bOnOvO é un grupo galego, autodenominado de folk electroacústico, que comezou a súa andaina no ano 2007 como un proxecto musical co propósito de colmar as inquedanzas de tres músicos na procura dunha nova sonoridade. Os integrantes de bOnOvO son:Pulpiño Viascón,

Roberto Grandal e Óscar Fernández.

A esencia dos sons acústicos salseados con tecnoloxía de vangarda, quere romper barreiras co establecido, explorando alén do coñecido as posibilidades de tres instrumentos tan polivalentes como a zanfona, o acordeón e a batería. Un camiño na busca dun son que non entende de etiquetas, que ten como principio fundamental a fusión de tres instrumentos e tres personalidades de seu, nunha simbiose musical imprevisíble.

Co seu álbum debut homónimo, o trío bOnOvO presenta unha importante actualización do son galego no que os ritmos e a produción bailables están absolutamente actualizados, mentres que as cancións volven ao pasado como poucas veces. Mesmo se usan melodías do século XV. bOnOvO propón un espectáculo inquedo, cun ritmo frenético e bailable, que non deixa a ninguén indiferente.

O grupo Arrás nace no ano 2005 e xa nese mesmo ano foi o grupo gañador do VI Certame Folk de radio Obradoiro. A súa música reflexa as diversas influencias muiscais dos seus compoñentes, e caracterízase por manter unha liña de traballo definida, constituíndo a base do seu repertorio as composicións propias, que en ocasións o grupo mistura en perfecta sintonía coa música tradicional e popular.

"Asumindo riscos" foi o primeiro traballo discográfico do grupo Arrás, foi gravado no ano 2007 e nel fixeron unha proposta innovadora e arriscada. No momento da gravación deste traballo discográfico, o grupo Arrás estaba formado por: Rocío Jimenez, Pablo Gómez, David Bellas, Michel Rivadulla, Manu Abraldes e Jimmy Failde.

Crema de gaita foi un grupo galego de música folk orixinario de Vigo, fundado no ano 1994. As súas composicións orixinais móvense no ámbito do folk galego, con influencia dos ritmos latinos coma o tango, o tumbao, os boleros, as habaneras ou a bossa nova. Os músicos que formaban de Crema de gaita eran Diego González e Marcos Campos (gaita e frautas), Xosé Manuel López “Josele” (clarinete, saxo e gaita), Cristina Macías (teclados e voz), Ernesto Campos (guitarra), Judith Alonso (baixo), José Carlos Villar "Bouza" (percusión) e Suso "Feixón" Alonso (batería).

Crema de gaita apostou por un estilo orixinal e transgresor no que conflúen a música tradicional, a popular e a culta. Esta conxunción musical foi froito da traxectoria dos membros do grupo en diferentes ámbitos, como as bandas de música, orquestras, formacións tradicionais galegas e conservatorios, e todo tipo de grupos jazz pop, rock, electrónica e de fusión.

Felisa Segade, Estevo Lamas e Xosé Antón Ferreira (Pepe de Calo), tres músicos de fonda traxectoria no eido da música tradicional, son os impulsores do proxecto Tres Pesos.

Tres voces e tres vidas vinculadas a ducias de proxectos culturais, con centos de horas sobre o escenario e miles fóra del, soñando coa nosa música, coa nosa tradición.

Nesta Rumboia presentamos o seu segundo traballo discográfico, 'De cando os animais cantaban'. Un disco que pretende ser unha reivindicación da actualidade de música tradicional e no que se inclúen unha ducia de pezas que amosan a forza rítmica desta música.

Mais de 40 minutos nos que Tres Pesos inclúen pandeiros, pandeiras, bombos, pandeiretas ou culleres ás que acompañan do acordeón, o clarinete e a gaita.

Comando Curuxás nace alá polo ano 2017, cando tres amigos músicos comezan a darlle voltas á idea de formar unha nova banda. A intención era poñer en marcha unha murga, cun punto de modernidade, con armonías e arranxos actuais.

E desas ideas iniciais naceu o grupo Comando Curuxás, que está formado por Alberto Núñez ao acordeón diatónico, Pablo Pardo «Pacior» na frauta traveseira de madeira e saxo soprano, Miguel Anxo López nas percusións, Pablo Pascual ao clarinete baixo e Serxio Núñez ao clarinete, pandeiro gaita e voz.

O son de Comando Curuxás lembra ás antigas romarías, e soa coa intención de que o público se divirta, que goce coa súa música e que baile.

No entroido do ano 2020 os cinco integrantes de Comando Curuxás decidiron darlle vida ao seu primeiro traballo discográfico.

Raparigos nace en Ferrol no ano 1968, estreándose como grupo no concurso da Ascensión en Santiago. Nos inicios, Carlos Vázquez Cabrera e Xan Rodríguez Silvar foron o cerne do grupo, dous Gaiteiros alumnos do mestre Constantino Bellón, que estiveron acompañados inicialmente por Anxo Muñoz Castro ao tambor e Francisco Trillo Pérez ao bombo. Posteriormente pasaron polo grupo formando parte do mesmo, músicas tan relevantes como Rafael Victoria, Xabier Rodríguez, Antón Varela “Tonecho” ou Ramón Dopico.

Os concursos foron importantes para Raparigos, acadando numerosos premios no san Froilán de Lugo, na Ascensión de Santiago, ou en Ponteareas entre outros, pero as festas populares da época foron unha escola imprescindible para acadar o seu son e a súa formación.

Raparigos ten unha longa traxectoria dentro da música tradicional, que non so os levou a acadar probablemente o mellor palmarés galego en concursos de gaitas, senón tamén a manter a tradición popular en romaxes e festivais, a colaborar con outros músicos e a participar no cerne do movemento asociativo dos gaiteiros galegos.

Raparigos é un dos grupos máis sobranceiros entre os que protagonizaron o cambio xeracional entre os gaiteiros que mantiveron o facho nas primeiras décadas do século e as novas xeracións, formadas xa nun recoñecemento dos valores da cultura galega.

Manuel José Pazos Redonda, coñecido como Pazos de Merexo foi un Muxián ilustre, músico extraordinario, agradecido e xeneroso que foi e será por sempre unha verdadeira lenda do acordeón diatónico en Galicia.

O libro-disco “Pazos de Merexo, o acordeón diatónico da Costa da Morte”, protagonista da nosa Rumboia, foi a primeira publicación que afondou na historia desta modalidade musical en Galicia. Esta monografía publicada no ano 2015, recolle os periplos vitais e as obras do repertorio de Pazos do Merexo, o último maestro do acordeón diatónico de Galicia, que nos deixou no ano 2019. O libro conta con documentación gráfica, e preséntase ademais cun Cd no que se pode escoitar en versión orixinal unha selección de gravacións inéditas de Pazos do Merexo realizadas no últimos vinte anos polos investigadores Olga Kirk e Pablo Díaz.

Esta coidada e rigurosa publicación, a iniciativa de a Central Folque, foi elaborada por Xurxo Souto e Pedro Pascual, profundos coñecedores da dimensión musical de Pazos que foi un referente único no contexto da música popular para as novas xeracións de músicos e afeccionados.

O nome do grupo, “ Abóbriga”, provén dos antigos gregos, que denominaban así ao pobo onde naceu a agrupación, a actual Baiona.

Abóbriga xorde a finais do ano 2008, onde parte dos gaiteiros do Monteboi contactaron con varios músicos para facer unha colaboración nunhas actuacións informais, e tanto gustou o resultado que decidiron formalizar o grupo.

No 2012 lanzaron o seu primeiro traballo discográfico chamado “ Foliada en Baiona”, protagonista da nosa Rumboia. Son 16 temas onde ofrecen unha mostra da historia da música tradicional do concello mesturados con composicións propias como o “Pasodobre Punta Balea” e con cancións populares como a “ Foliada de Baiona” ou a “ Muñeira de Baiona”, recompiladas da tradición oral. Tamén hai que destacar a presenza dunha peza inédita, unha danza das espadas atopada no Arquivo Provincial de Pontevedra.

A Agrupación Cantigas e Agarimos de Santiago de Compostela tivo os seus inicios na Coral Queixumes dos Pinos. No ano 1921 pasou a ter a actual denominación e é unha das agrupacións históricas do folclore de galego.

Hoxe en día, Cantigas e Agarimos busca achegar ao público toda a bagaxe das tradicións que configuran o sentir do noso pobo, articulando un espectáculo de calidade, no que tenta trasladar no tempo ao espectador, levándoo nunha viaxe imaxinaria polas nosas raizames.

A Agrupación Folclórica Cantigas e Agarimos está composta por máis de 80 membros, distribuídos nas seguintes sección: Coro, Baile, Pandeireta e Instrumental.

“O corazón aberto” é o último traballo discográfico de Cantigas e Agarimos. Inclúe catorce temas de tres das seccións que conforman a agrupación: coro, instrumental e pandeireteiras. Son todas pezas tradicionais que foron extraídas do extenso arquivo de Cantigas. O disco está dedicado á memoria de Luís Porteiro Garea ao cumprirse cen anos do seu falecemento.

Ghaveta é unha formación de cuarteto acústico que fai música galega de raíz. O seu particular son chegará a mergullarte nun universo tímbrico cheo de ritmo, harmonía e sentimento.

Beatriz Martínez (arpa), Diego Langarika (bouzouki e guitarra), Felipe Rodicio (violín) e Marta Martínez (voz, percusións e bouzouki) crearon Ghaveta en 2013. Logo de madurar o proxecto en numerosos concertos, gravan “Disque” en 2015, Un traballo composto por muiñeiras, xotas, pasodobres e cantos de traballo que conversan, en ocasións, con novas composicións e ritmos.

Xa en 2020 publican "A raíz do pensamento", o traballo ao que hoxe adicamos a Rumboia. Un traballo feito devagar, froito de todos estos anos de ensaios e concertos.

A raíz do pensamento, traspasa fronteiras e lindes nos que atoparas pequenas sorpresas e matices, que darán unha nova vida as nosas fermosas músicas.

En Ghaveta, corda, voz e percusión conxugarán de tódalas posibles maneiras na búsqueda da emoción e o ritmo, do baile e a frescura, unha conexión directa na que todas sexamos completamente partícipes dos directos.