. Ick heff mien Geschäft so mokt as jümmers. Mit Poppier. Denn mi dücht: Mitünner mutt man op de Regeln sch…eun henwechkieken – af un to mutt man eenfach mol Revolutschoon moken...

In düssen Sinn