OPEN HEAVENS

MATALA LE LAGI MO LE ASO TOONAI 12 SETEMA 2026

(tusia e Pastor EA Adeboye)

Manatu Autu: Aua e te fiu e taumafai pea 2(Never give up 2) 

Tauloto Tusi Paia:  2 Korinito 4:1 “O le mea lea matou te lē fa‘avaivai ai, o i matou ‘ua i ai lenei faiva, ‘ina ‘ua alofaina i matou;”

Faitauga - Tusi Paia: Isaia 40:27-31

O ananafi na o’u faamalosi ai ia te oe aua e te fiu e taumafai pea i au miti mai le Atua. O le asō ou te mana’o e faailoa ia te oe tusa pe foliga mai ua lē mafai ona ausia au miti, e mafai e le Atua ona toe faaola ma fa’afo’isia i latou e ala i lona alofa mutimutivale. 

I le Mataio 4:19; na folafola e Iesu na te faia Peteru ma fai faiva o tagata pe afai e mulimuli atu ia te ia. Na mulimuli Peteru ia Iesu mo le tolu ma le afa tausaga, peita’i ina ua uma le fa’asatauroina o Iesu, na toe fo’i fagota. Faafetai ia Iesu Keriso i lona alofa mutimutivale e le gata, na ia asiasi ia te ia e pei ona tusia i le tusi o Ioane 21:15-17 ma toe fa’afo’isia ia i le ala i lona taunuuga ma fetalai atu ia te ia, “Peteru fafaga a’u mamoe.” Ona oo lea i le aso Penetekoso e pei ona fa’amatalaina i le Galuega 2:1-4; na afio ifo Agaga Paia i luga o Peteru ma isi sa faatasi ma ia, ma liua le tagata faifaiva faiaina e faafuasei ona avea ma se tasi na manumaloina agaga e 3000 mo Keriso i le lauga e tasi (Galuega 2:41). E le’i umi, ae tautala le Peteru lava lea ma le loto toa i ta’ita’i o le nuu (Galuega 4:8-13), ma o lona ata lafoia na malolo ai e mama’i (Galuega 5:15-16). Afai na mafai e le Atua ona toe fa’afo’i Peteru i le ala e faataunuuina ai lona valaauina, e mafai fo’i ona Ia faia i soosetasi ua fiu ma lē toe mana’o i lana miti. 

I nisi taimi o o tatou olaga, tatou te lagona uma le vaivai ma le lē toe fia i ai. Ua o’u maitauina fo’i e tele ina maua tagata i le lēlavā ma masani ona faaosoosoina ai e togi le solo ina ua toe o se aga taunuu manuia a latou miti. Aua le faatagaina le vaivai poo so’ose ituaiga faaosoosoga e faaoso oe e lafoa’i au miti. I taimi faapea tagi atu i le Atua mo lona alofa mutimutivale e sapaia oe ma fesoasoani ia aua ne’i e fiu e taumafai pea. Fai mai Isaia 40:29; Na te avatua le malosi i e ua vaivai; ao e ua leai se malosi na te faatupu tele i ai le malosi. I le 2 Korinito 4:1; Fai mai Paulo, faapei ona alofaina i matou, matou te le faavaivai ai o i matou ua i ai lenei faiva. O le alofa mutimutivale e mafaia ona tausia ma uumau oe mai lou fulitua I mea uma na e galue punoua’i ma tautigā ai, ua toeitiiti e taunuu i lou manuia. Aua lava ne’i tu’u avanoa i le vaivai e manumalō ia te oe. O le vaivai ma le lēlavā na tatā’ia Esau e tia’i lona tofi ulumatua (Kenese 25:29-34) ma o loo pa’uū pea le toatele i lenei filifiliga sesē taugata i aso nei. 

Le au pele e, o e faaalogoina le faavaivai ma ua sauni e faamuta le taumafai? Tagi i le Atua mo lona alofa mutimutivale. Ole ia te ia mo lana ta’ita’iga, faasinoga, malosi ma le fesoasoani uma e te manaomia e faataunuu ai lona finagalo mo lou olaga. O lona alofa mutimutivale o le a siitia oe seia taunuu i le manuia, i le suafa o Iesu. 

Tatalo

 Tamā faamolemole auina mai lou mana e fa’amalosia ma unaia a’u aua ne’i fiu e taumafai pea, i le suafa o Iesu Amene. folafolaga ua ia avatu ia te oe, ma faaauau ona e mulimuli i lana taitaiga, e na te faataunuuina au miti e tusa ma lona finagalo i le suafa o Iesu. A e tumau pea i le faatuatua ma aua ete fiu i le taumafai e ausia miti ua tuuina atu e le Atua ia te oe, e oo lava ona taunuu, i le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 11 SETEMA 2026

(tusia e Pastor EA Adeboye)

Manatu Autu: Aua e te fiu e taumafai pea 1 (Never give up 1) 

Tauloto Tusi Paia:  Faataoto 23:18 “auā ‘āfai o i ai le i‘uga, ‘ona lē i‘uvale lea o lou fa‘amoemoe.”

Faitauga - Tusi Paia: Kenese 41:37-44

O Iosefa o se faataitaiga lelei o se tagata e lei fiu e taumafai pea, e ui na matuā faigata luitau na ui ai. I le Kenese37:5-23, na miti ini miti maoae, ma ina ua ia faasoa atu i ona uso, ua latou lē fiafia ona ua lu’i ai i latou. Ua latou pulepule e fasioti ia te ia peitai na iu ina malilie e faatau atu o se pologa. E lei taofia ai Iosefa. Na ia iloa lelei ua saunia se lumanai maoae mo ia, o lea na ia galue malosi ai seia oo ina avea ma taitai i ē pologa. Ona taumafai lea o le toalua o lona matai e faatosina ia maileia o ia, ae na ia teena ona e lē manao e faatupuina le toasā o le Atua, o Lē na ia foai atu ia te ia miti maoae ( Kenese 39:9). Ua ia iloa, a ia lē faatupuina le toasā o le Atua, e mafai ona taunuu ana miti. Mulimuli ane, ua tuuaia pepelo o ia e le toalua a lona matai, ma ua faafalepuipuiina, ma oo ai foi ina avea ma taitai o pagota. Na maea le tele o tausaga, ua faaeaina e le Atua mai le pagota i le tulaga o le Palemia o Aikupito i le aso e tasi. E na o sina gaoioi mai lava o le Atua, ona taunuu lea o ana miti. Afai na faaeaina e le Atua se pagota i se tulaga maualuga faapea, e mafai foi ona ia avea oe i soo se maualuga e te naunau iai. 

I le 1981 ina ua avea au ma taitai aoao o le Ekalesia RCCG, na ou asiasi atu i se tasi o Ekalesia. I le taimi o au asiasiga, na sau se tina i a matou polokalame ae ua maea, ona na manatu e faia i le afiafi. E sau ua ou alu ese, ona faapaū lea i lalo ma tagi tautala e faapea, ‘Le Atua e, o lea la ua ou iloa e te lē finagalo e maua sa’u tama’. Ua fai ia te ia lava, e pau le mea na te manaomia o le vaai i le tagata o le Atua, ona mafai lea ona maitaga. Ina ua fesili iai tagata pe aisea ua tagi ai, ona ia faamatala lea faapea, na tau lea iai e tagata le nofoaga o le a ou iai i le aso e sosoo ai. O le aso na sosoo ai, na sau i le nofoaga na ou iai, ma o le taimi na ou tulai ai ou te lauga, na tilotilo mai ia te a’u ma faapea, ‘Le Atua e, faafetai’. O le masina lava lea, na maua ai i le maitaga aua na pai atu i le Atua lona faatuatua. E lei fiu e taumafai pea i le mea o loo manao iai. 

Le au pele e, aua e te fiu e taumafai. O le Upu a le Atua ia te oe, e taunuu. Afai e te uumau pea i le folafolaga ua ia avatu ia te oe, ma faaauau ona e mulimuli i lana taitaiga, e na te faataunuuina au miti e tusa ma lona finagalo i le suafa o Iesu. A e tumau pea i le faatuatua ma aua ete fiu i le taumafai e ausia miti ua tuuina atu e le Atua ia te oe, e oo lava ona taunuu, i le suafa o Iesu, Amene. 

OPEN HEAVENS

MATALA LE LAGI MO LE ASO TOFI 10 SETEMA 2026

(tusia e Pastor EA Adeboye)

Manatu Autu: Faaeaina saosaoa ma le maoae (Accelerated and extraordinary promotions) 

Tauloto Tusi Paia: 1 Korinito 1:26 “Ia ‘outou mānatunatu i lo ‘outou vala‘auina, le ‘au uso e; e lē to‘atele o ē popoto e tusa ma le manatu o lenei lalolagi, e lē to‘atele faipule, e lē to‘atele ali‘i.”

Faitauga - Tusi Paia: Iosua 1:1-9

O le upu ‘faifeau’ i aso anamua e faasino i auauna e tamoe solo e fai feau a lona matai. O ia feau e aofia ai le fufulu ma faamāmā le potu a lona matai, fai le tagamea a lona matai, fufulu ona vae ma faia isi feau faapena. 

Ao soifua Mose, sa faifeau ai Iosua, e te malamalama ai i le matua faateia o Iosua ina ua faailoa iai e le Atua o le a tofia o ia e avea ma taitai o Isaraelu ina ua faasalaina lona matai. O se faataitaiga lea o le faaeaina e saosaoa ma maoae. Na matua faafuasei le faaeaina e oo ia Iosua ua fememeai i le avega mamafa o matafaioi o le taitai. Ou te iloa lea tulaga aua i le faitauga mai le Tusi Paia o le asō, e faatolu ona fai le Atua ia Iosua ia faamalosi ma loto toa. Ou te folafola atu i le asō, ia faaeaina oe e le Atua faapea. 

A ou vaai nei i tagata o loo pologa i le taumafai mo le faaeaina ma manaonao ia oo i tulaga pule, ou te iloa aua latou te lē malamalama i ala o le Atua. E lē avea e le Atua le faaeaina saosaoa ma le maoae i ē popoto ma agavaa. E na te lē foaia i tagata e manatu maualuga i lo latou agavaa e pei i le faamatalaina o saisailiga faasaienisi i ni pepa o aoaoga. E masani ona filifilia e le Atua mea vālea ma mea vaivai a le lalolagi e fa‘amāina ai ē popoto ma mea malolosi (1 Korinito‬ ‭1‬:‭27‬). O lona uiga, o tagata e manatu e malolosi ma popoto e mafai a e latou ona faaeaina, e lē tatau ona latou manatu e maua mai le faaeaina saosaoa ma le maoae mai le Atua, aua foi na o i latou e lē faoina le viiga o le Atua e na te tuua iai. 

I le aso na ma faaipoipo ai ma la’u avā i le malō, na ma fetaui ai ma se tamaitai o loo fai lona ofu faaipoipo. Peitai e leai se tama faaipoipo, ua tiai e le tama i le aso o le faaipoipoga. Na toe a valea si tamaitai peitai na toe foi i lona tulaga masani. Ina ua maea sina taimi, ua ia faaipoipo atu i se fitafita. E na te leiloa o le tama lea na tiai o ia i le aso o le faaipoipoga, ua ulufale atu foi i le malosi faafitafita. Ona galue lea o le Atua. Na tupu se fouvale a le malosi faafitafita, ma ua filifilia le toalua o le tamaitai e avea ma taitai o le malo. E uma ane, ua tofia le tama lea na tiai o ia, e fai ma faafeao a le taitai o le malo. O lona uiga, o soo se taimi e ulu ai lenei tamaitai i le taavale, o le tama lea na ia tiaia o ia, e na te tatalaina le faitotoa mo ia, le toalua o le taitai o le malo. 

Le au pele e, ou te folafola atu i le asō, o le a faasaosaoa e le Atua lou faaeaina, ma o i latou uma o loo taliē ma ula ia te oe, o le a faamāina, i le suafa o Iesu. E faasaosaoina e le Atua  le faaeaina e nā o i latou e lē faoina lona viiga, i le suafa o Iesu, Amene. 

 OPEN HEAVENS

MATALA LE LAGI MO LE ASO LULU 9 SETEMA 2026

(tusia e Pastor EA Adeboye)

Manatu Autu: Faaeaina vave ma le maoae (Rapid and extraordinary promotions) 

Tauloto Tusi Paia: 1 Samuelu 2:8 “Na te fa‘atula‘iina le tagatalautele nai le ‘ele‘ele, na te fa‘aeaina fo‘i le tagata mativa nai le fa‘atafuna. ‘Ia nofo fa‘atasi ma ali‘i, ‘ia fai fo‘i mo latou tofi le nofoāli‘i mamalu. Auā o lo‘o i le ALI‘I fa‘avae o le lalolagi, ‘ua na fa‘ae‘e ai le atu laulau.”

Faitauga - Tusi Paia: Galuega 6:5, 8:5-8

O ananafi na ou fai atu o le faaeaina faasolosolo e lelei, ae sili atu ai le faaeaina matautia. O le asō, o le a ou talanoa atu i le faaeaina televave ma le maoae. 

O le faaeaina televave ma le maoae e maua i se taimi vave. Mo se faataitaiga, sa galue Tavita i le fanua ina ua valaau Samuelu ia te ia e faauuina o le tupu faaolioli fou o Isaraelu (1 Samuelu 16:11-13). Ina ua maea lea, e sili atu ma le sefulu tausaga faatoa avea ma tupu o Iuta (2 Samuelu 2:1-4). E fitu ma le afa isi tausaga na faaopoopo ona avea lea o ia ma tupu o Isaraelu atoa (2 Samuelu 5:1-5). I le amataga, na ave ma tupu faaolioli, peitai na faaeaina i le avea ma tupu o Iuta ae mulimuli ane ua avea ma tupu aoao o Isaraelu atoa. 

Na maua foi e Elisaia le faaeaina televave ma le maoae. Na amata o se faifaatoaga, peitai ina ua manaomia e le Atua seisi e sui ia Elia,  na tofia o ia e le lagi ma foai atu le televave e manaomia (1 Tupu 19:19-21). I le 2 Tupu 2:9-15, na faaeaina o ia e le Atua, ma avea ma se tasi o perofeta pito sili ona maoae i le Feagaiga Tuai. Na faaaoga o ia e le Atua e faatino le tele o vavega maoae, e sili atu i lē na ia suia, e iai ma le vavega mulimuli na tupu ae ua maliu (2 Tupu 13:21). Na matua maoae i le 2 Tupu 2:19-22 na ia faaleaogaina le fetuu i luga o Ieriko, o se nuu na i lalo o se fetuu e amata mai le taimi o Iosua (Iosua 6:26). I le 2 Tupu 6:24-30, na matua leaga ma faaletonu le tamaoaiga i Samaria ua amata ona aai fafine i latou fanau (tulou), peitai e tasi le upu na faia e Elia na liliuina le tulaga faaletonu mo le lelei, ma oo mai ai le faasaolotoga o le tamaoaiga i le atunuu atoa (2 Tupu 7:1-16). 

O Filipo o se tasi o tagata i le Tusi Paia na ia maua le faaeaina televave ma le matautia. I se taimi puupuu, na siitia mai i le tulaga o se sui o le Ekalesia i le avea ma tiakono (Galuega 6:5) ona toe faaeaina pea i le avea ma se faifeau faievagalia na faatupuina le olioli tele i le aai atoa ( Galuega 8:5-8). Sa oo mai lona faaeaina televave ona sa sauaina le lotu i Ierusalema i lea taimi, ae ua faataapeapeina le toatele o le au soo (Galuega 8:3-4). O loo faalia ai, e iai taimi e faaaoga ai le Atua mea e fana mai e le tiapolo e faaumatia ai oe, e toe faaeaina ai oe. 

Ua ou vaai a silasila mai le Atua i se tagata faatuatua e moni ma ave lana faamuamua i lana savaliga ma ia, e na te feliuaina i latou mai le faaeaina faasolosolo ae tuu iai le faaeaina televave ma le maoae. O ia tagata o le a amata ona latou maua le faaeaina i le televave ma le maoae. 

Tatalo

 Tamā, faamolemole fesoasoani mai ia te au ia ou maua le faaeaina televave ma le maoae i vaega uma o lou olaga, i le suafa o Iesu. 

OPEN HEAVENS

MATALA LE LAGI MO LE ASO LUA 8 SETEMA 2026

(tusia e Pastor EA Adeboye)

Manatu Autu: Mai le faaeaina faasolosolo i le faaeaina matautia (From steady promotion to extraordinary promotion) 

Tauloto Tusi Paia: Salamo 37:3 “Ia e fa‘atuatua i le ALI‘I ma e faia amio lelei; ‘ia e nofo i le nu‘u, ma tausisi i le fa‘amaoni.”

Faitauga - Tusi Paia: Kenese 26:1-14

O le faaeaina faasolosolo e maua pe afai e leai se mea sesē, e faigaluega ma le filiga le tagata ona faasolsolo atu lea i leisi tulaga. A maea, e oo atu i leisi tulaga i luga atu ma faapena ona siitia. O le faataitaiga o le faaeaina faasolosolo o le olaga o Isaako i le faitauga mai le Tusi Paia o le asō. Sa oge le nuu ma sa faigata mea uma. Peitai sa usitai i le Atua e aua le alu ese ma le nuu, ae ia lūlū i le nuu, ma selesele fua e tai selau. E lei gata ai iina, na faaauau pea ona lūlū ma selesele seia oo ina matua matautia. Na faaauau pea le faaeaina faasolosolo seia oo ina ausia le tulaga pito maualuga. 

O le faaeaina faasolosolo e matua lelei aua e faifai lemū ae mautinoa le siitia pea. O i latou e maua le faaeaina faasolosolo, e mafai ona e fuafuaina le faasolo mai le A i le E, I ma oo atu i le O. O le tulaga lē lelei o le faaeaina faasolosolo, e siitia tau o mea e faaopoopo, ao le faaeaina matautia, e siitia e ala i le faateleina. Mo se faataitaiga, a e faaopoopo pea le 2 ma le 2, e tele ni lua e te faaopoopo iai faatoa oo i le 2000, ae a e faateleina le 2 ma le 2, e vave ona e oo i le 2000. 

E finagalo le Atua i lana fanau e alualu pea i luma i le tulaga e mautinoa le faaeaina i le vaega o le faaeaina matautia, a faaeaina e matua ofo ai tagata. Mo se faataitaiga, na faaeaina faasolosolo Iosua ao galue i lalo o le taitaiga a Mose ( Esoto 33:11), i le avea ma tagata suesue mo Isaraelu (Numera 13:1-16). Mulimuli ane, na ia maua le faaeaina matautia i le tofia e sui ia Mose (Numera 27:18-21) seia oo ina avea ma taitaiau mo Isaraelu (Iosua 1). 

E lē finagalo le Atua ia e maua le ola, e finagalo e te maua le ola atili ai lava e faulai mea uma (Ioane 10:10). E finagalo ia e maua mea e sili atu i mea o loo ia te oe , e finagalo e faa afe ona sili atu mea e te maua i lo mea o loo ia te oe i le taimi nei (Teuteronome 1:11). A sii mai le tasi i le afe, e lē o faia i lalo o tulafono masani, ae o loo faia i le faateleina ma tulafono a le Atua. O le ata lea e finagalo le Atua e mulimuli ai lou faaeaina. 

Le au pele e, o la’u tatalo mo oe, ia amata ona e maua le vave ma le saosaoa o le faaeaina matautia i vaega uma o lou olaga i le suafa o Iesu. O le faaeaina faasolosolo e lelei, peitai e finagalo le Atua e te maua le faaeaina matautia, i le suafa o Iesu, Amene. 

 OPEN HEAVENS

MATALA LE LAGI MO LE ASO GAFUA 7 SETEMA 2026

(tusia e Pastor EA Adeboye)

Manatu Autu: O Lē na te faaeaina (The ultimate promoter) 

Tauloto Tusi Paia: Salamo 3:3 “A o oe, le ALI‘I e, ‘ua fai oe mo‘u talitā; o lo‘u mamalu fo‘i ma lē fa‘aeaina lo‘u ulu.”

Faitauga - Tusi Paia: 1 Samuelu 2:7-9

Ao fai au meaaoga mo lou faailoga maualuga (Masters), sa iai se alii talavou sa faigaluega i le ofisa o le polofesa o se ave feau. I aso na, e leai ni telefoni feaveai, a vili atu la ni tagata e fia talanoa i le polofesa, e tali muamua e le alii lea faatoa tuu ai i le polofesa. I le tele o taimi e vili atu ai tagata, a ia tali maia le telefoni, e masani ona faapea atu ē vili atu, ‘polofesa’, ma le manatu o le polofesa o loo tali maia le telefoni. Ua maea sina taimi, ua amata ona ta’u e lenei alii o ia o le polofesa, ua faasolo ina valaau ai foi e tagata e ula ma fia malie ai. E iai se aso na ia faapea ai ia te ia, ‘ou te iloa o loo ula tagata pe a valaau a’u o le polofesa, peitai e mafai ona avea a’u ma polofesa moi’. Ou te alu ese ma le faiaoga i le Iunivesite, o loo fai lona faailoga o le PhD. 

O loo faamatala mai i le faitauga mai le Tusi Paia o le asō e mafai e le Atua ona ia fa‘aeaina le tagata mativa ia nofo fa‘atasi ma ali‘i, ‘i nofoāli‘i mamalu. Ou te malamalama lelei i lea tulaga aua sa leai ni ou seevae mo le 18 tausaga muamua o lou olaga, peitai i le alofa mutimutivale o le Atua, e toatele ulu o malō ua matou feiloai ma talatalanoa i mataupu taua. O le Atua lava lea e tasi e mafai ona ia faaeaina oe, pe afai e te lafoai mea uma ia te ia. 

O nisi tagata ua latou maua tulaga faaeaina e masani ai tagata i le olaga nei. O se faataitaiga lelei o tagata o loo alualu pea i luma i latou galuega ma maua tulaga siitia. E ono latou maua siitaga o totogi, a galulue punouai, e ono faaeaina tulaga pe faatasi i le lima tausaga. E ui e lelei lea tulaga, ou te iloa e sili atu fuafuaga a le Atua mo lana fanau. I le Ioane 10:10, na fetalai Iesu na afio mai o ia i le lalolagi ina ia tatou maua le ola ma maua atili ai lava. E finagalo le Atua ia e fiafia i le faaeaina e sili atu ma tulaga masani, e finagalo e te maua le faaeaina maualuga mai le Atua. O Tavita o se tagata na ia maua lea ituaiga faaeaina mai le Atua. Sa iai se aso sa galue ai i le lafu mamoe a lona tamā, ao le aso na sosoo ai, ua saunia e Lē na te faaeaina, ina ia faauuina o ia o le tupu (1 Samuelu 16:11-13). 

Le au pele, o le ki e tatala ai le faaeaina e le Atua, o lou gauai i le Atua ma e ola ma le usiusitai ia te ia. A e faia, e na te faaeaina oe i ona po e tatau ai ma ia fa‘amaualugaina ai oe i lona mamalu (1 Peteru 5:6). Ou te tatalo, ia faaeaina oe e le Atua, o Lē na te faaeaina, ae lei maea lenei tausaga, i le suafa o Iesu. 

Tatalo

Tamā, ou te ole atu mo lo’u siitia ma le faaeaina i vaega uma o lo’u olaga, i le suafa o Iesu, Amene. 

OPEN HEAVENS

MATALA LE LAGI MO LE ASO SA 6 SETEMA 2026

(tusia e Pastor EA Adeboye)

Manatu Autu: Aoaoina mai isi tagata (Learn from others) 

Tauloto Tusi Paia:Failauga 1:9 “Se a se mea ‘ua uma ‘ona tupu? O le mea lava lea e toe tupu. Se a se mea ‘ua uma ‘ona faia? O le mea lava lea e toe faia; ‘ua leai lava se mea fou i lalo o le lā.”

Faitauga - Tusi Paia: Eperu 6:11-12

O loo faailoa mai le tauloto mai le Tusi Paia o le asō e leai se mea fou i lalo o le la. O lona uiga afai o loo e taumafai e ausia se faamoemoega, ua maea ausia e seisi tagata pe latalata foi iai. O lea, a e suesue i lena tagata ma mulimuli i tapulaa na ola ai lena tagata, o laasaga na ia faia, e tatau foi ona e ausia lena faamanuiaga. O le mafuaaga lea e tatau ai ona avea ma au masani le aoaoina mai tagata e te vaai maualuga iai ma saili e faataitai iai. A e suesue lelei i le ituaiga olaga o loo ola ai ma latou galuega e faia, ona faaopoopo lea iai o lou iloa ma le poto, ua e faatulagaina lou tagata e ausia mea e sili atu i mea na latou ausia. 

Ou te fai lava i lau fanau e fia pei o a’u, ‘ao taulai le vaai a tagata i le faaeaina, ia tou vaai totoa i le talaaga’. E lē faailoga tagata le Atua (Galuega 10:34), o soo se mea ua ia faia mo a’u, ua saunia o ia e faia foi i isi tagata pe afai latou te mulimuli i tapulaa o loo ou mulimuli ai. Ina ua avea a’u ma kerisiano, na tele lou taimi na suesue ai olaga o tagata o le Tusi Paia ou te vaai maualuga iai, aua ou te manao ou te mulimuli ai ma faapei o latou.  O se faataitaiga, e tolu tausaga o ou suesue ia Elia. Ou te alofa tele ia Elia aua o ia o se tagata e mafai ona ia faia se tatalo pupuu, ae paū mai le afi. Ou te fiafia i lona loto toa ma ua ou iloa, o tapulaa e faatupuina le mana i lona olaga, o le tatalo faifaipea ma taulai totoa lana vaai i le galuega ua tuu iai e le Atua. Ina ua maea lau suesuega i le olaga o Elia mo le tolu tausaga, ona ou iloa lea o Elisaia, o le tagata na maua le faaluaina o le agaga o Elia, ona liliu lea o lau suesuega ia te ia mo le tele o tausaga. Sa ou suesueina foi le olaga o Paulo aua o se tagata e maualuga le aoaoina (Galuega 22:3) ma sa maualuga le faauuga ia te ia. O le suesueina o olaga o nei tagata ua faaalia mai ai ia te a’u tulaga e tatau ona ou faia ina ia mafai ona faaaogaina pea a’u e le Atua. 

Le au pele e, ua tusia e le Atua le anoano o alii ma tamaitai i lana Upu mo oe ma au e aoaoina mai ai ma mulimuli ai. E faaopoopo atu iai tagata e mafai ona e aoaoina mai ai i le lalolagi i le taimi nei poo se taimi e lei leva ona mavae atu. Aua nei taofia oe mai le aoaoina mai le tele o le iloa ma le poto e mafai ona e maua e ala i lou suesueina lelei o olaga o isi tagata. Aoaoina mai mea ua latou ausia, e oo i mea na toilalo ai, pe sese foi ina ia e iloa mea e tatau ona e alo ese ai. Ou te tatalo o le a faaali tonu atu e le Atua Matautia alii ma tamaitai e mafai ona aoaoina ai oe, ina ia faataunuuina lou lumanai manuia ia te ia, i le suafa o Iesu. A aoaoina lou tagata ma isi, o le a e aoina mai le poto e soifua lelei ai, i le suafa o Iesu, Amene. 

OPEN HEAVENS

MATALA LE LAGI MO LE ASO TOONAI 5 SETEMA 2026

(tusia e Pastor EA Adeboye)

Manatu Autu: Faapaiaina ma faamanuiaga mai le Atua (Holiness and divine blessings) 

Tauloto Tusi Paia:Salamo 37:4 “Ia e fiafia lava oe i le ALI‘I, ‘ona foa‘iina lea e ia ‘iā te oe o mea e mana‘o i ai lou loto.”

Faitauga - Tusi Paia: Luka 5:1-9

E‭ masani lava ona ou fai i lau fanau o le faapaiaina, o le faia lea o soo se mea e fai mai ai le Atua ma lou loto atoa ma ia vave. A fetalai mai e nofo i lalo, ou te tali atu, ‘ioe le Alii e’, a fai mai e tu i luga, o la’u tali, ‘ioe le Alii e’. A fai mai e ‘ai’, e le faatuai ona ou faapea atu, ‘ioe le Alii e’, a fai mai foi e anapogi, o lau tali e tumau i le ‘ioe le Alii e’, ma e amata loa. Na o le fai lava o le finagalo o le Atua ma lou loto atoa ma ia vave, ona taatia lea o mea uma ia te ia, o le mea lena e ta’ua o le faapaiaina. 

E lē talafeagai pe a faapaiaina se tagata ae oti mativa. O le mafuaaga lea ou te lē faamuamua ai le lauga i le tamaoaiga ma le mauoa, ae e faamuamua ona ou lauga i le faapaiaina. A e faapaiaina, e iai taimi e avatu ai e le Atua faatonuga e taitaiina ai oe e maua faamanuiaga mai ia te ia pe afai e te usitai iai. Peitai o soo se tasi e faafinau i le Atua i taimi faapea, o le a ia misia ia faamanuiaga ua ia saunia mo ia. O le mafuaaga lea na fai mai ai Tavita i le Salamo 37:25 “Ua ‘ou toeaina a‘u nei, sa au taule‘ale‘a; a ‘ou te le‘i iloa se tagata amiotonu na lafoa‘iina, po o ana fānau ‘ua ‘aisi i latou.”

I le faitauga mai le Tusi Paia o le asō, na manaomia e Iesu se vaa e lauga atu ai i le motu o tagata ua potopoto atu, ona o loo latou fia faalogo i le Upu a le Atua mai ia Iesu. Na ia afio atu i le vaa o Peteru ma fai atu e tuutuu teisi atu mai le laueleele. O le tali a Peteru, ‘ioe le Alii e’. Ina ua maea le lauga a le Alii, na ia faliu atu ia Peteru ma fai iai e tuutuu atu i le loloto. Ona o le faaaogaina o lona vaa, na finagalo le Atua e tauia Peteru, ona oo atu lea ia te ia o taui e tele. Ae lei oo mai Iesu, na finau Peteru ma le faiaina, toilalo pea ma ua tau fiu foi,  na galue i le po atoa ae leai se i’a na maua. Peitai o le taimi na fai ai, ia Iesu, ‘ioe’, ma tuuina atu lona vaa i le Alii, ua faatulagaina lona tagata mo le liligi atu iai o faamanuiaga a le Atua. Na matua tele au i’a na maua ua masae ai le upega. Na matua tele lana faamanuiaga na manuia atu ai ma ona tuaoi, ua matua tutumu le vaa o Peteru ma ona tuaoi ua amata ona goto. 

Le au pele e, e lē mafai ona e soifua faapaiaina, e iloa i lou usitai i le Atua, ae tuua oe, pe lafoaaina oe ma le fememeai. A e usitai i le Atua i mea uma, e tali mai o ia ma faamanuiaga ia te oe i soo se vaega o lou olaga. 

Tatalo

Tamā, faamolemole fesoasoani mai ia te a’u ia ou usitai i au faatonuga uma ia vave ma ia faia ma le loto atoa, i le suafa o Iesu, Amene. 

OPEN HEAVENS

MATALA LE LAGI MO LE ASO FARAILE 4 SETEMA 2026

(tusia e Pastor EA Adeboye)

Manatu Autu: Tatalo mo taitai (Prayers for leaders) 

Tauloto Tusi Paia:Faataoto 29:2 “A pule ē amiotonu, ‘ua ‘oli‘oli ai le nu‘u; ‘ae a pule ē amio leaga, ‘ua mapuitigā le nu‘u.”

Faitauga - Tusi Paia: 1 Timoteo 2:1-2

Tatalo

1. Tamā, ou te faafetai ia te oe mo matou taitai i le malo, ekalesia ma nuu. Faafetai i lou faasaoina o latou soifua ma puipui iai latou ao latou tauaveina tiute ma matafaioi i taitaiga ma pulega. 
2. Tamā, faamolemole foai le poto ma le malamalama i o matou taitai, ia latou fiafia i lou finagalo faapea ma tagata lautele. Faailoa iai latou lou finagalo ma ia faataunuuina faamoemoega uma e tusa ma lou finagalo i soo se vaega e oo atu iai la latou pule ma ia matatau ia te oe, i le suafa o Iesu. 
3. Tamā, faamolemole faamalosi i o matou taitai i le tino, mafaufau ma le agaga. Fesoasoani iai latou ia tauave ma amo le avega o tofiga ma pulega lelei, i le suafa o Iesu. 
4. Le Alii e, faaali atu lau afio i o matou taitai, i latou, e lei iloa lou mamalu. Ia latou maua se feiloaiga faapitoa ma oe e mafai ai ona latou gauai i lau taitaiga, i le suafa o Iesu. 
5. Tamā, faamolemole ia e faatupuina se faaolaolaga i o matou taitai. Fesoasoani iai latou e lē o soifua ma faia faaiuga ma galuega e tusa ma lou finagalo ina ia salamō vave ma liliu ia te oe, i le suafa o Iesu. 
6. Le Alii e, faamolemole ia e siosiomia o matou taitai, ini faufautua ma tagata fesoasoani e matatau ia te oe, i le suafa o Iesu. 
7. Tamā, faamolemole fesoasoani io matou taitai ia alolofa tutusa i tagata uma ma ia mamao ese ma faiga faaalatua, i le suafa o Iesu. 
8. Tamā, faamolemole foai i o matou taitai uma le poto mai ia te oe, le aoaoga ma le malamalama e faia ai faaiuga tonu i taimi uma, i le suafa o Iesu. 
9. Tamā, ou te tuuina atu aiga uma ma mea uma e patino i o matou taitai i lau tausiga ma le puipuiga. Faamolemole ia e tauaveina ma puipui iai latou ma mea uma e patino iai latou i lou aao malosi, i le suafa o Iesu. 
10. Tamā, faamolemole fesoasoani i o matou taitai ia agamalū ma loto maualalo i le tulaga e latou te tautino ai vaega e gata ai lo latou iloa. Fesoasoani iai latou ia latou fusifusia i lou alofa mutimutivale ma le poto, i le suafa o Iesu. 
11. Tamā, faamolemole ia e puipui i o matou taitai mai le maileiina e togafiti a satani. Aua nei faatagaina le tiapolo e pulea i latou, i le suafa o Iesu. 
12. Tamā ia e faamanuia i o matou taitai i lou alofa tunoa ma le alofa mutimutivale faapea ma le atamai mai ia te oe, aua le manuia lautele o tagata, i le suafa o Iesu e tatalo atu ai, Amene. 

OPEN HEAVENS

MATALA LE LAGI MO LE ASO TOFI 3 SETEMA 2026

(tusia e Pastor EA Adeboye)

Manatu Autu: Fefa’afetaua’i ma le Atua 2 (Trading with God 2) 

Tauloto Tusi Paia:Luka 6:38 “Ia ‘outou foa‘i atu, e foa‘iina mai ai ‘iā te ‘outou; e foa‘i mai e i latou i lo ‘outou lava ‘ie pulupulu le fua lelei, e lolomi ma lūlūina, e tumu ma solo i tua. Auā o le fua tou te fuaina atu ai, e fuaina mai ai ‘iā te ‘outou.”

Faitauga - Tusi Paia: 2 Korinito 9:6-8

I le tele o tausaga ua tuanai, na fesili mai le Atua ia te a’u poo le a le ituaiga faifeau ou te fia oo iai. Na ia fesili mai, ‘e te fia avea ma faifeau pito sili ona lelei poo se faifeau e pito sili ona leaga?’ Na ou fai iai, ou te fia avea ma faifeau pito sili ona lelei. Na ia fesili mai foi pe ou te fia avea ma faifeau mauaoloa poo se faifeau mativa, ona ou fai atu lea ou te fia avea ma faifeau mauoa. Na ou ola mai i le mativa ma ou te tau atu ia te oe, e lē lelei. Mo se faataitaiga, mo le 18 tausaga muamua o lou olaga, e leai ni ou seevae ona e leai se tupe a ou matua e faatau ai. 

E lei leva se taimi, ae ou alu atu i se sauniga lotu ma ua oo i le taimi o le foai. Na faafuaei ona fesili mai le Atua i le fesili lava e tasi, ae ou tali atu, ‘o le faifeau maoae, pito sili ona lelei toe mauoa’. Ona ia faapea mai lea, ‘foai mai ia te au le tupe a le atunuu e pito maualuga lona tau o loo i lau taga’. Na matua faigata ia te a’u aua e telē le tupe. Na toeitiiti lava ou alaga, ‘satani, alu i ou tua,’ peitai ou te iloa lelei le siufofoga o le Atua, o lea na ou tali atu ai,  ‘ioe, ua lelei le Alii e’. E lei leva ae ou alu foi i seisi sauniga, ae fesili mai i le fesili lava e tasi, na ou tali foi i le tali e tasi ona ia faapea mai lea, ‘tago e faaluaina lau foai ia te a’u’, ona ou faaluaina lea. E lei leva se taimi ae faapea mai ia faatoluina. Na ou faia foi ona amata loa lea ona ou vaai atu ua galue mai le Atua. O aso uma, e eseese tagata e o mai ia te au e fia foai mai mea eseese ma ua amata ona ou fiafia iai. E iai se aso, o le a ou moe, ae ou manatua e leai ma se tagata ua ia foai maia se mea ia te au i lea asō. Na ou fai i le Atua, e leai se mea na foia mai e seisi ia te au i le asō. I le lata i le tulua o po ma ao, ae tuitui mai se tagata i lou faitotoa ma faapea mai, ‘lau susuga, na fai mai le Atua ou te sau e aumai le mea lea’. Na ou fai i si alii pe aisea ua sau ai lava i le leva o le po ae fai mai, ‘ou te iloa o le Atua na auina mai au e na te puipui ia te a’u’. 

Le au pele e, ou te fia fesili atu ia te oe, ‘o le a le ituaiga kerisiano e te fia faapei, mativa pe mauoa?’ Ou te manao ia e faamaoni ma faatuatua i le Atua ma faataga o ia e faaali atu ia te oe i lou olaga lona matautia i le foai atu ia te oe. Foai faifaipea ia te ia mai mea uma ua ia foai atu ia te oe, ma ou te faamautinoa atu ia te oe, e oo mai le taimi e te faapea atu ai ia te ia, ‘Le Atua e, e lē ua tele naua ea nei faamanuiaga?’ E faamanuia pea e le Atua i latou e foai atu ia te ia, i le suafa o Iesu, Amene.