GC Züri sorgt für eh Überraschig und schlaht de amtierendi Schwiizer Meister Young Boys mit 1:0. S goldige Goal schüsst de Sonny Kittel ih de 49. Minute miteme fulminante Volley, wo erst nach de VAR-Überprüefig anerkennt worde isch.

Inere usglichene erste Halbzit hännd beidi Teams Halbchance verbuecht, doch weder de Fassnacht no de Bedia oder au de Sonny Kittel hännd de Bann chönne breche. Erst nach de Pause hätt s Spiel ah Intensität zuegnoh. De erst Club vo de Stadt Züri verwütscht de besseri Start ih die 2. Halbzit, hätt YB unter Druck gsetzt und belohnt sich mit em Füehrigstreffer gad selber. D Berner hännd miteme agressive Ahgriff gantwortet, aber schlussendlich sinds hangebliebe ah de vielbeinige Defensive vo de Zürcher und eusem Rückhalt em Justin Hammel.

Inere hitzige Schlussphase hätt YB vehement uf de Usglich drängt, doch de Hammel rettet GC Züri ih de Nachspielzit mitere spektakuläre Parade gege de Camara. Miteme ufopferigsvolle Kampf sichered sich blauwiis 3 wichtigi Pünkt und blickt jetzt ufs Duell gege St. Galle am nöchste Weekend. #GCIschZüri

Trotz enere furiose Wendi dur en Bojang-Doppelpack muss sich Züri ih de 25. Runde vo de CSSL miteme Punkt begnüege. D Zürcher hännd s Spiel dreht nacheme früehe Rückstand, doch Lausanne hätt ih de Nachspielziit iischalt zrugggschlage – 2:2! Es packends Duell miteme bittere Endi für d Stadtzürcher Grasshoppers. #GCIschZüri

D Adelina Haegler-Rütschi, isch am 16. Mai 1871, uf d Welt cho also genau 15 Jahr 3 Mönet 16 Täg vor de Gründig vom Grasshopper Club Züri.

Sie isch eh Zürcher Grafikerin gsi, wo ca. 1916 s Logo vom Grasshopper Club Zürich entworfe hätt. Das Logo, hätt us de inenand verschlungene wisse Buechstabe “G” und “C” uf blauem Hintegrund bestande, prägt bis hüt s Erschinigsbild vom erste Stadtclub. No churz zum familiäre: D Haegler-Rütschi hätt so au en nachhaltige Ihfluss uf d Identität vom Club. Sie isch d Tochter vom Ulrich Alfred Rütschi und de Elisabeth Ester Rütschi gsi.

Ih dere Episode redemer über d Adelina wo bis hüt unvergesse bliebt und nöd die annerkennig übercho hätt wo sie verdient. #GCIschZüri

De Grasshopper Club Züri het müsse gege Servette eh bitteri Niederlag ihstecke. Debi het s Spiel für d Stadtzürcher vielversprechend agfange: Scho ih de 12. Minute hätt de Irankunda per Chopfball nur d Latte troffe, churz druff schiteret de Züri-Akteur wieder am Servette-Goalie Mall. Doch de GCZ bliebt drah – Ih de 23. Minute wird de Irankunda im Strafruum gfoult, und de Tsiy Ndenge verwandlet de Elfmeter iischalt zu de verdiente Füehrig.

Trotz wiitere Chance hetts GC Züri verpasst, de Vorsprung uszbaue, was sich ih de zweite Halbziit räche sött. Servette isch zuenehmend besser is Spiel cho, hätt d Möglichkeite usgwärtet und chert de Match mit zwei Goal. D Stadtzürcher Grasshoppers hännd uf das nümme chönne reagiere und hännd sich am Schluss gschlage geh – eh schmerzhafti Niederlag, wo de Spielverlauf nöd ganz widerspieglet hätt. #GCIschZüri

Ih dere Churzepisode vom GCZ-Fan Podcast Sächsfoif redemer mit de GCZ-Squash Spielerin Cindy Merlo über ihre muetige Schritt zum uf Kairo z zieh, ihre Traum vo de Olympische Spiel 2028 in Los Angeles und d Herusforderig uf ihrem Weg.

So chasch au du d Cindy unterstütze: Spend jetzt für Ihres Projekt zum de Traum vo Los Angeles 2028 z realisiere.

Viele Dank für dini Unterstützig und Hopp GC Züri!

Ih dere Episode vom GCZ-Fan Podcast Sächsfoif dörfemer de Vizepräsident vo de Grasshopper Fuessball AG begrüesse, de András Gurovits. Sit 2015 im Verwaltigsrat und zwüsched 2019 und 2020 Präsident, git er spannendi Ihblick ih sini Zit bim echte Stadtclub. Er redet über sin persönliche Werdegang, sini Liideschaft fürs Ruedere und wie er zum Fuessball cho isch.

De András verzellt, wie sini Verbindig zu GC Züri entstande isch und welli Herusforderige er sit sim Ihtritt ih de Verwaltigsrat erlebt hätt. Bsunders im Fokus stönnd die turbulente Phase unter de chinesische Investore und de Übergang zu de Amerikaner. Er erklärt, warum mer sich für Investore us de USA entschiede hätt und welli Unterschied er zwüsched de Eigetümer gseht.

Au kritischi Frage chömmed zur Sprach: Wie präsent isch er bi de „Heimspiel“ im Letzigrund? Welli Rolle hät er gspielt bim Verchauf vo de Aktie? Hätt sich das finanziell für ihn glohnt? Zuesätzlich zieht er eh ersti Bilanz vo de Zämmearbet mit em LAFC und redet über möglichi Veränderige und Verbesserige. Zum Abschluss reflektiert de András Gurovits über sini Karriere, ob er rückblickend öpis andersch mache wür und wer er als zuekünftige Gast im Podcast gseh wett. Eh Episode mit tüüfem Ihblick, ehrliche Antworte und spannendi Hintergrundinfos für alli GCZ-Fans. #GCIschZüri

Bildquelle: Niederer Kraft Frey Ufnahmeinfos: Mittwuch 12.02.25, Züri

Trotz de Füehrig scho am Afang muss sich de GC Züri in Lugano miteme 1:1 begnüege. Es isch de Evans Maurin wo bereits ih de 7. Minute troffe hätt, nach em eh schnelle Konter über de Irankunda. Ih de erste Halbziit isch Lugano dominant im Ballbsitz bliebe, doch de ersti Club vo de Stadt Züri hätt kompakt verteidigt, während eusi Nummere 1 de Justin Hammel mit mehrere starche Parade den Vorsprung hätt chönne festhebe. Nach de Pause isch s Spiel abgflacht, bis denn de Papadopoulos ih de 86. Minute nach em Eckball doch no de Usglich für Lugano hätt chönne erziele. Churz vor Schluss isch de Ball wieder im GCZ-Netz glege, de de Treffer sich aber wege Abseits aberkannt worde. Am Schluss muss sich de Grasshopper Club Züri mit em Punkt begnüege – Am Sunntig wartet im Letzigrund de Servette FC. #GCIschZüri

Ufnahm: 12.02.25 18:30

Nonig lang ischs her: D GCZ-Legende Adi Noventa spricht s Boykott us vo Zweifel-Produkt und unzähligi Bekannti, Fans und sogar Gastronome mached mit. Nebed dere mediale Ufmerksamkeit isch viel meh dehinder, nämlich de Bau vom neue Hardturmstadion Züri. Mir reded über Zweifel, über s Stadion und wieso sie sich als Scouts für de GCZ empfehled.

Spannendi Anekdote, Erfahrige und viel Herz und Liideschaft warted ih dere Episode uf dich, viel Spass bim ahlose und Hopp GC Züri! #GCIschZüri

Ufnahmedatum: Dunnstig 06.02.25 Ufnahmeort: Ishockeyhalle in Züri

Nachem 2:2 in Züri gege Lausanne-Sport gönnd d Meinige ussenand. En Sieg wär dinne glege aber im vorhinein kei Pflicht gsi, naja hett eus defintiv viel bracht. Immerhin phaltemer gnueg Abstand zum Abstiegsplatz und chönnd Stolz si uf eusi junge. Muci miteme Zaubergoal und de Tugra Turhan trifft zum erste Mal für de Stadtclub us Züri. Währeddem Neuzuegang Irankunda für 3 Persone rennt, dörf de GCZ de eint Punkt in Züri phalte. Viel Spass bim ahlose und Hopp GC Züri! #GCIschZüri

Eh bsunders Highlight ide Stadtzürcher-Podcastgschicht: De GCZ-Podcast Sächsfoif macht eh gmeinsami Spielanalyse mit Servettienns.

De Lucas, Ben und de Bijan sind zueständig für de Liveradio, Liveticker und de Podcast vom Servette FC. Mir mached exklusiv mit Ihne eh Episode zum 1:1 unentschiede, zwüsched de beide Clubs Genf und Züri.

Mir redet nebed de Highlights ufem Platz und de Analyse au über d Tradition vo de beide Schwiizer Clubs und lueged zrugg uf eh grossartigi Vergangeheit und uf eh langi Zuekunft. #GCIschZüri

Danke für d Kooperation, Servette FC!