OPEN HEAVENS

MATALA LE LAGI MO LE ASO TOFI 4 IUNI 2026

(tusia e Pastor EA Adeboye)

Manatu Autu: O se loto fou 4 (A brand new heart 4)

Tauloto Tusi Paia: Faaaliga 3:15 “Ua ‘ou iloa au galuega, ‘e te lē ma‘alili, ‘e te lē vevela fo‘i. ‘Ou te loto ‘ina ‘ia e ma‘alili pe vevela.”

Faitauga - Tusi Paia: Mataio 13:7, 22

O le ituaiga eleele lona tolu na faamatala e Iesu i le faataoto o le tagata lūlū saito, o le ‘vao tuitui’. Ua ia faatusa lenei eleele i tagata  e faalogo i le Upu a le Atua, peitai ua faamuamua iai latou isi mea e tele ua lē mafai ai ona fua mai le Upu i o latou olaga. O ituaiga tagata ia e foliga e fiafia i le Upu a le Atua peitai e lē lava e suia ai o latou ala pe tuua ai tuinanau i fiafiaga o le lalolagi. O se alii e pese i le aufaipese a le lotu ma galue punouai e auauna i le Atua ae o loo faia pea le faitaaga, o se faataitaiga lea o se tagata e vao tuitui lona loto. O ia tagata e latou te talia le Upu a le Atua peitai latou te lē faatagaina e suia ai i latou. 

O nisi kersiano e finau ma fesili faapea, ‘o fea o le Tusi Paia o tusia ai o le inu ava malosi o se agasala?’. O nisi e faapea mai o le faalogologo i pese o le lalolagi e lē o se agasala ae pau o lea, e aua le faatinoina upu o pese, pe faapea mai foi o le taaalo i taaloga faitupe ma petipetiga e lē leaga aua foi e lē o fai mai ai le Tusi Paia. O ou faalogo i ia faamatalaga, ou te iloa o loo tauala mai i loto vao tuitui. E naunau e auauna i le Atua, ae e lē fia manao e tuua fiafiaga o le lalolagi. A e faalogo atu o loo e sailia ni vaega o le Tusi Paia e faataga ai le auauna i le Atua ae o loo faia pea mea o loo faia e tagata lē faatuatua, ia e mataala, o foliga vaaia tonu nā o le loto vao tuitui. 

O le avea ma atalii/ afafine o le Atua e le faapea o le mulimuli i tulafono ma poloaiga, ae ia foliga ma amio pei o Keriso. A afio moni Agaga Paia i totonu ia te oe, e te sola ese ma mea e faalavelave i le lua mafutaga ma le Atua, pe faaosofia le au lē faatuatua e fetuu i lona suafa, pe o faasino mai e le Tusi Paia o se agasala pe leai. Faataitaiga, afai e tuu e se alii kerisiano lona lima i le pui manava o se tamaitai e lē o sona avā, e mafai ona finau mai nisi e lē o se tulaga leaga ona e na te lē o solia lana tautoga i lona toalua, peitai o loo manino e lē talafeagai. E lē gata i lea e upuia ai e le au lē faatuatua le faatuatuaga kerisiano. 

Le au pele e, e toatele tagata ua lē toe mafuta ma Keriso ona e lē mananao e suia ma le atoatoa mo ia. E naunau e pule ma faia mea e loto iai ae aapa pea ia Iesu. Afai o e ola ma soifua faapea, e tatau ona suia lou loto i le asō aua foi o le a leai ni fua e fua mai o lau savaliga ma le Atua. Ou te tatalo ia e ola i se olaga kerisiano e fua tele mai, i le suafa o Iesu. Ua lafoai ea ma le atoatoa lou ola i le Atua, pe o ē saili ea ini vaega o le Tusi Paia e faataga ai ona e amio pea e pei o le lalolagi? I le suafa o Iesu, Amene. 

OPEN HEAVENS

MATALA LE LAGI MO LE ASO LULU 3  IUNI 2026

(tusia e Pastor EA Adeboye)

Manatu Autu: O se loto fou 3 (A brand new heart 3)

Tauloto Tusi Paia: 2 Peteru 3:18 “A ‘ia tutupu ‘outou i le alofa tunoa ma le poto i lo tatou Ali‘i, o lo tatou Fa‘aola lea o Iesu Keriso. ‘Ia ‘iā te ia le vi‘iga i ona po nei, ma ‘ia o‘o i le aso fa‘avavau. Amene.”

Faitauga - Tusi Paia: Mataio 13:5-6, 20-21

O le ituaiga eleele lona lua na faamatala e Iesu i le faataoto o le tagata lūlū saito o le ‘papa’ e itiiti le eleele o iai. O le ituaiga eleele lea e faatusa i tagata ua latou maua le Upu a le Atua ma le fiafia peitai na ū iai o latou tua ina ua fetaiai ma luitau i latou olaga ona o sauaga. Fai mai le Ioane 15:20 “‘Ia ‘outou manatua le ‘upu na ‘ou fai atu ai ‘iā te ‘outou, ‘E lē sili le ‘au‘auna i lona ali‘i.’ ‘Āfai ‘ua latou fa‘asauā mai ‘iā te a‘u, e fa‘asauā fo‘i ‘iā te ‘outou.”

I le fuaitau o loo taua i luga, na fetalai Iesu o ē mulimuli ia te ia e sauaina foi ona sa sauaina o ia. E le gata i lea, na faamatala e Paulo ia Timoteo i le 2 Timoteo 3:12, o soo se tasi e mulimuli ia Keriso, e na te ui i sauaga i se taimi. O le ui i sauaga e tigā, ma e le sao ese ai tagata faatuatua. O le mea moni, o le ui i afi o sauaga e fesoasoani i kerisiano e tutupu ai i le faatuatua (1 Peteru 1:6-7, Iakopo 1:2-3). E ui i lea, e manumalo lava le tiapolo e finau atu i isi tagata faatuatua, o le tigā o loo latou ui ai ona o sauaga, o le faailoga vaaia lea e lē faatuatuaina le Atua ma e lē alofa o ia iai latou. E manumalo le tiapolo i le faia o lea tulaga aua foi e lē o tutupu a’e kerisiano e latou te iloa atili le Atua e ala i lana Upu, ma leiloa ona ala, amio ma lona mana. O lona uiga, o lo latou faavae i le faatuatua e vaivai, ma e faigofie ona tāina e le tiapolo. 

E lelei le faalogo i le Upu a le Atua ma fiafia iai. Ae sili atu i lena, e iai le matafaioi a le tagata faatuatua ia tuputupu a’e i le agaga ( 1 Korinito 3:9-10) ma o se tasi o auala e faia ai, o le siitia o lou silafia o le Atua e ala i lana Upu. O lou lē iloa o le Upu a le Atua ma le leai o se galuega e faia e faatupuina lou tagata i le agaga, o se tulaga lamatia aua foi e oo atu ai ina faaumatia (Hosea 4:6). 

Le au pele e, aua nei faataga lou tagata e te paū atu i mailei a le tiapolo ma ia faaumatia ai ia te oe. Aua nā o le faalogo i le Upu a le Atua mai le tele o faifeau ma e fiafia ai, pe faapei foi o kerisiano e faatoa tatala le Tusi Paia i le aso Sa. Ae tatau ona e faapei o kerisiano Perea na latou saili i Tusi i lea aso ma lea aso pe moni ia mea, ma ia latou iloa le Atua ( Galuega 17:10-11). Ou te tatalo ina ia e lūlū fatu o le Upu a le Atua i lou loto i aso uma, ona e selesele lea o fua e faulai o lona agalelei ma le alofa mutimutivale, i le suafa o Iesu. O le tuputupu a’e i le iloa ma le silafia o le Atua e ala i lana Upu e taua tele i soo se kerisiano faatuatua, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 2 IUNI 2026

(tusia e Pastor EA Adeboye)

Manatu Autu: O se loto fou 2 (A brand new heart 2)

Tauloto Tusi Paia: Salamo 42:1 “Le Atua e, e fa‘apei ‘ona naunau o le ‘aila i vaitafe, o lo‘o fa‘apea ‘ona naunau o lo‘u agaga ‘iā te oe.”

Faitauga - Tusi Paia: Mataio 13:3-4, 19

O le ituaiga eleele muamua na taua e Iesu i le faataoto o le tagata lūlū saito o le auala, e pei ona tatou iloa i le faitauga mai le Tusi Paia o le asō. O le ituaiga eleele lea e faasino i tagata e faalogo i le Upu a le Atua peitai e lē malamalama ai pe faaaoga foi. O le vaega lea o tagata e latou te lē suesue i latou Tusi Paia, tusa foi pe latou te suesue iai, latou te lē fesili ni fesili  e fia malamalama ai i le faifeau poo faiaoga aso Sa. E latou te lē saili e malamalama i le Upu a le Atua, e latou te faalogo i le Upu ona faasolo lea o mea e masani ona fai. O le toatele o tagata i le vaega lea, e toaga i le lotu, na tutupu ae i aiga kerisiano ma e masani lava latou, e ō i le lotu. Sa ou faapea foi. Na ou manatu o lo’u tama, sa galue i totonu o le lotu, ma e tutusa ma faaiu, ua lava lea faailoga o au o se tasi o atalii o le Atua. Na ou faalogo i le Upu a le Atua i le tele o taimi, peitai ou te lei suesue ai lava. Ou te faafetai i le Atua na ia aumai se loto fou ia te a’u ina ua lafoai lou ola ia Iesu Keriso. 

Le au pele e, e te faapei o a’u i le taimi muamua? O ē faitau ea i lenei faamalosiau ona o se tulaga masani i lou olaga, i lau Eklaseia, i lou aiga poo le ofisa? E te suesue loloto, ia e malamalama i le mataupu ua suesueina? A e suesue i le Tusi Paia, e te fia moe i le maea ai ona faitau o le fuaiupu muamua ma le lua? Afai o lau tali o le ‘ioe’ i nei fesili, e manaomia lou ole atu i le Atua mo se loto fou, se loto e naunau e fia iloa atili o ia. Ole atu i le Atua e foai atu ia te oe se loto fou e fia iloa lana Upu ma fiafia e nofo ma mafuta i lona mamalu. O le tulaga pito taua, o lou faaavanoa o le taimi e suesue ai lau Tusi Paia i aso uma. E mafai ona e amata i le faitau e sili atu i mataupu o loo talanoaina i le asō pe faaaoga foi le faasologa o le faitauga o le Tusi Paia o le tausaga. E te lē ono malamalama i le amataga, peitai a e faia pea  i aso uma ma ole atu i le Atua e fesoasoani atu, e amata loa ona faamatala atu e Agaga Paia ia te oe le Tusi Paia, ma e lei leva se taimi, ae tumu lou loto i le Upu a le Atua ma fua mai ni fua e tele. 

O le tulaga pito sili ona lelei e te faia mo oe lava, o le saili ia e malamalama atili i le Upu a le Atua i aso uma. A ave iai lau faamuamua, e amata ona e maua lona filemu ma le alofa tunoa i auala e sili atu i mea ua e vaai iai muamua. Ou te tatalo o le a tele le seleselega o le alofa tunoa o le Atua e te maua i lou olaga, i le suafa o Iesu. 

Tatalo

Tamā, faamolemole foai mai ia te a’u se loto fou, se loto mama e naunau i lau Upu e sili atu i soo seisi lava mea, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 1 IUNI 2026

(tusia e Pastor EA Adeboye)

Manatu Autu: O se loto fou 1  (A brand new heart 1)

Tauloto Tusi Paia: Hosea 10:12 “Ia ‘outou lūlū saito mo ‘outou ma le amiotonu, ‘ia ‘outou selesele mai ma le amio lelei; ‘ia ‘outou suatia lo ‘outou fanua vaoa; auā ‘ua o‘o i ona po e sā‘ili atu ai i le ALI‘I se‘ia afio mai o ia, ma fa‘atotō ifo le amiotonu i luga ‘iā te ‘outou.”

Faitauga - Tusi Paia:Esekielu 36:25-30

E tusa ma le 2 Korinito 5:17, a fanau fouina se tagata, e avea o ia ma se tagata fou. I le Esekielu 36:26, na fetalai le Atua e na te aveese le loto ma’a’a ae suia i se loto aano, se loto fou. A tuuina atu e tagata o latou ola ia Iesu Keriso, e latou te fesuiai loto ma’a’a, ae suia i loto aano, i loto fou. Peitai e ui i lea, ua pipisi pei se faama’i le tele o tagata e fai mai o kerisiano, ae e leai ma se eseesega o latou loto ma loto o tagata lē faatuatua. 

O le faanoanoaga, o nisi o ia tagata o faifeau a le Atua, ae foliga o loo tutusa lava o latou loto ma loto o le au lē faatuatua. O nisi ua oo a ina lē mafai ona faamagalo i isi uso a faifeau ua faatigā iai latou. E sesē tele lea tulaga, auā e lē faapea le amataga o le Ekalesia. Fai mai le Tusi Paia na loto gatasi le Ekalesia (Galuega 1:14) ma na faaigoaina le au faatuatua, o kerisiano aua ua amio pei o Keriso (Galuega 11:26). Peitai, e te ono maua nisi, fai mai o kerisiano ae o loo talia tupe faaalatua pe sivasiva i fale kalapu, aua o loo ma’a’a pea o latou loto. 

Mai le faataoto o le lulū saito i le Mataio 13:1-23, o loo manino e leai se faaletonu o fatu na lulūina. O fatu, o loo faaalia, o le Upu a le Atua, e malosi aua o le Upu a le Atua e matua malosi. Peitai e ui i le malosi o fatu, e na o se vaega o le a fua mai ona fua. O le mafuaaga e lē fua ai ni fua ona o le eleele na lulu ai, ae na faamalamalama e Iesu, o le loto o le tagata o loo lulū ai le upu, o le vaega taua lea e fua iai pe fua mai le upu i lona olaga pe leai. 

Le au pele e, afai o e ola pea i le agasala, pe e te faataga foi mea i lou siomaga e fua iai lou talia o le Upu a le Atua ma galue i lou olaga, o lona uiga e te loto ma’a’a ma e lē fua mai le Upu a le Atua ia te oe. O le fua mai o le Upu a le Atua ia te oe, e tatau ona e salamo mai soo se agasala o loo iai pea i lou olaga, ma ole atu i le Atua e faamamā ia te oe, feliuaina oe ma avatu ia te oe se loto fou. E tali mai le Atua ma o le a ia saunia lou loto o se eleele lelei e tupu ma ola ai lana upu. Ou te tatalo ia faaauau ona e maua faamanuiaga mai le Upu a le Atua ao e lafoai atoatoa lou ola i le Atua, i le suafa o Iesu. 

Tatalo

Tamā, faamolemole aumai ia te au se loto fou ma ia fua mai lau Upu ia te a’u, i le suafa o iesu, Amene. 

OPEN HEAVENS

MATALA LE LAGI MO LE ASO SA 31 ME 2026

(tusia e Pastor EA Adeboye)

Manatu Autu: Faalagolago tau o le Leoleo Mamoe Lelei  (Depend Only On The Good Shepherd)

Tauloto Tusi Paia: Ioane 10:10 “O le gaoi, e leai se tasi mea e sau ai na ‘ona ia gaoi, ma fasi, ma fa‘aumatia; ‘ua ‘ou sau ‘ina ‘ia latou maua le ola, ‘ia maua atili ai lava.”

Faitauga - Tusi Paia: Salamo 37:3-7

Na folo e se tagata se tapui (mea faataulaitu) sa faapea e avea ai ia ma mauoa, peita’i na tumau pea le mativa, e le’i mauoa. E le gata i lea, na logoina ia o le a maliu pe a mavae le fitu tausaga ona o le tapui ua ia folo. Ina ua toe lua vaiaso na totoe e ola ai ma ua sioa atu le oti i ona fofoga, na tamoe mai i le RCCG. Ina ua ia faamatala mai ia i matou lona puapuaga na o matou ta’u i ai, o lo matou Atua o le lavea’i sili. Na ia ofo lona ola mo Keriso, ma ina ua o matou faia se tatalo puupuu mo ia, na ia pua’i mai i fafo le tapui sa ia foloina (tulou). Na toaga mai i le lotu mo le lua vaiaso, olioli ona o le fa’asa’olotoga na faia e le Atua mo ia. Ona faafuase’i lea ona le toe sau i le lotu. Ina ua o matou asiasi atu ia te ia na faapea mai, “Na ta’u mai e le tagata taulasea fai vai na faia le tapui, ia te a’u, na sesē lo’u foloina o le tapui.” Na ia toe folo se isi tapui, ma o le taimi la lea, na matua’i mauoa lava ia. Na ta’u e le taulasea ia te ia o le a soifua pea mo ni tausaga se fitu e fa’aaogā ma fiafia i ana oa ma ina ua lata ina uma le taimi (fitu tausaga) na faafuasei ona maua sana togafiti poto. Na ia filifili e alu e nofomau i Lonetona ma lona manatu, o temoni na o Aferika e mafai ai ona galulue. Peita’i o le tala faanoanoa na maliu I luga o le vaalele. 

O lo’u tamā i le Alii, Pa Josiah Akindayomi e masani ona fai mai, “O le a tausia oe e lou tamā i soosemea o ia te ia. Afai o ia te ia le leaga, o le leaga lena na te fa’aaogā e tausi ai oe, afai o ia te ia lelei, o le lelei fo’i e te maua mai ia te ia.” O le tiapolo e leai ma se mea lelei o i ai; afai e te alu i ai i soosemea e te mana’o ai, ia e mautinoa poo le a lava na te avatu ia te oe, e leaga. Peita’i o Iesu, o ia o le leoleo mamoe lelei; soosemea na te aumai e mautinoa lava e lelei. 

E tusa ai ma le Tusi Paia faitau o le asō, o le faamoemoe ma le faalagolago i le Atua lou auala i lona agalelei. O i latou e faamoemoe iā Iesu o le a maua le mana e avea ai ma atalii o le Atua (Ioane 1:12). O le a ia i latou le pule i le malosi uma o le fili ma e leai se mea e afaina ai i latou (Luka 10:19). E leai se auupega a le fili e fa’asagatau ia te i latou e manumalō (Isaia 54:17) ma latou te aai i mea lelei o le laueleele (Isaia 1:19).

Le au pele e, e te faamoemoe ea tau lava o le leoleo mamoe lelei? O i latou e faamoemoe ia te ia e faapei o le mauga o Siona. Poo le a lava le tulaga e o’o i ai, e lē fa’agae’etia i latou. Ia e fiafia lava oe i le Alii ona foaiina lea e ia ia te oe o mea e mana’o i ai lou loto (Salamo 37:4). I le suafa o Iesu, Amene.

OPEN HEAVENS

MATALA LE LAGI MO LE ASO TO’ONAI 30 ME 2026

(tusia e Pastor EA Adeboye)

Manatu Autu: O Le Atua e tumau (The ageless God)

Tauloto Tusi Paia: Isaia 40:31 “A o ē fa‘atalitali i le ALI‘I, e toe fa‘afouina lo latou malosi. Latou te si‘i a‘e ‘apa‘au e pei o aeto; latou te tamomo‘e, ‘ae lē vaivai; latou te sāvavali, ‘ae lē tigāina.”

Faitauga - Tusi Paia: Luka 1:57-58

O le Atua e lē fa’atapula’aina e le taimi, ma ona o lea, e lē matua o Ia. I le Tanielu 7:9-10; o lo o tā’ua ai o Ia o Lē mai le vavau. Sa i ai o Ia ao le’i amataina le taimi, ma faia ai le taimi ia te ia lava. Auā e lē o’o ia te Ia se matua, o lona uiga o lona malosi e lē taitai fa’aitiitia.

Ua ta’u mai e le Isaia 40: 28-31; ia i tatou o le Atua e lē taitai vaivai. E mafai e se taulealea ona ala a’e i le taeao ua toe faafouina ma malosi, peita’i e lagona le vaivai i le faaiuga o le aso ma manaomia le moe, peita’i o le Atua e lē o’o I ai se lē lavā. O le mea moni e le tulimoe Ia e lē moe lava (Salamo 121:4). Auā o Ia o le Atua e lē suia, e fou pea ia e faavavau ma lona alofa mutimutivale e fou i taeao uma (Auega 3:23). E ala i lona alofa mutimutivale, e mafai ona ia fa’amalosia lē ua vaivai, toe faaola mea e foliga mai ua mate ma toe fa’afo’isia avanoa ua leiloa.

I le faitauga  mai le Tusi Paia o le asō ua tatou vaaia ai le galue o le Atua faavavau i olaga o Sakaria ma Elisapeta. Ua matutua le ulugalii ma ua leai so la faamoemoe e mafai ona la toe maua se atalii /afafine. Ina ua tula’i le Atua faavavau mo i laua na ia faafouina o la tino matutua. Na maua e Elisapeta le ola ma le malosi i lona manava ma to ai o ia (tulou). Poo le a le matua po o le tuai o se mea, e o’o loa i ai Lē e faavavau, na te faia ia lelei ma fou. Na Ia faia mo Sara ina ua ia saunia lona manava sa oti, ( Roma 4:19) e fanau mai ai se tama. Afai o e faalogoina pei ua lē mafai ona e manuia ona ua e misia se avanoa i le taimi ua tuana’i, po ua e matua tele mo le maua o se pepe/fanau, ou te tatalo i le suafa o Iesu ia asiasi atu le Atua faavavau ia te oe I le asō. O le a ia avatu ia te oe se ola fou ma suia oe ia e uluola. 

Na maua foi e Kalepo le mana faavavau o le Atua faavavau. I le valusefulu o tausaga o lona soifua sa tumau pea lona malosi faapei fa’ato’ā fasefulu ona tausaga ma sa auina atu ia e asia le nuu o Kanana. O se toeaina e valu sefulu tausaga ae sa fesili mo se mauga auā sa fa’asaoina lona malosi (Iosua 19:6-12). O ē faatalitali mo le Alii e faafouina lo latou malosi tusa poo le a le tele o tausaga o le soifua.

Le au pele e, afai o i ai se vaega o lou soifua o e lagona ua faaitiitia lou malosi, po ua lē mafai ona e toe fua mai, ou te tatalo ia faafouina lou malosi e le Atua faavavau ma avea oe e faia mea e lē mafai ona fai, i le suafa o Iesu. E mafai e le Atua o le vavau ona faafouina tausaga ma le malosi o ē faatalitali ia te ia, i le suafa o Iesu, Amene 

OPEN HEAVENS

MATALA LE LAGI MO LE ASO FARAILE 29 ME 2026

(tusia e Pastor EA Adeboye)

Manatu Autu: Aua nei taofia oe i le pologa (Dont remain in bondage)

Tauloto Tusi Paia: Kalatia 5:1 “O lenei, ‘ia ‘outou tumau i le sa‘olotoga ‘ua fa‘asa‘oloto mai ai Keriso ‘iā te i tatou ‘ae ‘aua ne‘i toe tāofia ‘outou i le amo o le pologa.”

Faitauga - Tusi Paia: Mataio 11:28-30

I le tele o tausaga ua leva, sa faalogo se alii talavou i se lauga na ou faamatala ai le taua o le gauai ma le atoatoa i le Atua, ona sau lea ia te a’u ma faapea mai, ‘tamā, ua ou gauai ma lafoai mea uma i le Atua’, na ou ataata ma faapea atu, ‘Viia le Atua! O lona uiga la ua mafai ona matou faaaogaina lau taavale, ona e iai la matou galuega e fia faia, ae sa tau sue so matou auala i lea nofoaga’. Na ia tali mai, ‘oi o taeao o le aso Gafua, ae e tatau ona ou alu e faigaluega’. Na ou fai atu, ‘ioe ua ou iloa, ae matou te fia faaaogaina lau taavale tau o le aso e tasi’. Ua toe tali mai, ‘Ha!’ Na ou ataata ma fai atu iai, ‘lo’u atalii, matou te lē manaomia lau taavale, pau a le mea e tatau ona e iloa, e te lei lafoai mea uma i le Atua e pei ona e fai mai ai’. 

E iai taimi, o tulaga e saisaitia ai pea tagata i le pologa, o lo latou pipii atu i le oa. Afai e faasaoloto e Iesu se tagata mai ia satani ma le pologa o le agasala, ae pipii pea lea tagata i mea o le lalolagi, e tumau pea o ia i le pologa e ui ua tatala e Iesu lona pa. O loo faamalosi mai le Kalatia 5:1 ia ‘outou tumau i le sa‘olotoga ‘ua fa‘asa‘oloto mai ai Keriso ‘iā te i tatou ‘ae ‘aua ne‘i toe tāofia ‘outou i le amo o le pologa. O le maua o le saolotoga, e pau lau mea e faia o le sau ia Iesu, ae o le saoloto, o lau matafaioi tele lea e manaomia ai lou tulai pea i lou saolotoga. 

I le faitauga mai le Tusi Paia o le asō, na faamalosi Iesu i tagata uma o nofo pologa e ō mai ia te ia ma latou avega ina ia latou malolo ai. E taua le silafia, e lē mafai e le Atua ona faamalosia le saolotoga i se tagata. O lona uiga e manaomia lou naunau e maua le saolotoga o loo ia aumaia ma tumau ai. O soo se tagata e fiafia i mea o le lalolagi, ua filifili e tumau i saisaitiaga a le tiapolo, aua o le alofa o le tamā e lē ia te ia. O lea tagata e lē mafai ona savali i le saolotoga ma e lē mafai ona tumau i le Atua e faavavau. (1 Ioane 2:15-17). 

Le au pele e, e leai se manuia i soo se fesootaiga ma le tiapolo. O le oa o loo folafola e le tiapolo e tele ina maumau ai o latou agaga, e sili atu lona tau i lo le oa ma le tamaoaiga o le lalolagi (Mareko 8:36-37). E tatau ona saunia lou tagata e lafoai soo se mea e saisaitia ai oe ma ia e ole atu i le Atua mo se faasaolotoga. Afai o loo e nofo pea i le pologa i soo se vaega o lou olaga, ou te tatalo ia faasaoloto oe e le Alii, i lona mana ma le malosi matautia, i le suafa o Iesu. O i latou e fiafia i mea o le lalolagi, e lē mafai ona savavali i le saolotoga a le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 28 ME 2026

(tusia e Pastor EA Adeboye)

Manatu Autu: E na te aumai le malū (He will bring calm)

Tauloto Tusi Paia: Isaia 41:10 “‘Aua ‘e te fefe, auā ‘ou te ‘iā te oe; ‘aua le fētepatepa‘i, auā o a‘u o lou Atua; ‘ou te fa‘amalosia oe. E moni, ‘ou te fesoasoani ‘iā te oe; e moni, ‘ou te tāofia oe i lo‘u lima taumatau e i ai le amiotonu.”

Faitauga - Tusi Paia: 1 Tupu 17:8-16

I le 2022, na ou malaga ai i Peretania i le tau vevela e sili ma le 44 tikeri. Ina ua ou taunuu atu, na ou fai i lo’u Tama i le lagi, ‘ua ou malaga i atunuu i le taumalulū ae na e avatu iai le mafanafana ina ua ou ole atu. O le taimi la lenei o le tau mafanafana ae ua matuā vevela tele. Faamolemole pe mafai ona e tau faamalūina le tau?’. Ina ua maea ona ou tatalo i le nofoaga na ou iai, na paū mai le 40 tikeri i le 28 tikeri ae lei oo i leisi taeao, ma o le taimi atoa na ou iai i lea atunuu, na faamālū e lou tama le tau. Afai o ē ui ini vaega o loo matua vevela ua tau lē mafai ona tatali i lou olaga, ou te tatalo ia faamālū e lou Tamā mo oe i le suafa o Iesu. 

I le 2 Tupu 6:24-33, na matuā aasa le tulaga i Samaria ona o se tupu tuaoi, o se fili ua ia pulea malosi le laueleele. Ua matua taugata meaai ma oloa, ae ua lē mafai e tagata ona saili fesoasoani ona ua siomia i latou e le fili. Ua matua leaga le tamaoaiga ua amata ona ai e tinā latou fanau (tulou). Ina ua matuā le mafai ona tatali le matuia o le tamaoaiga, na oo mai le upu a le Atua e ala ia Elisaia o le a liua mea uma. Fai mai o le aso e sosoo ai, o le tamaoaiga matua leaga o le a lelei ma o le matuā taugofie meaai. I le aso na sosoo ai, o meaai na matua lē maua ma taugata, ua taugofie ma faulai, ma ua maua e tagata uma o le atunuu le faulai o mea (2 Tupu 7:16-17). 

O le fafine ua oti lana tane i Sarefata, o se tasi lea o tagata na oo i se tulaga vevela.  Muamua, na maliu lona toalua, ona oo mai lea o le oge i le nuu na matua faigata ona tatali e ia ma lana tama. Ua matua leaga ua toe o le aiga mulimuli, na ia fuafua la te aai mulimuli ai ma lana tama ona faatali lea o le oti. Peitai ane, o lo’u Tamā i le lagi, e faalogo i le ole atu a i latou ua leai se faamoemoe, e na te silafia le ala e faamālū ai tulaga vevela, ua auina atu Elia ia te ia. I le upu a le perofeta, o lana aiga mulimuli na avea o se aiga muamua o vavega i le taimi atoa o le oge, e pei ona tatou iloa i le faitauga o le Tusi Paia o le asō. 

Le au pele e, aua e te popole pe fememeai pe a e oo i se tulaga faigata. O le Atua lava e tasi na saunia le ala i le vao ma vaitafe i le toafa (Isaia 43:19) e na te aumaia oe i fafo o se tulaga vevela, ma saunia se tulaga mālū i lou olaga. Ou te tatalo ia feluiaina e le Atua mea mo le lelei i soo se vaega o lou olaga ua e manatu ua leai se ala, i le suafa o Iesu. 

Tatalo

Tamā, faamolemole auina mai se fesoasoani ia te au ma ia feliuaina soo se tulaga vevela i lo’u olaga mo le lelei, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 27 ME 2026

(tusia e Pastor EA Adeboye)

Manatu Autu: Tatalo mo fanau (Prayers for children)

Tauloto Tusi Paia: 1 Samuelu 2:26 “Ua tupu pea lava le tama o Samuelu ma ‘ua fa‘apelepeleina e le ALI‘I ‘atoa fo‘i ma tagata.”

Faitauga - Tusi Paia: Salamo 127:3-5

1. Tama, ou te faafetai mo lau meaalofa o le fanau i lo’u aiga, nuu, atunuu ma le lalolagi atoa.
2. Tama, ao matou faamanatuina le aso faapitoa mo fanau i le lalolagi i le asō, ia maua e fanau uma se feiloaiga ma lau Afio e toefuataina ai o latou olaga, i le suafa o Iesu.
3. Tama, faamolemole fesoasoani i fanau uma o le lalolagi, ia ola i le poto faale Atua, ina ia latou iloa ai Oe ma ou Ala ma tumau ai i le amiotonu i o latou olaga, i le suafa o Iesu.
4. Tama, faamolemole faatupu le naunau ma le fia mafuta atu ia te oe i loto o fanau uma i le lalolagi atoa ma liligi ifo lou Agaga i o latou luga ia fou pea, ma ia latou alolofa ia te oe ma o latou loto atoatoa, i le Suafa o Iesu.
5. Tama, faamolemole ia i ai lou alofa tunoa i luga o fanau uma i le lalolagi ma ia tatala faitotoa o faamanuiaga ma avanoa taua i o latou matua uma ma tagata o loo tausia i latou, ina ia mafai ona tausia fanau ma maua mea uma e manaomia.
6. Faamolemole Tama puipui fanau uma i lo’u siomaga mai galuega leaga a le tiapolo ma ia siomia i latou uma e agelu ma aupa afi mai ia te oe.
7. Tama faamolemole puipui fanau uma mai tuinanau o lenei lalolagi. ‘Aua nei avea I latou o ni pologa I le agasala, tuinanau o le tino ma galuega a le tiapolo, i le Suafa o Iesu.
8. Tama faamolemole ia tumau fanau uma i lo’u siosiomaga ini faapotopoto o uo keisiano e amio Atua I aoga, ekalesia ma soo se nofoaga e o atu iai. Ia aua nei latou mafuta i faapotopotoga a vale ae ia siomia e uo, faiaoga ma faufautua e popoto I le suafa o Iesu.
9. Tama, ia taumamao ni ma’I ma ni faama’I mai fanau uma o loo I lo’u siosiomaga. Ia ola maloloina lelei ma malolosi I le Suafa o Iesu.
10. Tama faamolemole ia e faatulagaina fanau uma i lo’u siomaga i faamoemoega ua e faataatitia mo latou olaga  I le amataga o loo latou ola taumafai. Aua nei o ese ma lou finagalo I le Suafa o Iesu.
11. Tama foai I fanau uma I lo’u siomaga le agaga o le usitai. Ia avea o latou olaga e faafiafia ia te oe, ina ia latou iloa au tulafono ma usiusitai iai I le Suafa o Iesu.
12. Tama faamolemole faamagalo fanau uma a Samoa, ua latou iloa au Afioga, ae ua lē savavali ai. Afio mai oe Agaga Paia e taitai i fanau a si o matou atunuu ina ia savavali e tusa ma lau Upu, o le faitotoa lea o le manuia, i le suafa o Iesu ua matou tatalo atu ai nei, AMENE

OPEN HEAVENS

MATALA LE LAGI MO LE ASO LUA 26 ME 2026

(tusia e Pastor EA Adeboye)

Manatu Autu: E lē lava na o le malosi 2 (Strength is not enough 2)

Tauloto Tusi Paia: Salamo 84:4 “Amu‘ia i latou ‘ua nonofo i lou fale; latou te vivi‘i pea ‘iā te oe. Selā.”

Faitauga - Tusi Paia: Isaia 40:28-31

O ananafi, na tatou iloa ai, na paū Peteru i faaosoosoga ona ua lē mafai ona mataala i le tatalo (Mataio 26:40-43). O le lē tatalo, o leisi faailoga lea o se kerisiano faatuatua o loo faalagolago i lona malosi. E lē faapei o Peteru ia Tavita, na iai i le nofoaga o tatalo i le ao ma le po (Salamo 55:17). Sa masani ona ala i le po, e mafuta i le Atua ma manatunatu i lana Upu (Salamo 63:6, Salamo 119:148). Na matua manino ia te ia, e iai tapulaa e gata ai lona malosi, ma e tele vaega na tutupu i le Tusi Paia, na ia ole atu i le Atua e faasino atu le mea e tatau ona ia faia (1 Samuelu 23:1-5), 1 Samuelu 30:8-9). Peitai i le 2 Samuelu 11, i se taimi e lei ole atu ai i le Atua mo le faasinomaga, ae ua ia talia tuinanau o le tino, ma oo atu ai i se tulaga faigata na aafia ai ona suli (2 Samuelu 12:9-12). 

Na iloa foi e Tanielu le taua o le tatalo. Na ia iloa lelei lona manaomia o le Atua ao iai i nuu ese, o Papelonia, ma e fai mai le Tusi Paia na faatolu ona tatalo i le aso (Tanielu 6:10). E ui na aumai se tulafono e lē mafai ona tatalo se tagata i seisi, vagana le tupu, na ia iloa lelei le mea e gata ai lona malosi ma o lana tali atu, o le tatala o lona faamalama ma tatalo e pei ona masani ai. O lana tali i mea uma o le tatalo. 

O le tatalo e matua taua tele, o loo faamalosi mai le Tusi Paia ia tatou tatalo e lē aunoa (1 Tesalonia 5:17). O le taimi e te lagona ai e te lē fia tatalo pe ua e lē manaomia, o le taimi tonu lea e tatau ai ona e tatalo malosi aua o le lē tatalo, e oo atu ai ina vaivai se kerisiano faatuatua, ma iu ina lē toe iai le faamaufaailoga faaleagaga. O le taimi e tapē ai e le tiapolo le afi faaleagaga o se kerisiano, e mafai ona ia faaumatia ia te ia. O le tatalo, o lou faamaualalo lea i le Atua ma faailoa atu e lē mafai ona tatou faia se mea e aunoa ma ia. E na te faamalūina o tatou loto ma faamanatu mai tulaga e gata ai lo matou malosi i le tino. A tatou faataitai ma ola e faatalitali i le Atua i le tatalo, e faafouina lo tatou malosi i aso uma (Isaia 40:31) ma e mafai ai ona manumalo i faaosoosoga a le tiapolo (Mataio 26:41). 

Le au pele e, e faapefea ona e tali atu i luitau o le olaga? E masani ea ona e taumafai muamua e fofo i lou poto ma lou malosi? Aua e te faia le Atua o se tulaga mulimuli i lou olaga, ae e tatau ona ave i le Atua lau faamuamua mo se tali. Ola ma savali i se olaga masani i le tatalo e lē aunoa ona e ola lea i le manumalo i aso uma o lou ola, i le suafa o Iesu. A e ola ma masani i le tatalo, e te maua le malosi mai le Alii i aso uma, i le suafa o Iesu, Amene.