SABC North West

The Academic Congress Union eleng mokgatlho o o aroganeng le wa NFP o ikuetse go palamente go thaya molao o o tla gapeletsang dikgwebo tse dikgolo go aba matlole gore go nne le thuto ya mahala.

Baitseanape mo madirelong ba tsibositse gore tlhatlogo e e solofetsweng ya ditlhwatlhwa tsa nama e khibidu, e tlile go baka kgatelelo mo infleisheneng ya dijo.

Harmony Gold Mining Company Limited e totobaditse gore mongwe wa badiri ba yone o tlhokafetse kwa moepong wa yone wa Phakisa kwa Free State.

Baithuti ba kwa Nelson Mandela Metropolitan University ba itlamile go tswelela ka ditshupetso tsa bona go fitlha ditopo tsa bona di fitlhelelwa.

Mokwaledi kakaretso wa pele wa COSATU Zwelinzima Vavi, a re thuto e e sa duelelweng mo Afrika Borwa e a kgonagala.
O ne a eme baithuti ba Wits University ka lefoko morago ga mogwanto wa bona go ya kwa COSATU House.
Federeishene eo ya mekgatlho ya badiri le SACP, di solofeditse go inakanya le mogwanto wa baithuti o o kgatlhanong le go okediwa ga dituelo tsa dithuto ngwaga o o tlang, fa Diphalane a tlhola malatsi a le 14.

ANC ya re SABC le boto ya yona ba tshwanetse go tlotla dikgotlatshekelo tsa naga eno.
Pegelo ya lekoko le le busang e tla morago ga gore kgotlatshekelo kgolo ya boikuelo kwa Bfn, e kgapele thoko kopo ya ga Hlaudi Motsoeneng, ya go ikuela kgatlhanong le katlholo ya kgotlatshekelo kgolo ya Western Cape.
Kgotlatshekelo kgolo e fitlhetse fa go thapiwa ga gagwe jaaka motlhankela mogolo wa merero ya tsamaiso wa SABC go se mo molaong.

Botsamaisi ba Wits University ba re bo ka nna tswala setheo seo, fa e le gore maemo ga a boele tlwaelong.
Yunivesithi eo e ntse e padimotswe ke dikgato tsa dingongorego tsa baithuti, tse di faraferweng ke tiriso dikgoka.
Baithuti ba batla thuto ya mahala.

Baithuti ba kwa Nelson Mandela Metropolitan University ba ikanne go tswelela ka ditshupetso tsa bona go fitlha ditopo tsa bona di diragadiwa.
Ba ne ba kopane le botsamaisi ba setheo seo go sa le gale gompieno, mme ba neela motlatsa mochanselara wa nakwana wa setheo seo Dr Sibongile Muthwa memorantamo wa dingongorego tsa bona.

Baithuti ba Wits University ba tlile go gwantela kwa COSATU HOUSE go supa go sa kgotsofaleleng kitsiso ya tona ya thuto Blade Nzimande mabapi le kokeletso ya dituelo ya 2017.

Mopresidente Jacob Zuma are o tlotla tshwetso ya kgotlha tshekelo ya boikeulo mabapi le kgapelwa thoko ga go thapiwa ga ga Hlaudi Motsoeneng jaaka motlhankela mogolo wa merero ya tsamaiso mo SABC.