OPEN HEAVENS

MATALA LE LAGI MO LE ASO TOFI 18 TESEMA 2025

(tusia e Pastor EA Adeboye)

Manatu Autu: Aua e te lē faatauaina le Atua (Dont take God for granted)

Tauloto Tusi Paia: Ioane 15:5 “O a‘u nei o le vine, o la ‘outou. O lē tumau ‘iā te a‘u, ma a‘u ‘iā te ia, o ia lava e fua tele mai; auā e lē mafaia e ‘outou ‘ona fai se mea e tasi pe a a‘u lē i ai.”

Faitauga - Tusi Paia: Mataio 10:28-33

Ina ua avea a’u ma taitai aoao o le Ekalesia RCCG, na fai sa’u faaiuga o tagata uma e auai i le fonotele faale tausaga a le Ekalesia, o le a fafagaina e le Atua i le taimi o nei fonotaga. Na fai la’u faaiuga i le faatuatua aua o a’u o se faifeau e leai sau galuega masani. Na ou folafolaina o le a faalua ona fafagaina tagata i aso uma o le fonotaga ma na ou faaalia iai le 1 Tupu 17:4-6, i le fafagaina ai e le Atua o Elia e faalua i le aso. O se tasi o alii talavou i le Ekalesia o se fai falaoa, na ia ofo mai e na te saunia falaoa mo le ti o le taeao ma sa ia faia i fonotaga i tausaga uma mo ni tausaga. E iai se tausaga na ia taofia ai le saunia o falaoa ona sa lē fiafia i se tasi o a’u lauga, peitai e na te lei logoina mai a’u. 

Ao fai  fonotaga o le taeao i lea tausaga, na matou pepese ma vivii i le Atua seia ta le 11 i le taeao ao matou faatali sei taunuu mai falaoa, peitai e lei taunuu mai ni falaoa. Ina ua ta le 12 i le aoauli, na ou suea le alii ma fesili iai, ‘o le a le mea ua tupu? Na leaga le taavale i le auala na momoli mai ai falaoa?’ Na ia tali mai, ‘leai’. Ona ou fesili lea iai poo le a le faafitauli ae ia tali mai, ‘ou te lē toe faia ni falaoa mo le fonotaga’. Na ou saili i la’u ava ma fesili iai, ‘o le a le aofai o le tupe mo meaai o le afiafi?’ Na ma aumaia le tupe lea ma faatau ai falaoa mo le ti. Na saunia lava e le Atua mea e foia ai le faafitauli i lea taimi. Ini tausaga mulimuli ane, na ou ala ane i se tasi o taeao ma ou vaaia le alii talavou fai falaoa i luma o lou fale. Na ou fesili atu iai, ‘o le a se mea ou te faia mo oe? Tai e usu po mai’. Na ia tali mai, ‘ua leva ona ou fia sau, peitai ua pa le pa’u o le taavale’. Na ou fesili atu poo fea le pa’u e sui ai ae fai mai e leai seisi pa’u e sui ai. O lenei alii talavou, e sili atu ma le 14 ana taavale na iai. 

Le au pele e, aua e te lē faatauaina le Atua aua o loo ia faia galuega tetele e ala ia te oe. ‘Aua e te manatu e lē mafai ona faia le finagalo o le Atua pe a e lē manao ai, o le eseesega, o oe le tagata e lē mafai ona e faia se mea e aunoa ma ia, e pei ona tatou iloa mai le tauloto mai le Tusi Paia o le asō. Na o tagata valea latou te lē faatauaina tagata o loo taitai ma iai le pule i lo latou atunuu. A e manatu la iai, e lē mafai ona e lē faatauaina Lē e pulea le lalolagi atoa (Kolose 1:16-17). E maualuga mamao atu le Atua ia te oe, o lona uiga afai e te lē o faatauaina o ia i soo se auala, pe e te lē o ava ma faaaloalo ia te Ia e pei e tatau ona iai, salamo i le asō. Aua lava e te lē faatauaina le Atua, e matua leai se mea e ia te oe e aunoa ma ia, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 17 TESEMA 2025

(tusia e Pastor EA Adeboye)

Manatu Autu: Aua nei e avea ma siamupini talu ai (Dont become an ex-champion)

Tauloto Tusi Paia: Hakai 2:9 “E sili le mamalu e lenei fale ‘ua mulimuli i lē na muamua, ‘ua fetalai mai ai le ALI‘I o ‘au; ‘ou te avatu fo‘i le manuia i le mea nei, ‘ua fetalai mai ai le ALI‘I o ‘au.”

Faitauga - Tusi Paia: 1 Samuelu 13:13-14

E iai tagata sa maumea ma tulaga tauoloa muamua peitai ua oo ina leai se mea o iai i aso nei. E leai se tulaga e sili atu ona leaga i lo le tagata sa maumea ma tauoloa talu ai. Mo se faataitaiga, o i latou e lē maua se taavale ae o i le pasi, ae lāvea i seisi tagata, e latou te vaai iai o se tulaga masani. Peitai, o tagata sa masani i le ō i taavale, e ono faigata ona toe ō i le pasi. E ono lāvea i se tagata i luga o le pasi ae faaseā, e latou te ono lagona le tigā pe a fai iai se tagata, ‘a e musu e lāvea se tagata ia te oe i luga o le pasi, aisea e te le alu ai e faatau sau taavale?’ Ia aua lava nei avea oe ma tagata sa tulaga lelei talu ai, i le suafa o Iesu. 

E leai se mea e pito sili ona leaga e pei o le tagata sa siamupini talu ai. E mafai i tagata fusu ona ta’u atu ia te oe, o le taimi e avea ai ma siamupini, o isi tagata fusu i le latou paga, o le a naunau e lui ia te ia i se fusuaga. A e malolo ina ua e oo i le manuia ma faapea, ‘O a’u e silisili, e iloa uma e tagata lo’u lelei’, e te ono paū mai lou tulaga lelei ma amata ona lē toe amanaia oe. Peitai e tatau ona e galue e sili atu ina ia sili atu pea. O le mea e tatau ona e faia ia tumau i le tumutumuga, o le galue filigā ia sili atu i le tulaga a’o e taumafai atu i le tumutumu. 

Ina ua valaau le Atua e avea a’u ma faifeau, sa ou tatalo ia matuā lautele ma mamao le faaaogaina o lou tagata i le galuega a le Atua, ma ou te ta’u atu ma le mautinoa, o le lautele o le tulaga tatalo sa iai i lea uluai taimi, e lē taitai ona faatusaina i le tulaga o le tatalo i le taimi nei. A maualuga lava le tulaga e sii iai a’u e le Atua, e siitia foi le anapogi, sii i luga le suesue i le Tusi Paia, sili atu lauga ou te lauga ai ma siitia pea le tulaga galue. O le ala tonu lea o loo mafai ai ona ou tumau i le tulaga e siiitia pea. 

Le au pele e, afai e te naunau ia avea oe ma tagata silisili i le galuega o loo e galue ai, e tatau ona saunia oe e tuu atoa iai mea uma e manaomia. O le tulaga pito taua, o le tumau i le pito i luga, e tatau ona saunia lou tagata e faaopoopo pea galuega e faia, e aofia ai le faaopoopo pea o le iloa, galue so’oso’o tauau ma isi tagata popoto i tulaga o loo e iai, ma galue malosi ma filigā ia faifaipea. Ou te tatalo ia e oo i le tumutumuga, ma tumau ai, i le suafa o Iesu. E sili atu le maualuga o le galue e manaomia e tumau ai i le tumutumu i lo le taimi ao e taumafai atu ia ausia, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 16 TESEMA 2025

(tusia e Pastor EA Adeboye)

Manatu Autu: Ia aoaoina i aso uma (Learn everyday)

Tauloto Tusi Paia: Salamo 25:9“E ta‘ita‘iina e ia o ē agamalū i le fa‘amasinoga; na te a‘oa‘o mai fo‘i i ē agamalū i lona ala.”

Faitauga - Tusi Paia: Galuega 17:10-11

E iai se tagata na fai mai, o le lalolagi o se aʻoga, ma o ē e atamamai, e o i le aʻoga e sa’ili a’oa’oga lelei i aso uma aua e iai lava mea e aʻoaʻoina mai ai. Fai mai le Faataoto 9:9, afai e avatu i le tagata poto le aʻoaʻoga, o le a atili ai ona poto. E tatau ona e loto matala e aʻoaʻoina mai isi tagata aua e iai lava mea aoga e aʻoaʻo atu ai isi tagata iā te oe, e o’o i tamaiti. O le tagata e tatala ia aʻoaʻoina e naunau ma saunia e aʻoaʻoina. Fai mai le Mareko 4:25; “Auā o lē ‘ua i ai mea, e avatua pea ‘iā te ia; a o lē ‘ua leai ni ana mea, e ‘ave‘eseina le mea ‘ua ‘iā te ia.”

So‘o se tasi e naunau e aʻoaʻoina i aso uma, o le a faʻateleina lona malamalama ma le poto. O le tagata e tatala ia aʻoaʻoina, e matala i le poto ma e naunau e faʻaopoopo le poto o isi i lona lava poto. A tatala lou tagata ia aʻoaʻoina, e aʻoaʻoina oe e ala i faʻatonuga, ae lē seiloga e ui ai. Mo se faʻataʻitaʻiga, afai e te fai atu pea i se tamaitiiti e ‘aua neʻi tuʻu lona lima i le afi, ma e taofia o ia mai mea vevela, afai e lē tatala lea tamaitiiti ia aoaoina, o le a ia tamoe atu i soo se mea o loʻo e taumafai e laveaʻi mai ai o ia. E iai le aso e ono ia tuʻu ai lona lima i le afi ma afaina ai. Ae peitaʻi, o le tamaitiiti e tatala ia aoaoina, e faalogo ma usita’i i faʻatonuga, ma tuputupu aʻe i le poto. E lē oo o ia i le tiga o le lē usitaʻi, i le tautogafitia o manuʻa sa tatau ona ‘alofia.

O Tavita o se tagata na matuā loto tatala ia aʻoaʻoina. I le tele o taimi i le Tusi Paia, sa ia tatalo ma ole atu i le Atua e aʻoaʻo o ia; sa ia naunau pea e aʻoaʻoina. I le Salamo 25:4, sa ia ole atu i le Atua e aʻoaʻo o ia i ona ala. A e loto tatala e aʻoaʻo i ala o le Atua, e te lē mafai lava ona sē solo. I le Salamo 119:26 ma le Salamo 119:33, sa ia ole atu i le Atua e aʻoaʻo o ia i ana tulafono ina ia ona tausia seʻia o’o i le oti. I le Salamo 119:66, sa ia manaʻo e aʻoaʻo i le faautauta lelei ma le poto. E lē gata i lea, sa ia ole atu i le Atua e aʻoaʻo o ia e fai Lona finagalo i le Salamo 143:10. E leitioa, e oo mai i aso nei, o Tavita o le tupu sa sili ona vi‘ia i Isaraelu.

O le faitauga o le Tusi Paia i lenei aso o loo talanoa mai i tagata faatuatua i Perea o ē na sauni ia aʻoaʻoina. Na latou talia le ‘upu ma le fiafia tele, ‘ua sā‘ili i Tusi i lea aso ma lea aso.  Sa fiaʻai le ʻau Perea i le Upu a le Atua ma tumau i le agamalu e suʻesuʻe afioga Paia i aso uma. Le au pele e, ia e pei o Kerisiano i Perea ma ia e to’aga ia aʻoaʻoina i aso uma.

Tatalo:
Le Alii e, ou te naunau e aʻoaʻoina mai iā te Oe i aso uma. Faamolemole aʻoaʻo mai ia te aʻu, ina ia ou atili ona faapei o lau afio, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 15 TESEMA 2025

(tusia e Pastor EA Adeboye)

Manatu Autu: E te selesele i mea na e lūlū (You will reap what you sow)

Tauloto Tusi Paia: Kalatia 6:8 “O sē lūlū i la lona tino, e selesele mai ai o ia i la le tino le mea e pala; a o sē lūlū i la le Agaga, e selesele mai ai e ia i la le Agaga le ola fa‘avavau.”

Faitauga - Tusi Paia: Faataoto 6:6-11

O so’o se mea e tuu e tagata i o latou olaga e fuafua iai mea latou te maua mai ai. Afai e na o fiafiaga i le lalolagi mea e latou te tuuina iai, o lona uiga e lē maua se tulaga maoae, peitai afai e galue filigā, e manuia (Faataoto 12:24). 

Sa faamatala e lo’u tamā faaleagaga se tala i ni alii talavou na ō e saili i se tagata vavalo poo le a se ata o la lumanai. Na fai mai lea tagata vavalo o le tasi e avea ma tupu ao le isi o le a avea ma auauna. O le tagata na vavalo o le a avea ma tupu, na amata mai lea aso ona amio pei o se tupu ao leisi na vavalo e auauna, na ia faapea ia te ia lava, ‘o le a la’u mea ua faia ou te agavaa ai i lenei iuga? Aisea e avea ai a’u ma auauna?’ Na mafaufau pea i le tala na vavalo ai lea tagata ia te ia ma ua oso lona ita. Ina ua taunuu i le fale, na tago i lana sapelu ma le suō ma alu atu loa i le vaomatua ma amata ona totoina se vaega o le vaomatua. E ala i taeao uma faamamā ma toto le eleele seia oo i le leva o le po. A faalogo atu i le tigā o le tino, e talanoa iai, ‘e le mafai ona e lelavā aua ou te lē taliaina le avea ma auauna’. Ua mavae le tele o tausaga ae o loo galue pea e faalautele lana faatoaga. Ua maea sina taimi, ua oge lona nuu. Ua uma tupe a tagata o le taulaga ma ua leai se meaai e maua. E iai se aso na alu atu ai se tulimanu e saili se manu ae tau atu ai i le faatoaga ma le faleoloa meaai a lenei alii. Na toe foi i le taulaga e talai atu iai le faleoloa meaai ua ia maua ma na ō atu uma tagata iai. E leai ma se tagata na iai se tupe e faatau ai meaai o lea na latou faatoga atu i lenei alii talavou e avatu ni meaai mo latou ae o le a latou auauna ia te ia. Na ia talia ma ua latou faauu ia te ia o lo latou tupu. E iai se aso ao nofo i lona nofoa o le tupu, o le isi alii lea na fai mai le alii vavalo o le a avea ma tupu, ua sau ma ole atu ia te ia e faapea, ‘faamolemole aua nei ou oti i le matelaina i le fiaai, aumai se meaai mo a’u ae fai a’u ma au auauna’. 

Le au pele e, o soo se mea e te lūlū i lou ola, e te selesele foi iai. A e tuua iai ma le galue filigā, e te selesele i le faulai o mea aua o le mana‘o o ē filigā i galuega e matuā mā‘ona ia (Fa‘ata‘oto‬ ‭13‬:‭4‬). A e lūlū i manaoga o le tino, e te selesele i la le tino i mea e pala, e pei ona tatou faitau ai i le tauloto mai le Tusi Paia o le asō. Afai e te manao i mea silisili i le olaga nei, e tatau foi ona silisili mea e te lūlū ma avea Iesu e pulea lou olaga, o le auala pito sili ona lelei lea e tatau ona e faia. Mulimuli ia te ia ma le filigā ma usitai i ana poloaiga ina ia silisili mea e te maua i le olaga nei, i le suafa o Iesu, Amene. 

OPEN HEAVENS

MATALA LE LAGI MO LE ASO SA 14 TESEMA 2025

(tusia e Pastor EA Adeboye)

Manatu Autu: E tatau ona e tupu (You must grow)

Tauloto Tusi Paia: 2 Peteru 3:18 “A ‘ia tutupu ‘outou i le alofa tunoa ma le poto i lo tatou Ali‘i, o lo tatou Fa‘aola lea o Iesu Keriso. ‘Ia ‘iā te ia le vi‘iga i ona po nei, ma ‘ia o‘o i le aso fa‘avavau. Amene.”

‭‭

Faitauga - Tusi Paia: 2 Peter 1:5-7

I le Galuega 12:25, na ave e Paulo ma Panapa ia Ioane Mareko ao malaga atu faamisiona, peitai ina ua oo atu i le faigata, na ia lafoai ia Paulo ma Panapa. Na faanoanoa Paulo, ua ia fai mai i le Galuega 15:36-41, e lē tatau iai laua ma Panapa ona toe ō ma ave Ioane Mareko i leisi la malaga faamisiona. Peitai, i le 2 Timoteo 4:9-11, o le Paulo lava e tasi o lē sa lē toe manao e ave Ioane Mareko i se malaga ua ia faapea mai, ‘aumai o ia aua e aogā o ia i le galuega’. O le Ioane Mareko lava lea, na iu ane ua ia tusia le tusi o Mareko i le Feagaiga Fou. A tuputupu pea le tagata ma siitia lona tomai, o i latou na teena o ia muamua o le a liliu ma opogi ia te ia. 

Fai mai Paulo, ao tamaitiiti, sa ia tautala, iloa ma manatunatu faatamaitiiti, ae ina ua avea ma tagata matua, ua ia tiai ma tuu ese mea faatamaiti (1 Korinito 13:11). E amata soo se tagata o se tamaitiiti, peitai e lē lelei le tumau o se tamaitiiti. O soo se tagata e lē tuputupu ae, ua amata ona oti. 

I lou tulaga o se atalii poo se afafine o le Atua, o le vaega taua e tatau ona e tuputupu ai o lau amio. Afai o oe o se tagata e leai se onosai ae lei tuuina atu lou ola ia Keriso, e lē tatau ona e tumau ai i lea tulaga. E lē tatau i se kerisiano ona avea le ita gofie o se vaivaiga i lona olaga atoa. Afai na e tilotilo i auala e fofo ai le ita gofie i le 20 o ou tausaga, e tatau ona e manumalo ai e ala i le fesoasoani a Agaga Paia i lou 40 tausaga. 

 E tatau ona e tuputupu ae i le faatuatua. Na talanoa mai Iesu i tagata e leai ni faatuatua i le Mareko 4:40 faatasi ma tagata e iai faatuatua e pei o le fua o sinapi, tusa poo le a malosi, e lē tatau ona e tumau ai i lena tulaga, ae tatau ona e siitia atu i leisi tulaga sili atu o le faatuatua (Mataio 15:28). E lē tatau ona e toe fefe i ni ma’i faapea ma temoni pe afai o loo e tuputupu pea ia Keriso. 

Le au pele e, e lei faaolaina oe e te ola i le fefe ma le vaivai. E le o oe o se tagata matamata i mea ofoofogia e faia e le Atua i lana fanau. E tatau ona e tuputupu ae i le faatuatua seia e oo i le tulaga e te faamalolo ai i ē mamai, tutuli temoni ma faatutū i e ua oti. Fai ma masani le faaalu o lou taimi taua e suesue i le Tusi Paia (Roma 10:17), tatalo e lē aunoa ia Agaga Paia (Iuta 1:20), ma ia saili i meaalofa silisili o Agaga Paia (1 Korinito 12:31). I le auala lea, e le taitai gata lou tuputupu ae, i le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 13 TESEMA 2025

(tusia e Pastor EA Adeboye)

Manatu Autu: E inoino le Atua i le paie (God hates laziness)

Tauloto Tusi Paia: Failauga 9:10 “O mea uma ‘ua e iloa e faia e ou lima, ‘inā faia ia ma lou malosi; auā e leai se galuega, po o se mafaufau, po o se iloa, po o se poto i le tu‘ugamau, o lo‘o e alu atu i ai.”

‭‭

Faitauga - Tusi Paia: Kolose 3:23-24

E toatele tagata ua faauiga seseina le Kenese 2:2. O loo manatu na malolo le Atua mai le galue, na amata mai le aso fitu ina ua maea ona ia faia le foafoaga. Peitai i le Ioane 5:17, na fetalai Iesu, “O lo‘o galue lo‘u tamā, e o‘o mai lava i le aso nei; o lo‘o galue fo‘i a‘u,” o lona uiga e lē faapea e leai se mea o faia e le Atua, o loo galue o Ia. O ia o le Atua e galue ma le filigā ma e lē moe pe tulimoe o ia (Salamo 121:4). A e faitau i le Tusi Paia atoa, e te maitauina e filifili lava e le Atua tagata galulue filigā i soo se taimi e na te fia faaaogaina ai se tagata i lana galuega i le lalolagi. 

A e faitau i le ala na filifili ai e Iesu lona au soo, e te iloa ai sa pisi lava i latou galuega i le taimi na valaauina ai i latou. Sa fagota Peteru i lona vaa, e faapena foi Iakopo ma Ioane, atalii o Sepetaia ( Mareko 1:16-20). Sa galue Mataio i le nofoaga e ao ai lafoga  i le taimi na valaau ai Iesu ia mulimuli atu ia te ia ( Mataio 9:9). E lē taitai valaau pe faauuina e le Atua tagata paie, e na te valaauina tagata galulue filigā ma faamaoni aua e inoino i le paie. 

O tagata paie latou te lē maua se mea lelei mai le Atua. Aua foi o le a latou faamaimauina punaoa e na te foai atu iai latou, ma e lē fiafia o ia i mea ua tiai ma faalēaogaina. O soo se mea i lima o le tagata paie, e lē mafai ona faaaogaina pe faaolaolaina lelei. I le Faataoto 24:30-31, fai mai Solomona, “Na ‘ou alu ane i le fanua o le tagata paiē; ma le tōvine o le tagata ‘ua leai se mafaufau; fa‘auta fo‘i, ‘ua tutupu a‘e ‘ua so‘o lava i la‘au tuitui, ‘ua ufitia uma lava i le vao ogoogo, ma lana pā ma‘a ‘ua solo.”

‭‭

‭‭Afai o le potu o se tagata e palapala ma lē teuina lelei, o se faailoga lena o ia o se tagata paie. Afai o le masani i se tagata le lē ausia o galuega e tatau ona faia i le ofisa, aoga poo le galuega a le Atua, o se faailoga lena o le paie. O leisi faailoga o le paie o loo faamauina i le Faataoto 26:13 “Ua fai ane le paiē, “O lo‘o i le ala le leona; ‘ua i malae le leona.”

Afai e talanoa mai lava se tagata i le faia o se mea taua, peitai e iai lava se mea ua fai ma alofaga i le lē mafai ai ona faataunuuina, o lona uiga o se tagata paie. 

Le au pele e, e lē foai atu e le Atua ia te oe ni punaoa pe siitia foi oe i ni tulaga maualuga pe afai e te paie. Suesue lelei lou olaga ma le faamaualalo, ma afai e te maua ai ni vaega o le paie e pei ona ou talanoa atu ai i luga, ia faia loa se suiga moni lelei i le asō, ma ia avea upu ‘galue ma le filigā’ o ni upu e te leoleoina ma savali ai, e amata atu nei. I le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 12 TESEMA 2025

(tusia e Pastor EA Adeboye)

Manatu Autu: Tulafono o le seleselega (The Law of Harvest)

Tauloto Tusi Paia: 2 Korinito 9:6 “A o la‘u lenei e fai atu, o lē ‘ua itiiti ana saito e lūlū, e itiiti fo‘i ana e selesele mai; a o lē ‘ua tele ana e lūlū, e tele fo‘i ana e selesele mai.”

‭‭

Faitauga - Tusi Paia: Kenese 8:22, Kalatia 6:9

I le 1979, sa ou malaga i se togalauapiga a Kenneth Hagin i Oklahoma, i Amerika. Ao faagasolo le fonotaga, na faailoa mai e se tasi o faifeau o le ao le foai mo le aoga Tusi Paia. I le taimi lea, na talosaga se tamaloa e fia faia sana upu. Na ia faapea mai, ‘ou te folafola atu o le aofaiga atoa o le foai i le po lenei, o le aofaiga foi lena o le a mā foai atu ma lo’u toalua’. E tusa ma le 17,000 na auai i le sauniga, ma ina ua faaopoopo uma le foai, e 3.5 miliona le aofai. Ina ua faalogo iai le potopotoga, na matou manatu ua tupu le faaletonu i le tamaloa lea. Peitai na ia tago i le masini faaleotele leo ma faapea mai, ‘le au uso e, na o le pau lena o le aofaiga tou te mafaia?’ I lo’u nofoaga i lea taimi, na ou faapea ane ia te a’u, ‘e iloa e le tamaloa se mea ou te lei iloa’. Na maea loa le sauniga, na ou savali atu i le tamaloa lea ma faapea atu, ‘lau susuga, o le a le mea lilo o loo e iloa?’. Na ia faapea mai, ‘e faigofie. I le lima tausaga talu ai, na amata sau pisinisi i le 500 tala, ona fai lea o se ma feagaiga ma le Atua, ou te lē faaoleole ia te ia i se foai e 10% o tupe mama. Na amata loa ona ou foai atu le 90% o tupe mamā ae ou faaaogaina le 10%. O le taimi nei e sili ma le 50 miliona lo’u tamaoaiga, o lona uiga o loo ou iloa ma manino i la’u mea o loo faia’. 

O le tulafono o seleselega o loo faapea mai a itiiti mea e te lulu, e laitiiti foi mea e te selesele. O se tagata e lulu le afe o taulaga mū e tatau ona latou iloa, o le taui e lē laitiiti. O le afe o taulaga mū e fua ta’i selau o lona taui e matua telē. Na foai e Solomona i le Atua le afe o taulaga mū i le 2 Nofoaiga Tupu 1:6. I le 2 Nofoaiga Tupu 7:5, o leisi taimi na fai ai leisi taulaga, na ia foai le 22,000 o povi ma le 120,000 o mamoe, o lona uiga na matuai faateleina lana uluai taulaga. O le tulafono lena o le seleselega o lo’o galue mai. O Solomona, e lē na o ana manu na faateleina, e tele atu isi mea na maua e le mafai e tupe ona faatauina, o le poto, iloa, filemu ma le soifua faafualoa. 

Fai mai le 2 Korinito 9:7-8 a e foai, e mafai e le Atua ona avatu le alofa tunoa ia te oe. A e suesue i le talaaga o le olaga o Solomona i lana nofoaiga tupu, e leai ma se taua na ia tauina e ui na soifua i le vaitau e tele taua na masani ona ō iai tupu. 

Le au pele e, ava i le Atua i lau foai ia te ia ona ia faatumuina lea o ou fale teu oloa seia oo ina taumasuasua (Faataoto 3:9-10). O le tulafono lea o le seleselega, ma o se folafolaga mai le Atua e lē taitai ona lē taunuu. Afai e te manao e tele ma faulai au seleselega, e tatau ona tele ma faulai mea e te lulu, o le tulafono lena o le seleselega, i le suafa o Iesu, Amene.

OPEN HEAVENS

MATALA LE LAGI MO LE ASO TOFI 11 TESEMA 2025

(tusia e Pastor EA Adeboye)

Manatu Autu: Pe a faatasi le Atua ma oe (When God is with you)

Tauloto Tusi Paia: Salamo 23:4 “E ui lava ‘ina ‘ou savali i le vanu o le ata o le oti, ‘ou te lē fefe lava i se mea leaga; auā o oe tā te fa‘atasi ma a‘u; o lau la‘au ma lou to‘oto‘o e fa‘amafanafanaina ai a‘u.”

‭‭

Faitauga - Tusi Paia: Isaia 41:10-13

I tausaga e tele ua mavae, sa faatau e se tasi o ou atalii sou pepa malaga i luga o se vaa mo tagata malaga tafafao. Mo aso muamua e ono o le malaga, e pei ua ta oo i le lagi i le laueleele nei, na malū lelei le sami, sa agiagi malie le savili ma sa manino lelei le vanimonimo. Peitai i le aso lona fitu, ua agi mai se matagi. Talitonu mai e te lē fia iai i le moana sausau i le taimi o ni afā. O le vaa e tele ona fogafale, ae na matua fesouaina e galu e pei o se pepa. O mea uma i luga o le vaa sa luluina, ma ua felelei solo mea o le vaa. E matua leaga lava. 

Na oo atu ina leaga atili ma ua fai le faasilasilaga a le kapeteni  e faapea, ‘Alii ma tamaitai, aua le popole. E 12 vaega o matagi ma afā ma o le  vaega o loo tatou feagai nei o le 10’. Ina ua ou faalogo iai, na ou fefe. Na ou liliu i le Atua ma faapea atu, ‘Le Atua e, o le a ea la’u mea o faia iinei i le afā vaega 10? I lo’u nuu o le vaitafe pito i telē lava e mafai e soo se tagata e oo i se tagata e tau leiloa aau e mafai ona aau i le isi itu’. Na faaauau le faasilasilaga a le kapeteni, ‘aua le popole ae toe foi loa i tou potu moe’. Ina ua ou oo atu i lou potu, na ou fesili i le Atua, ‘o le a la’u mea o le a fai nei?’ Na ia tali mai, ‘atalii, ao ou iai i le lalolagi, sa ou iai i se vaa na afatia i le matagi, o le a la’u mea sa fai?’ Na ou tali atu, ‘Le Alii e, sa e tofā’. Ua ou iloa lelei la’u mea o le a fai. Na ou oso i luga o le moega ma e lei leva ae gase loa la’u moe. Ou te ala ane, ua taunuu i le uafu ae ua malū ma filemu mea uma. O soo se taimi ou te faamatalaina ai lea tala, e fesili mai tagata ia te a’u, ‘e faapefea ona e moe i lena ituaiga taimi?’. E masani ona ou manatu ia te a’u lava, ‘o le a seisi mea ou te faia, puna i totonu o le sami?’ Ou te leiloa aau, peitai na ou maua le ituaiga filemu e na o le Atua e maua ai. E le gata i lea, ana ou le masani e faalogo i le siufofoga o le Atua ae lei oo i le afā, semanu e ono faatupuina lou toto maualuga ma popole vale ae leai se aoga’. 

Le au pele e, afai o oe o se atalii poo se afafine o le Atua, e faatasi lava o ia ma oe i taimi uma. E te soifua i se olaga e leai se popole pe afai e faaalu lou taimi lelei e mafuta ai ma ia i aso uma, aua foi o le a e iloa gofie lona siufofoga, ma e na te avatu lona filemu, o le filemu e silisili i mea uma e te manatu iai (Filipi 4:7). Afai o oe o se atalii poo se afafine o le Atua, e faatasi pea o ia ma oe, ma o le a e fiafia i lona filemu pe afai e te mafuta vavalalata ma ia, i le suafa o Iesu, Amene.

OPEN HEAVENS

MATALA LE LAGI MO LE ASO LULU 10 TESEMA 2025

(tusia e Pastor EA Adeboye)

Manatu Autu: Faamoemoega i le manuia (Hope of Glory)

Tauloto Tusi Paia: Kolose 1:27 “Na finagalo fo‘i le Atua ‘ona fa‘ailoa atu ‘iā i latou le uiga o le silisili o le lelei o lenei mea lilo o i nu‘u ‘ese, o Keriso lea o lo‘o ‘iā te ‘outou, o le fa‘amoemoe i le manuia.”

‭‭

Faitauga - Tusi Paia: Salamo 126:1-6

O le toatele o tagata e lei tuuina atu o latou ola ia Keriso o loo manatu o loo latou fiafia i le olaga i le ola ai i le agasala. Faataitaiga, e latou te manatu e manaia tele le tele o paaga seia oo ina latou maua ini faama’i e leai ni fofo. O le toatele o i latou e manatu e lē afaina le maua o tupe i soo se auala, pe lelei pe leaga, seia oo ina avea le oa e tele ua latou maua e taitaia i latou ia faaumatia. O le iai ia Keriso ma ola e tusa ma lana Upu e fesoasoani i le tagata faatuatua e soifua i se olaga e puipuia ai i latou mai le tele o puapuaga. O i latou e ia Keriso e latou te maua faamaumauga e maua ai le faamoemoe ma le saogalemu. 

O le toatele o tagata lē faatuatua e foliga mai o loo manuia mea latou te faia pe a e tilotilo i o latou olaga ma foliga vaaia, peitai o le tulaga moni, o loo matuā puapuagatia. O nisi o i latou e tau le mafai ona momoe lelei ona o mea leaga o loo latou faia. O le iai ia Keriso e maua ai le filemu ma tafiesea mai lou loto le fefe i le lumanai. O se olaga e aunoa ma Keriso, o se olaga e leai se faamoemoe. Fai mai le Aposetolo o Paulo i le Efeso 2:12

“O ona pō ia sa lē i ai ‘iā te ‘outou Keriso, sa tagata ‘ese ‘outou i le nu‘u o Isaraelu, o tagata ‘ese fo‘i i feagaiga ‘ua i ai le mea na folafolaina, sa leai so ‘outou fa‘amoemoe, sa aunoa fo‘i ma le Atua i le lalolagi.”

Ona o Keriso, ua mautinoa ai e tagata faatuatua tusa poo a luitai e feagai i le ala, e iu lava i le manumalo. Na fetalai Iesu i le Ioane 16:33, e maua fo‘i i tatou i le puapuagā i le lalolagi, peitai ia tatou loto tetele, auā ‘ua Ia manumālō i le lalolagi mo i tatou. O lo tatou faamoemoe o loo maua’a i folafolaga a le Atua ae le nā oni miti ma mafaufauga. A e faitau i folafolaga a le Atua i le Tusi Paia, e latou te faaosofia le faamoemoe ia te oe. Faataitaiga, i le Eperu 13:5, na ia folafola e na te lē tuua pe tuulafoai iai tatou. O lona uiga tusa poo a mea o loo e ui ai, o loo iai le Atua ma oe i ou tafatafa. I le Roma 8:28, na ia fetalai e galulue mea uma mo lou lelei pe afai e te alofa ia te ia ma e na te valaauina oe mo lona finagalo. O lona uiga, afai e te alofa ia Keriso ma e savali e tusa ma le faamoemoega o lou olaga, tusa poo a luitau ma faigata ete feagai ma oe, e te ata mulimuli. 

Le au pele e, ou te manao ia e malolo ma le mautinoa o loo manatu mai le Atua ia te oe, ma o ona manatu ia te oe o manatu o le filemu, e lē o le malaia ma e na te foaina atu ia te outou le iuga e iai le faamoemoe (Ieremia 29:11). Ou te tatalo ia e u’umau pea i taimi uma i le faamoemoe o le manuia e te maua ia Keriso i le suafa o Iesu. A aunoa ma Keriso, e leai se faamoemoe moni, Amene. 

OPEN HEAVENS

MATALA LE LAGI MO LE ASO LUA 9 TESEMA 2025

(tusia e Pastor EA Adeboye)

Manatu Autu: Usitai ma le lagolago a le Atua (Obedience and God’s support)

Tauloto Tusi Paia: Isaia 46:10 “O lo‘o fa‘aali talu mai le amataga o mea e mulimuli; mai anamua fo‘i o mea ‘ua lē faia; o lo‘o fai ane, “E tu la‘u pule, ‘ou te faia fo‘i mea uma ‘ou te loto i ai.”

‭‭

Faitauga - Tusi Paia: Salamo 35:27-28

I ni tausaga ua mavae, o se sui pule i se kolisi a teine i Benin, i Nigeria i Saute, na ia faia se poloaiga e faapea, o so’o se tasi e ta’ua le suafa o Iesu i totonu o le a’oga o le a faasalaina. I lena vaitaimi, o nisi o teine o le Kolisi na faaolaina, ina ua faalogo i le lauga a se tagata faauu mai le Iuniveiste ua maea le tausaga i le polokalame a le malo e aoaoina ai talavou. Ona o le poloaiga a le latou sui pule e le tatau ona ta’ua le suafa o Iesu i le aoga, sa masani ona fono faalilolilo teine aoga e tatalo ma suesue i le Tusi Paia. I se tasi aso, a’o faia aoga Tusi Paia i le po i le malae o le aoga, na savali faafuasei atu le sui pule ia i latou. Na ia folafola atu o le a ia tutuli i latou i le potopotoga a le a’oga i le aso e sosoo ai ona ua latou le usita’ia lana poloaiga, ma ina ua taunuu i le fale, na ia faamatala atu i lona toʻalua mea uma sa tutupu.

A’o le taimi lea e tasi, na taufetuli teine aoga i le alii talavou lea na lauga iai latou ma taʻu iai le mea ua tupu. Na ia liliu atu i le Atua ma faapea atu, “Le Alii e, afai e i ai se tasi e fa’asalaina, faasala ia te a’u. Faamolemole, aua ne’i tutulia i latou.” O le taeao na sosoo ai, na potopoto tamaiti aoga ma faiaoga mo le sauniga masani a le aoga. Sa tetemū teine aoga a’o latou faatalitali i le sui pule e sau i le malae o le sauniga e faalauiloa le tutulia o I latou mai le kolisi. Sa faatalitali foi le toalua o le sui pule  ia vave savali atu i le potopotoga o le taeao e tutuli ai i latou. Ina ua ia tilotilo i le taimi ma iloa ai ua tuai mai o ia, sa alu atu ma tu’itu’i i le faitotoa o le potu moe e fafagu ia alu i le potopotoga a le aoga ae lei maea. Sa ia tu’itu’i pea, ae le’i tali mai o ia – ua aveesea e le Atua lona ola i le po ua mavae.

A filifili se tagata e tetee I fuafuaga a le Atua, e ono puapuagatia aua e galue malosi le Atua e lagolagoina lana galuega amiotonu. O se tulaga lamatia tele le tū e tetee atu i le mea e lagolagoina e le Atua aua o ia o le afi maamaai (Eperu 12:29). Na te faaumatia soo se mea ma soo se tasi e tetee i lana pule. Fai mai le Efeso 1:11: “O ia lava ‘ua matou maua ai le tofi, o i matou na tofia anamua, e tusa ma le finagalo o lē ‘ua matuā galue i mea uma lava, e tusa ma le pule a lona finagalo;”

Le ‘au pele, o le auala pito sili ona faigofie e maua ai le lagolago a le Atua ma faaauau ai ona e fiafia i taimi uma, o le savali i le usiusitai i lona finagalo i taimi uma. Ia mautinoa o loo e faia e tusa ma ana fuafuaga ina ia aua lava nei e fetaiai ma Lona toa’sā.

Tatalo: 

Le Tamā e, faamolemole fesoasoani mai ia te au ia ou usiusitai ia te oe ma ia ou faia e tusa ma lou finagalo i taimi uma, i le suafa o Iesu, Amene.